ونىڭ مالىمەتىنشە, ءبىر جىلدا ەلىمىزدەگى ۆولونتەرلىك ۇيىمداردىڭ سانى 3 ەسە ءوسىپ, ەرىكتىلەردىڭ قاتارى 200 مىڭعا جەتكەن.
«پاندەميا كەزەڭىندە, توتەنشە جاعدايلار كەزىندە ۆولونتەرلىك پەن قايىرىمدىلىق جاساۋ سياقتى قىزمەت تۇرلەرى اسا وزەكتى بولىپ وتىر. بۇل رەتتە ازاماتتاردىڭ باستامالارى مەن جالپى بەلسەندىلىگىن كوتەرمەلەۋ ءۇشىن زاڭعا قايشى كەلمەيتىن ءارتۇرلى مەحانيزمدەر قاراستىرىلعان. پرەزيدەنتتىڭ باستاماسىمەن ولارعا جۇيەلى قولداۋ تەتىكتەرى ەنگىزىلۋدە. بۇل ەڭ الدىمەن قولدانىستاعى زاڭدى جەتىلدىرۋگە قاتىستى. بىرىنشىدەن, جوعارى, ارناۋلى ورتا وقۋ ورىندارىنا ءتۇسۋ كەزىندە, سونداي-اق ازاماتتىق جانە مەملەكەتتىك قىزمەتكە كىرۋ كەزىندە ۆولونتەرلەردىڭ, قايىرىمدىلىق جاساۋشىلاردىڭ قۇقىقتارىن كەڭەيتۋ قاراستىرىلادى, ياعني بەلگلى ءبىر دەڭگەيدە جەڭىلدىكتەر جاسالادى. سونىمەن قاتار, ۆولونتەرلىك جانە قايىرىمدىلىق ۇيىمدارىنا مەملەكەتتىك م ۇلىكتى جەڭىلدىك ارقىلى پايدالانۋ مۇمكىندىگى ەنگىزىلەدى; زەينەتكەرلىككە شىققان كەزدە ازاماتتاردىڭ ۆولونتەرلىك قىزمەت اتقارعان ۋاقىتىن ەسەپكە الۋ كوزدەلەدى; كورپوراتيۆتىك ۆولونتەرلىك, قايىرىمدىلىق جانە ەلەكتروندىق قايىرىمدىلىقپەن اينالىسۋ بويىنشا نورمالار ەنگىزىلەدى. ياعني, فاندرايزينگ, كراۋدفاندينگ پلاتفورماسى, تولەم تەرمينالدارى, سمس, ونلاين-بانكينگ ارقىلى قايىرىمدىلىق جاساۋ تەتىكتەرى پىسىقتالادى», دەدى ب.تىلەپوۆ.
بۇدان باسقا, قايىرىمدىلىق كومەكتىڭ اشىقتىعىن قامتاماسىز ەتۋ ءۇشىن قايىرىمدىلىق ۇيىمداردىڭ رەەسترى جاسالىپ, قايىرىمدىلىق ۇيىمدارىن ىسكە اسىرعان جۇمىستارى تۋرالى ەسەپ بەرۋگە مىندەتتەيتىن نورما ەنگىزىلەدى.
