ەكولوگيا • 22 ءساۋىر، 2021

تەمىرتاۋ ەكولوگياسىن وڭالتۋعا نازار اۋداردى

16 رەت كورسەتىلدى

اتموسفەرالىق اۋانىڭ لاستانۋ دەڭگەيى ەڭ جوعارى قالالار قاتارىنا جاتاتىن تەمىرتاۋدا ەكولوگيا ماسەلەسى تاعى دا كوتەرىلدى. قارا ءتۇستى قار مەن قالىڭ تۇتىننەن ارىلا الماي كەلە جاتقان قالادا جاعدايدى رەتتەۋ ءۇشىن ەڭ ءتيىمدى شارالار قابىلدانباق. مۇنداعى ەڭ ءىرى لاستاۋشى – «ارسەلورميتتال تەمىرتاۋ» اق.

كاسىپورىننىڭ قورشاعان ورتاعا شىعارىندىلار كولەمىن 30%-عا ازايتۋعا ارنالعان جاڭا جوسپارىن قاراستىرۋ ءۇشىن ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ قاراعاندى وب­لىسىنا جۇمىس ساپارىمەن باردى. تەمىرتاۋداعى جيىنعا وبلىس اكىمى جەڭىس قاسىمبەك، كاسىپورىن باس­شىلىعى جانە ەكولوگتەر مەن قوعام بەل­سەن­دىلەرى قاتىستى.

باسقوسۋ قورىتىندىسى بو­يىنشا، تابيعاتتى قور­عاۋ شا­رالارىنىڭ ورىندالۋ مەرزىمىن قىسقارتىپ، شىعارىندىلار كولەمىن تومەندەتۋ جوسپارىنا 2025 ەمەس، 2024 جىلى قول جەتكىزۋ مۇمكىندىگىن بىرلەسە قا­راس­تىرۋ كەلىسىلدى.

«بۇل – شىعارىندىلاردى ازايتۋ بويىنشا قول قويىلعان ەكىجاقتى مەموراندۋمنىڭ ايا­سىنداعى جۇمىستىڭ جالعاسى. ءبىز وسى جەردە «ارسەلورميتتال» باسشىلىعىمەن 20 قاڭتاردا كەز­دەسۋ وتكىزگەن بولاتىنبىز. سول كەزدە كومپانيا شىعارىن­دىلاردى 30%-عا ازايتۋ بويىن­شا جوسپاردى ازىرلەۋگە ءۇش اي ۋاقىت سۇراعان ەدى. سول سە­بەپتى قالانىڭ ەكولوگيالىق پروب-ل­ە­ما­لارىن تالقىلاۋعا قاي­تا جينالىپ وتىرمىز»، دەدى م.مىرزاعاليەۆ.

وبلىس اكىمى ج.قاسىمبەك 2020 جىلى مينيس­ترلىكپەن بىر­گە ءوڭىردىڭ ەكولوگيالىق پروب­لە­مالارىن شەشۋ بويىشا جول كارتاسى قابىلدانعانىن اتاپ ءوتتى.

«جول كارتاسىندا 57 شارا قارالسا، ونىڭ 25-ءى قورشاعان ورتاعا شىعارىندىلاردى ازاي­تۋعا باعىتتتالعان. جىل سايىن قاراعاندى وبلىسى بويىنشا اتموسفەراعا 590 مىڭ توننا زياندى زاتتار شىعارىلادى، ونىڭ 40%-دان استامى، ياعني 247 مىڭ تونناسى تەمىرتاۋ قا­لاسىنا تيەسىلى. مۇنىڭ 86%-ى «ارسەلورميتتال تەمىرتاۋ» اق زاۋىتىنان شى­عادى (212،3 مىڭ توننا). زاۋىت شىعا­رىن­دىلار كولەمىن تومەن­دەتۋ­دەن بولەك، تەمىر­تاۋعا 5 جىل ىشىن­دە 500 مىڭ اعاش ەگەدى»، دەدى ج.قاسىمبەك.

«ارسەلورميتتال تەمىرتاۋ» اق باس ديرەكتورى بيدجۋ ناير تەك 2024-2025 جىلدارعا دەيىن ەمەس، ودان كەيىنگى ۋاقىتتا دا قور­شاعان ورتانى قورعاۋعا قار­جى بولىنە بەرەتىنى تۋرالى ايت­تى.

«شىعارىندىلاردى ازاي­تۋدىڭ جاڭا ستراتەگياسىنا سايكەس، زاۋىت بالاما ەكو­لو­گيالىق شارالاردى قولدا­نادى. الداعى 5 جىلدا قور­شاعان ورتانى جاقسارتۋعا كەم دەگەندە 380 ملن دوللار ينۆەستيتسيا cالامىز»، دەدى ول.

قوعام وكىلدەرى كومپا­نيا­­نىڭ جۇرتشىلىق الدىندا اشىقتىقتى قامتاماسىز ەتۋىنە قاتىستى كەمشىلىكتەرىن اتاپ ءوتتى.

«تەمىرتاۋ ەكولوگياسى – وتە ماڭىزدى ماسەلە. سوندىق­تان شىعارىندىلاردى ازايتۋ جۇمىسى ءبىزدىڭ قاتاڭ با­قىلاۋىمىزدا بولادى. سو­نىمەن بىرگە جەرگىلىكتى قوعام بەلسەندىلەرى دە احۋالدى نازاردا ۇستايدى. «ارسەلورميتتال» باس­شىلىعى ەندى قوعام وكىل­دەرىمەن توقسان سايىن تۇراقتى تۇردە كەزدەسىپ تۇرادى»، دەدى بۇ­عان قاتىستى ەكولوگيا ءمي­نيس­ترى.

ەسكە سالساق، ناۋرىز ايىندا مينيسترلىكتىڭ ەكولوگيالىق رەتتەۋ جانە باقىلاۋ كومي­تەتى كاسىپورىندا جوسپاردان تىس تەكسەرۋ وتكىزىپ، ءارتۇر­لى كور­­سەتكىشتەر بويىنشا نور­ماتيۆتەردىڭ رۇقسات ەتىلگەن نور­ما­دان اسىپ كەتۋىنە بايلانىستى ايىپپۇل سالعان. سونىمەن بىرگە قور­شاعان ورتاعا كەلتىرىلگەن زالال 1 ملرد تەڭگەگە باعالانعان ەدى.

سوڭعى جاڭالىقتار

ارداگەرلەر ازايىپ بارا جاتىر...

قازاقستان • بۇگىن، 19:00

مەرەكە كۇندەر جاڭبىرلى بولادى

اۋا رايى • بۇگىن، 16:00

فۋتبول: «چەلسي» فينالعا شىقتى

فۋتبول • بۇگىن، 15:01

اممانعا اتتاندى

سپورت • بۇگىن، 14:10

قازاندا كۇش سىناسۋدا

سپورت • بۇگىن، 13:40

شەت ەلدەگى قازاق گەنەرالدارى

قازاقستان • بۇگىن، 11:54

قادىر ءتۇنىنىڭ قاسيەتى

رۋحانيات • بۇگىن، 08:10

ەرلىك پەن پاتريوتيزم مەكتەبى

قازاقستان • بۇگىن، 08:06

قارۋلى كۇشتەرىمىز وسىلاي قۇرىلعان

قازاقستان • بۇگىن، 08:05

ۇقساس جاڭالىقتار