بالىقتاردىڭ جاساندى ءوسىمىن مولايتۋ ماقساتىندا اعىمداعى جىلى بالىق ءوسىرۋ ماۋسىمى باستالعاننان بەرى بالىق شارۋاشىلىعى كوميتەتىنىڭ «جايىق-اتىراۋ بەكىرە بالىق ءوسىرۋ زاۋىتى» رمقك بەكىرە بالىق تۇرلەرىنىڭ 18 داراعىن ۇستادى.
19 ساۋىردە جايىق-اتىراۋ بەكىرە بالىق ءوسىرۋ زاۋىتى بەكىرە تۇقىمداس بالىق تۇرلەرىنىڭ شاباقتارىن جاساندى ءوسىرۋ ماقساتىندا اعىمداعى جىلعى 29 ناۋرىزدا جايىق وزەنىندە ۇستالعان, سالماعى 150 كگ انالىق قورتپا بالىعىنان تىرىدەي كۇيىندە 20,3 كگ ۋىلدىرىق الدى.
ۇرىقتاندىرىلعان ۋىلدىرىقتار دەرناسىل كەزەڭىنە دەيىن ينكۋباتسيالاۋ ءۇشىن اپپاراتتارعا سالىندى, سودان كەيىن باسسەيندەرىندە ءوسىرىلىپ, بۇدان ءارى ءوسىرۋ توعاندارىنا وتىرعىزىلاتىن بولادى. ول جەردە ورتاشا سالماعى 3-5 گرامم بولاتىن 600 مىڭ دانا قورتپا شاباقتارىن الۋعا بولادى دەپ بولجانۋدا. وسىرىلگەن قورتپا شاباقتارى اعىمداعى جىلدىڭ شىلدە-تامىز ايلارىندا تابيعي ورتاعا جىبەرىلەدى.
قازىرگى ۋاقىتتا انالىق قورتپانىڭ جاعدايى قاناعاتتانارلىق دەپ باعالانادى. ءۇيسىندىرۋ ارەكەتىنىڭ ناتيجەلەرىنە بايلانىستى ول انالىق تابىندى قالىپتاستىرۋ ءۇشىن پايدالانىلاتىن بولادى, ال قولدا ۇستاۋ مۇمكىن بولماعان جاعدايدا كاسپي تەڭىزىنە جىبەرىلەدى.
جالپى العاندا, 2021 جىلى تابيعي مەكەندەۋ ورتاسىنا باعالى بالىق تۇرلەرىنىڭ 110,5 ملن دانا شاباعىن, ونىڭ ىشىندە 7 ملن دانا بەكىرە شاباقتارىن شىعارۋ جوسپارلانعان.
