قازاقستاننىڭ بۇرىمدىلارى ءى توبىنا ءتۇستى. قارسىلاستارىمىز – فرانتسيا, ۋەلس, سلوۆەنيا, گرەكيا جانە ەستونيا قۇرامالارى. بارلىعى توعىز توپ بار. ءار توپتىڭ جەڭىمپازدارى بىردەن مۋنديالدا كۇش سىناسۋ قۇرمەتىنە يە بولادى. ال ەكىنشى ورىندى ەنشىلەگەندەر ءوزارا شەبەرلىك بايقاسۋ ارقىلى قالعان جولدامالاردى ساراپقا سالادى.
وزگە قۇرلىقتاردى قوسا العاندا الەم چەمپيوناتىندا بارلىعى 24 مەملەكەتتىڭ وكىلدەرى ونەر كورسەتەدى. ۋەفا-نىڭ قۇرامىنداعى كوماندالار اراسىنداعى ىرىكتەۋ ءتۋرنيرى اعىمداعى جىلدىڭ 13 قىركۇيەگىندە باستالىپ, كەلەسى جىلدىڭ قازان ايىندا ءوز مارەسىنە جەتەدى.
ەستەرىڭىزگە سالا كەتەيىك, ايەلدەر اراسىنداعى الەمدىك دوپ دوداسى 1991 جىلدان بەرى ۇيىمداستىرىلىپ كەلەدى. سول جارىستاردىڭ تورتەۋىندە اقش-تىڭ ارۋلارى الدارىنا جان سالماسا, گەرمانيانىڭ بۇرىمدىلدارى ەكى مارتە دارا شىقتى. نورۆەگيا مەن جاپونيانىڭ سۇلۋلارى ءبىر-ءبىر رەتتەن باس جۇلدەنى ولجالادى.
