مەديتسينا • 26 ءساۋىر، 2021

ەلورداعا وتاندىق «QazVac» ۆاكتسيناسىنىڭ قانشا دوزاسى جەتكىزىلدى？

نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ قويمالارىنا وتاندىق «QazVac» ۆاكتسيناسىنىڭ 6 مىڭ دوزاسى جەتكىزىلدى. مۇنان بولەك رەسەيلىك «سپۋتنيك-V» پرەپاراتىن قوسا العاندا، ۆاكتسينانىڭ 55 مىڭعا جۋىق دوزاسى بار، دەپ حابارلايدى Egemen.kz

ايىم ءداۋىت

«وتكەن اپتادا عانا قازاقستاندىق «QazVac ۆاكتسيناسىنىڭ ءبىرىنشى پارتياسى جەتكىزىلدى. ەندى حالىقتىڭ سۇراۋى مەن قالاۋى بويىنشا قازاقستاندىق ءونىمدى ەكپە رەتىندە قولدانا الامىز. دارىگەر رەتىندە جانە ەڭ الدىمەن، قازاقستان رەسپۋبليكاسىنىڭ ازاماتى رەتىندە ەلىمىزدىڭ ۆاكتسينا شىعارۋعا قابىلەتتى ەلدەردىڭ قاتارىندا بولعانى مەن ءۇشىن ماقتانارلىق جايت»، دەدى نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.

ونىڭ ايتۋىنشا، ەلوردا تۇرعىندارى «سپۋتنيك-V» مەن «QazVac» ۆاكتسينالارىنىڭ ءبىرىن تاڭداي الادى.

«كۇنىنە 6 مىڭ ادامعا دەيىن ەكپە سالىنادى. باستاپقىدا تۇرعىندار ۆاكتسيناعا ساقتىقپەن قارادى. بىراق ۆاكتسينا الماۋ دەنساۋلىققا الدەقايدا قاۋىپتى ەكەنىن جانە تەك وسىلايشا ءوزىمىزدى ينفەكتسيادان قورعاي الامىز دەگەن كەڭ اۋقىمدى ءتۇسىندىرۋ جۇمىستارىن جۇرگىزۋ ارقىلى ازاماتتار ۆاكتسينالانعانداردىڭ قاتارىنا ءوز ەركىمەن قوسىلا باستادى. حالىق اراسىندا قورقۋ مەن سەنىمسىزدىك جويىلىپ، ءوز دەنساۋلىعى ءۇشىن جاۋاپكەرشىلىك ارتا ءتۇستى»، دەدى ول.

سونىمەن قاتار ۆەدومستۆو باسشىسى ساۋدا، ويىن-ساۋىق ورتالىقتارىندا ۆاكتسيناتسيا پۋنكتەرىن اشۋدىڭ تيىمدىلىگىن دە اتاپ ءوتتى. بۇگىن ەلوردادا ۆاكتسيناتسيا پۋنكتەرى «Mega Silk Way»، «Keruen»، «حان شاتىر» جانە «ابۋ-دابي پلازا» ساۋدا ورتالىقتارىندا اشىلعان. ولاردا كۇنىنە 250-گە جۋىق ادام ەكپە الادى.

نۇر-سۇلتان قالالىق قوعامدىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە، حالىقتى ۆاكتسينامەن كەڭ قامتۋ ءۇشىن قالا اكىمى التاي كولگىنوۆتىڭ تاپسىرماسىمەن ۆاكتسيناتسيا پۋنكتەرىنىڭ سانى 36-دان 100-گە دەيىن ارتتىرىلدى. سونداي-اق مەديتسينالىق-سانيتاريالىق كومەك كورسەتۋ ۇيىمدارى ءۇشىن جۇمىس ۋاقىتى 8:00-دەن 24:00-گە دەيىن، ساۋدا جانە ويىن-ساۋىق ورتالىعىندا ساعات 10:00-دەن 22:00-گە دەيىن ۇلعايتىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز