ZOOM پلاتفورماسىندا وتە مازمۇندى, ۇلكەن قىزىعۋشىلىقپەن وتكەن كونفەرەنتسيا قازاق جۋرناليستيكاسى تاريحىندا تۇڭعىش رەت الەمگە تانىمال امەريكالىق پروفەسسور گەنري دجەنكينسپەن بىرگە وتكىزىلدى.
دجەنكينس گەنري وڭتۇستىك كاليفورنيا ۋنيۆەرسيتەتىنىڭ كوممۋنيكاتسيا جانە جۋرناليستيكا بويىنشا اننەنبەرگ مەكتەبىنىڭ پروۆوست پروفەسسورى.
وڭتۇستىك كاليفورنيا ۋنيۆەرسيتەتى الەمدىك QS رەيتينگىندە 120 ورىندا تۇرعان اتاقتى ۋنيۆەرسيتەت. كوممۋنيكاتسيا مەن مەديا زەرتتەۋلەر بويىنشا امەريكانىڭ ەڭ ۇزدىك ۋنيۆەرسيتەتى بولىپ سانالادى. ال, ۋنيۆەرسيتەتتىڭ اننەنبەرگ مەكتەبى بۇكىل الەم تانيتىن عىلىمي ورتالىق.
كونفەرەنتسيا جۇمىسىن اشقان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقۋ ءىسى جونىندەگى پرورەكتورى, زاڭ عىلىمدارىنىڭ دوكتورى, پروفەسسور ە.ءا.وڭعارباەۆ امەريكالىق پروفەسسورعا وسى كونفەرەنتسياعا قاتىسۋعا كەلىسىم بەرگەنى ءۇشىن العىسىن ايتىپ, قۇرىلعانىنا 25 جىل تولعان ۋنيۆەرسيتەت ءۇشىن حالىقارالىق كوللابوراتسيا ارقاشاندا ستراتەگيالىق باعىت بولىپ قالا بەرەدى دەدى.
ۋنيۆەرسيتەت پرورەكتورى بۇل كونفەرەنتسيا 2020 جىلدىڭ «جوو ۇزدىك وقىتۋشىسى» بايقاۋىنىڭ جەڭىمپازى ەۇۋ-ءدىڭ پروفەسسورى ۇلبوسىن مەيىربەكقىزى ەسەنبەكوۆانىڭ باستاماسىمەن وتكىزىلىپ جاتقانىن ايتتى. ۋنيۆەرسيتەت پروفەسسورلارىنىڭ امەريكانىڭ ۇزدىك ۋنيۆەرسيتەتىمەن بايلانىس ورناتۋىن جوعارى باعالايمىز دەدى. وڭتۇستىك كاليفورنيا ۋنيۆەرسيتەتىنىڭ پروۆوست پروفەسسورى گەنري دجەنكينسكە ەكى ۋنيۆەرسيتەت اراسىنداعى عىلىمي بايلانىستاردى دامىتۋعا, بىرىككەن عىلىمي جوبالار ازىرلەۋگە شاقىردى.
ءوزىنىڭ قۇتتىقتاۋ سوزىندە ەۇۋ-ءدىڭ پرورەكتورى ە.ءا.وڭعارباەۆ ەۋرازيا ۇلتتىق ۋنيۆەرسيتەتى وڭتۇستىك كاليفورنيا ۋنيۆەرسيتەتىمەن ءوزارا ىنتىماقتاستىق تۋرالى مەموراندۋم جاساۋعا دايىن ەكەنىن جەتكىزدى.
كونفەرەنتسيانى ۇيىمداستىرۋشى پروفەسسور ۇلبوسىن ەسەنبەكوۆا ءوزىنىڭ كىرىسپە سوزىندە تسيفرلىق تەحنولوگيالاردىڭ سەرپىندى دامۋى ءاربىر ادامنىڭ, قوعام مەن مەملەكەتتەردىڭ ءومىرىن تانىماستاي ەتىپ وزگەرتىپ جىبەرگەنىن, عالامدىق كوممۋنيكاتسيا ەكونوميكالىق ينتەگراتسيانى كۇشەيتىپ, الەۋمەتتىك جانە تەحنولوگيالىق دامۋدىڭ قارقىنىن ەسەلەپ وسىرگەنىن ايتتى.
پروفەسسور ەسەنبەكوۆانىڭ «اقپاراتتى جەتكىزۋدىڭ مەديا ارالىق ستراتەگيالارى» اۆتورلىق كۋرسىنا قىزىعۋشىلىق وتە جوعارى, بيىل بۇل كۋرسقا ەۋرازيا ۇلتتىق ۋنيۆەرسيتەتىنىڭ 25 ماگيسترانتى جازىلعان ەكەن. ماگيسترانتتاردىڭ ءبىر كۋرسقا وسىنشا كوپ جازىلۋى وتە سيرەك كەزدەسەتىن قۇبىلىس جانە اقپارات داۋىرىندە ترانسمەديالىق تەحنولوگيالارعا دەگەن سۇرانىستىڭ وسكەندىگىن كورسەتەدى.
كونفەرەنتسيادا قازاق ماگيسترانتتارى پروفەسسور ەسەنبەكوۆانىڭ جەتەكشىلىگىمەن امەريكالىق پروفەسسورعا سۇراقتار قويدى. گەنري دجەنكينستىڭ عىلىمي زەرتتەۋلەرىنىڭ باعىتتارىمەن, مەدياكونۆەرگەنتسيا مەن ترانسمەديا ستوريتەللينگتىڭ امەريكالىق مەديا يندۋسترياداعى ورنى مەن دامۋ تەندەنتسيالارىمەن تانىستى.
