ايماقتار • 08 مامىر، 2021

بيىل ەلوردانىڭ اينالاسىنا 900 مىڭعا جۋىق كوشەت وتىرعىزىلادى

25 رەت كورسەتىلدى

ەلوردادا جاسىل جەلەكتەردى كوكتەمگى وتىرعىزۋ جۇمىسى جۇرگىزىلىپ جاتىر. كوشەتتەر سانىن ارتتىرۋ جۇمىسى مەملەكەت باسشىسىنىڭ نۇر-سۇلتان ماڭىندا جاسىل بەلدەۋدى ءوسىرۋ تۋرالى تاپسىرماسى اياسىندا جۇزەگە اسىرىلۋدا، دەپ حابارلادى قالا اكىمدىگىنىڭ رەسمي سايتى.

بيىل «استانا ورمانى» جشس شامامەن 840 گا الاڭعا جاڭا كوشەتتەر وتىرعىزۋدى باستادى.

«بيىل مەملەكەت باسشىسى قاسىم-جومارت كەمەل ۇلى توقاەۆتىڭ قازاقستان حالقىنا جولداۋىن ىسكە اسىرۋ اياسىندا نۇر-سۇلتان قالاسىنىڭ اينالاسىنا جاسىل بەلدەۋدى ارتتىرۋ ءۇشىن 900 مىڭعا جۋىق كوشەت وتىرعىزۋ جوسپارلانىپ وتىر. ونىڭ 60 مىڭى – قىلقان جاپىراقتى، 800 گەكتاردان استام الاڭعا وتىرعىزىلادى. قازىرگى ۋاقىتتا 405 گا الاڭعا 450 مىڭ دانادان استام كوكتەمگى وتىرعىزۋ جۇزەگە اسىرىلۋدا، ونىڭ 51 مىڭى – قىلقان جاپىراقتى تۇقىمدار»، دەپ حابارلادى «استانا ورمانى» جشس باس اگرونومى ارداق حاسەنوۆ.

سونىمەن قاتار، الدىن-الا وتىرعىزۋ، سۋارۋ، قوپسىتۋ سەكىلدى كۇتىم جۇمىستارى جۇرگىزىلۋدە.

ايتا كەتەيىك، نۇر-سۇلتان قالاسىنىڭ جاسىل بەلدەۋى اۋماعىندا اعاش پەن بۇتانىڭ 34 تۇقىمداسىنان تۇراتىن 11،3 ملن اعاش پەن 1،9 ملن بۇتا وسەدى.

ەلوردانىڭ جاسىل بەلدەۋىن قالىپتاستىرۋدىڭ نەگىزگى ماقساتى ەلدىڭ باس قالاسىنىڭ اينالاسىندا جاسىل القاپتار قۇرۋ بولىپ سانالادى. ولار قولايسىز كليماتتى جاقسارتۋعا اسەر ەتىپ، نۇر-سۇلتان حالقىنىڭ ءومىرى مەن دەمالىسى ءۇشىن قولايلى جاعداي جاسايدى. قازىرگى ۋاقىتتا جاسىل كەڭىستىكتەر ونەركاسىپ شىعارىندىلارىنىڭ، ونىڭ ىشىندە اۆتوموبيل كولىگى قالدىقتارىنىڭ ادامعا زياندى اسەرىن تومەندەتۋدە ۇلكەن ءرول اتقارادى. سول سياقتى ەلدى مەكەندەردە تازا اۋا قالىپتاستىرۋدىڭ جالعىز كوزى بولىپ سانالادى.

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار