ماسكەۋدە جارتىلاي فينالعا بىرنەشە كۇن بويى ىرىكتەۋ ءوتتى. وعان رەسەي, بەلارۋس, ۋراينا, قازاقستان, قىرعىزستان, ارمەنيا, گرۋزيا, يزرايل, اۋستريا, اۋستراليا, نيدەرلاندىدان 80-گە جۋىق مۋزىكانت باقتارىن سىنادى. وندا قازاقستاندىق MeZzo توبى اۆۆا توبىنىڭ رەپەرتۋارىنان, Westside story ميۋزيكلىنەن اندەر ورىندادى. سونداي-اق وزدەرىنىڭ اۆتورلىق اندەرىن دە شىرقادى.
19-25 تامىز ارالىعىندا سوچيدە وتەتىن بايقاۋدىڭ فينالىنا 20 ءارتىس ءوتتى.
MeZzo-كلاسسيكالىق جانە تانىمال مۋزىكا ەلەمەنتتەرىنىڭ سينتەزى سانالاتىن كلاسسيكالىق كروسسوۆەر باعىتىندا جۇمىس ىستەيتىن قازاقستانداعى العاشقى ۆوكالدىق توپ. ولار 2012 جىلى قۇرىلعان, توپتا جاسۇلان سىدىقوۆ, جانىبەك سەيداحمەتوۆ, اسان نۇربەرگەنوۆ جانە مەيىرحان جانتۇرعانوۆ ءان ايتادى. ۇجىم 2012 جىلى X Factor Kazakhstan كونكۋرسىندا 2-ءشى ورىنعا يە بولعان.
ايتا كەتەيىك, بالالار اراسىنداعى «نوۆايا ۆولنا» ىرىكتەۋىندە فينالعا 11 جاستاعى قازاقستاندىق جان ماكيم ءوتتى. ىرىكتەۋ ءۇش كەزەڭنەن تۇردى. قازىلار القاسى مىڭنان اسا قاتىسۋشىلار اراسىنان جاندى تاڭداپ الدى.
گاۋحار قاپاش
