قوعام • 26 ءساۋىر، 2021

Nur Otan اۋىل شارۋاشىلىعىنىڭ دامۋىن باقىلاۋعا الدى

جايىلىمدىق جەرلەردىڭ، اۋىل شارۋاشىلىعىنا قاجەت سۋدىڭ جەتىسپەۋشىلىگى، مامان تاپشىلىعى، تۇقىمداردىڭ قىمباتتىعى مەن توزىعى جەتكەن تەحنيكا. اۋىل شارۋاشىلىعى سالاسىنداعى وسى جانە وزگە دە شەشىمىن تاپپاعان تۇيىتكىلدى ماسەلەلەر «Nur Otan» پارتياسىنىڭ اگرارلىق سەكتوردى دامىتۋ جونىندەگى رەسپۋبليكالىق قوعامدىق كەڭەسىنىڭ العاشقى وتىرىسىندا تالقىلاندى. وسى جيىندا جاڭا كەڭەستىڭ قۇرامى بەكىتىلىپ، الداعى جىلعا ارنالعان جۇمىس جوسپارى دا ايقىندالدى، دەپ حابارلايدى Egemen.kz.

Marzhan Tileubekova

پارتيانىڭ ءباسپاسوز قىزمەتىنىڭ حابارلاۋىنشا، كەڭەستىڭ باستى مىندەتى – اۋىل شارۋاشىلىعى سالاسىنداعى سايلاۋالدى ۋادەلەردىڭ ىسكە اسىرىلۋىن باقىلاۋ. بۇگىندە ازىق-ت ۇلىك باعاسىنىڭ قىمباتتاۋى وتە وزەكتى بولىپ وتىر. «Nur Otan» پارتياسىنىڭ حاتشىسى مارات سەمبەكوۆ اتاپ وتكەندەي، وتكەن جىلى قانت پەن وسىمدىك مايىنىڭ باعاسى 34-36%-عا، جارمالار – 29%-عا، كوكونىستەر مەن جەمىستەر – 15-20%-عا ءوستى.

ول پارتيا جاڭا كەڭەسىنىڭ مۇشەلەرىنە ۋاكىلەتتى ورگاندارمەن بىرلەسىپ، «Nur Otan» پارتياسىنىڭ سايلاۋالدى باعدارلاماسىندا كوزدەلگەن ءوندىرىس قۋاتىن ارتتىرۋ، ەت-ءسۇت فەرمالارىن، قۇس فابريكالارىن، جىلىجايلاردى سالۋ جانە جاڭعىرتۋ، ەگىس القاپتارىن كەڭەيتۋ ەسەبىنەن اۋىل شارۋاشىلىعى ينفراقۇرىلىمىن دامىتۋ ماسەلەلەرىن قاراۋدى ۇسىندى.

كەڭەس مۇشەسى يارالي حاليلوۆ اگروونەركاسىپ سالاسىندا وبەكتيۆتى ستاتيستيكانىڭ جوقتىعىن العا تارتتى. ول سوڭعى 5 جىلدا اۋىل شارۋاشىلىعى ونىمدەرى ءوندىرىسىنىڭ ايتارلىقتاي ءوسۋى بايقالعانىمەن، الايدا يمپورتتىڭ ودان دا وسە تۇسكەنىن اتاپ ءوتتى. ماسەلەن، 2015 جىلى يمپورت كورسەتكىشى 3،4 ملرد اقش دوللارىن قۇراسا، وتكەن جىلى 4 ملرد اقش دوللارىنان اسقان.

«وسىعان بايلانىستى كەيبىر ستاتيستيكادا كورسەتىلگەن دەرەكتەر شىندىققا جاناسپاۋى ابدەن مۇمكىن»، دەگەن يارالي حاليلوۆ ءوز كۇمانىن جەتكىزدى.

كەڭەس مۇشەسى سەرگەي زۆولسكي ازىق-ت ۇلىك باعاسىنىڭ وسۋىنە توقتالدى. ونىڭ ايتۋىنشا پەتروپاۆلدا 1 كەلى كارتوپتىڭ باعاسى 400 تەڭگەدەن اسقان. سونىمەن قاتار ول وسىمدىك شارۋاشىلىعىنداعى قيىندىقتارعا دا توقتالدى.

«سۋارۋ جاعى قيىندىق تۋدىرعاندىقتان، باعباندارعا باۋ-باقشا كۇتىمىمەن اينالىسۋ مۇمكىن بولماي تۇر. كوكونىس وسىرۋگە دايىن كاسىپورىندار بار، الايدا تاعى دا سۋ تاپشىلىعى كەدەرگى كەلتىرۋدە. ەلەكتر قۋاتىنىڭ جاعدايى دا ءماز ەمەس. ءبىز ەلەكتر قۋاتىن الاتىن بالاما كوزدەردى قاراستىرۋىمىز كەرەك. سەبەبى قازىر ەلەكتر ەنەرگياسىنىڭ باعاسى اسپانداپ كەتتى»، دەدى سەرگەي زۆولسكي.

ءوز كەزەگىندە كەڭەس مۇشەسى سەرىك تەمىرحانوۆ اگروونەركاسىپتىك كەشەندى دامىتۋدىڭ مەملەكەتتىك باعدارلاماسىندا بالىق شارۋاشىلىعىنىڭ جوقتىعىن العا تارتتى.

وتىرىس قورىتىندىسى بويىنشا كەڭەس مۇشەلەرى اۋىل شارۋاشىلىعىنىڭ الەۋمەتتىك ماڭىزدىلىعىن ەسكەرە وتىرىپ، اي سايىن اگرارشىلار كوتەرگەن ماسەلەلەردى قاراپ جانە ونى شەشۋگە، سونداي-اق كەلەسى وتىرىستا اۋىل شارۋاشىلىعى مينيسترلىگى باسشىلىعىنىڭ ەسەبىن تىڭداۋعا شەشىم قابىلدادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز