سوت وتىرىسىندا ول وزىنە تاعىلعان ايىپپەن كەلىسپەيتىنىن جانە سوتتان ونى بوساتۋىن سۇرادى.
«مەنىڭ ەش كىنام جوق جانە وزىمە تاعىلعان ايىپپەن كەلىسپەيمىن. قۇرمەتتى سۋديا, مەنى بوساتۋىڭىزدى سۇرايمىن. سەبەبى, مەن قازىر قاماۋدا وتىرعانىمنان گورى بوستاندىقتا جۇرسەم, ەپيدەميامەن كۇرەسۋدە قوعامعا كوبىرەك پايدامدى تيگىزەر ەدىم. مەنىڭ دەنساۋلىق ساقتاۋ, مەديتسينا سالاسىندا جيعان كوپ جىلدىق تاجىريبەم جەتكىلىكتى. سوندىقتان ەپيدەميامەن قالاي كۇرەسۋ كەرەكتىگىن بىلەمىن», دەدى ەكس-مينيستر ەلجان ءبىرتانوۆ.
بۇل رەتتە پروكۋرورلار ەلجان ءبىرتانوۆتىڭ ءۇي قاماق مەرزىمىن مامىر ايىنىڭ سوڭىنا دەيىن ۇزارتۋدى سۇرادى. ولاردىڭ ايتۋىنشا, ەگەر ءبىرتانوۆ بوستاندىقتا جۇرسە, تەرگەۋگە قىسىم كورسەتۋى مۇمكىن ەكەن.
ەستەرىڭىزگە سالا كەتەيىك, بىلتىر جازدا پرەزيدەنت جارلىعىمەن ەلجان ءبىرتانوۆ قىزمەتىنەن بوساتىلعان ەدى. الايدا ول بۇل قىزمەتىنەن كەتسە دە, مەملەكەت قاراجاتىن ىسىراپ ەتتى دەگەن كۇدىكپەن قاماۋعا الىندى. سوت پروتسەسى ۇزاققا سوزىلعاندىقتان, ەكس-ءمينيستر ۇي قاماققا الىندى.
