اقتوبە قالاسىنىڭ diapazon.kz باسىلىمى 2015 جىلدىڭ ناۋرىز ايىندا اسقار مارات ۇلىنا قاتىستى تۋىنداعان جانجال تۋرالى جازادى. سول ۋاقىتتا ول اقمولا وبلىسى زەرەندى اۋدانىنىڭ اكىمى بولعان. 2015 جىلدىڭ 8 اقپانىندا پوليتسيا ونىڭ Toyota Land Cruiser 200 ماركالى كولىگىن توقتاتىپ, ونداعى مەملەكەتتىك نومىرلەردىڭ جالعان ەكەنىن انىقتاعان.
قۇقىق قورعاۋ ورگاندارى اكىمشىلىك حاتتاما تولتىرىپ, ءىستى سوتقا جىبەرگەن. ءسويتىپ, اكىم ءبىر جىل مەرزىمگە كولىك جۇرگىزۋ قۇقىعىنان ايىرىلعان.
سونداي-اق سوت اسقار مارات ۇلىنا قاتىستى تارتىپتىك جازا قابىلداۋ تۋرالى شەشىمدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنە جىبەرگەن.
ەستەرىڭىزگە سالا كەتەيىك, «قازاۆتوجول» ۇلتتىق كومپانياسىنىڭ بۇرىنعى باسشىسى ۇلان ءالىپوۆ پرەزيدەنت سىنىنان كەيىن جۇمىستان بوساتىلدى. قاسىم-جومارت توقاەۆ ەلىمىزدەگى رەسپۋبليكالىق جانە جەرگىلىكتى جولداردىڭ جاعدايى ازاماتتاردىڭ ءالى دە نارازىلىعىن تۋدىراتىنىن ايتتى.
ال 22 ساۋىردە اسقار مارات ۇلى «قازاۆتوجول» ۇلتتىق كومپانياسىنىڭ جاڭا باسقارما توراعاسى بولىپ تاعايىندالدى.
ا.مارات ۇلى 1976 جىلى تۋعان. شىعىس قازاقستان تەحنيكالىق ۋنيۆەرسيتەتىندە «كولىكتەگى ەكونوميكا جانە مەنەدجمەنت» ماماندىعى بويىنشا, سونداي-اق ل. گونچاروۆ اتىنداعى قازاق جول-كولىك ۋنيۆەرسيتەتىندە وقىپ, «اۆتوموبيل جولدارى جانە اەرودرومدار قۇرىلىسى ينجەنەرى» ماماندىعىن الدى.
ەڭبەك جولىن 1998 جىلى باستادى.
1998-2002 جىلدارى كولىك جانە كوممۋنيكاتسيا مينيسترلىگىندە ءتۇرلى قىزمەتتەر اتقاردى. «قازاۆتوجول» رمك-نىڭ قوستاناي, قاراعاندى جانە پاۆلودار وبلىستىق فيليالدارىندا جۇمىس ىستەدى.
2007-2012 جىلدارى – استانا قالالىق جولاۋشىلار تاسىمالى جانە اۆتوموبيل جولدارى باسقارماسى باسشىسىنىڭ ورىنباسارى, كولىك جانە كوممۋنيكاتسيا مينيسترلىگىندە ساراپشى, جامبىل وبلىستىق قارجىلىق باقىلاۋ ينسپەكتسياسى باسشىسىنىڭ ورىنباسارى.
2012-2015 جىلدارى – اقمولا وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى.
2015-2017 جىلدارى – زەرەندى اۋدانىنىڭ اكىمى.
2017-2019 جىلدارى – اقمولا وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى.
2019 جىلدىڭ 3 ساۋىرىنەن بەرى اقمولا وبلىسى اكىمىنىڭ ورىنباسارى لاۋازىمىن اتقاردى.