ماگيسترانت قىمبات دوسىبەكوۆا «پروفەسسور, ءسىز بۇقارالىق مادەنيەت تەورياسىن زەرتتەگەن عالىمسىز. بۇگىنگى جاستارعا كوممۋنيكاتيۆتى تەندەنتسيالار كۇشتى اسەر ەتۋدە. قازاق جاستارى دا ينتەرنەتكە, جاڭا كوممۋنيكاتسيالىق فورمالارعا تاۋەلدى بولىپ وسۋدە. ءسىز قالاي ويلايسىز؟ جاستار جاساندى ينتەللەكت دامىپ, جاستار ەرتەڭ ءوز بەتىنشە ويلاۋدى, اناليز جاساۋدى ۇمىتىپ قالماي ما؟» دەگەن سۇراعىنا دجەنكينس مىرزا تاڭىرقاعان كەيىپپەن, سالماقتى جاۋاپ بەردى. ونىڭ ويىنشا, «بۇل ءححى عاسىردىڭ قيىندىعى. مەنىڭ ەلىمدەگى سياقتى ءسىزدىڭ ەلدە دە جاساندى ينتەللەكت ادام ەڭبەگىن الماستىرادى دەپ قورقامىن. مەن بۇل تۋرالى امەريكالىقتارمەن سويلەسكەندە جۇمىسسىز قالۋدان, تابىسىنان ايىرىلۋدان قورقاتىن ادامداردىڭ كوپ ەكەنىن بايقادىم».
پروفەسسور دجەنكينستىڭ «كونۆەرگەنتتىك مادەنيەت» اتتى كىتابىن پروفەسسور ەسەنبەكوۆا «must read» دەپ باعالايتىنىن ايتقان ماگيسترانت ينديرا جۋماگەلدى امەريكالىق عالىمنىڭ اننەنبەرگ مەكتەبىندە اينالىساتىن عىلىمي جوبالارى تۋرالى سۇرادى.
دجەنكينس مىرزا ءوزىنىڭ زەرتتەۋ توبىندا USC-ءدىڭ 15 ماگيسترانتى جۇمىس ىستەيتىنىن ايتتى. ولار بىرلەسىپ «ترانسمەديا مادەنيەتىنىڭ ساياسي اسەرىن زەرتتەيتىنى, ءبىزدىڭ العاشقى جوبا امەريكا قۇراما شتاتتارىنداعى بەلسەندى جاستار تۋرالى, ميگراتسيا, ادام قۇقىعى, ەكولوگيالىق ماسەلەلەر, مۇسىلماندار قۇقىقتارى تۋرالى عىلىمي ەڭبەكتەر جازاتىنى» تۋرالى اقپارات بەردى.
كونفەرەنتسيا جۇمىسىن قورىتىندىلاعان ل.ن.گۋميلەۆ اتىنداعى ەۇۋ-ءدىڭ جۋرناليستيكا جانە ساياساتتانۋ فاكۋلتەتىنىڭ دەكانى, پروفەسسور ساق قايرات ءومىرباي ۇلى ۇلكەن شارانى باستاپ, ۇيىمداستىرعان ۇلبوسىن مەيىربەكقىزى ەسەنبەكوۆاعا ريزاشىلىعىن ءبىلدىردى. ەكى ۋنيۆەرسيتەتتىڭ عالىمدارى بىرلەسىپ عىلىمي جوبالاردى ىسكە اسىرۋدى قولدايتىنىن ايتتى.
كونفەرەنتسيانىڭ ناتيجەلى جۇمىسىن اياقتاي كەلە ۇلبوسىن ەسەنبەكوۆا ادامزات دامۋىنىڭ تەحنولوگيالىق سينگۋليارلىق كەزەڭى تۋرالى ماسەلەلەردىڭ كۇن تارتىبىنە شىعارىلۋى بۇگىنگى تالقىلانعان ترانسمەديالىق تەحنولوگيالارعا دا قاتىسى بار ەكەنىن كورسەتتى.
مەدياكونۆەرگەنتسيا مەن ترانسمەديا كونتسەپتسياسى اۆتورلارىنىڭ ءبىرى دجەنكينس مىرزانىڭ كونفەرەنتسياعا قاتىسىپ, ءوز ويلارىمەن ءبولىسۋى دە تالقىلانعان تاقىرىپتىڭ ماڭىزدى ەكەنىن دالەلدەيدى.
امەريكالىق عالىمدارمەن بىرلەسكەن عىلىمي زەرتتەۋلەر, عىلىمي كوللابوراتسيا ەكى ۋنيۆەرسيتەتكە دە ءتيىمدى ەكەنىن ايتتى.
كونفەرەنتسياعا ل.ن.گۋميلەۆ اتىنداعى ەۇۋ-ءدىڭ وقۋ ءىس جونىندەگى پرورەكتورى ە.ءا.وڭعارباەۆ, جۋرناليستيكا جانە ساياساتتانۋ فاكۋلتەتىنىڭ دەكانى ق.ءو.ساق, تەلەراديو جانە قوعاممەن بايلانىس كافەدراسىنىڭ مەڭگەرۋشىسى س.م.دۇيسەنعازى, پروفەسسورلار مەن وقىتۋشىلار, ماگيسترانتتار مەن دوكتورانتتار, نازارباەۆ ۋنيۆەرسيتەتىنىڭ وكىلدەرى قاتىستى.
