«بيىلعى قوزعالىس جىلدامدىعىنىڭ جاڭارۋىن, جول-كولىك ينفراقۇرىلىمىن دامىتۋ جونىندەگى شارالار جەتكىلىكسىزدىگىن ەسكەرسەك, اپات كورسەتكىشىنىڭ وسكەنى بايقالادى. 2021 جىلدىڭ ءۇش ايىندا اپات سانى 4 پايىزعا (2 740-تان 2 621-گە دەيىن) جانە زارداپ شەككەندەر سانى 1 پايىزعا (3 634-تەن 3 605-كە دەيىن) تومەندەسە, قازا بولعاندار سانى 12 پايىزعا (325-تەن 363-كە دەيىن) كوبەيگەن», دەدى سەرىك ءتۇسىپوۆ.
سونداي-اق ول وتكەن جىلى پاندەميا كەزىندەگى كارانتين شارالارى, وبلىسارالىق تاسىمالداردى شەكتەۋگە بايلانىستى اپات كورسەتكىشى تومەندەگەنىن مالىمدەدى. جول-كولىك وقيعاسى - 19 پايىزعا, قازا تاپقاندار - 17 پايىزعا جانە جارالانعاندار - 20 پايىزعا ازايعان. ال ەڭ جوعارى كورسەتكىشتەر 2013 جىلى تىركەلگەن. ول كەزدە 23 359 جول اپاتى تىركەلىپ, 3 مىڭنان اسا ادام قازا تاۋىپ, 30 مىڭعا جۋىق ادام جاراقات العان.
ونىڭ ايتۋىنشا, جولدارداعى ءولىم-ءجىتىم جول-كولىك وقيعاسىنىڭ ءۇش نەگىزگى ءتۇرىنىڭ ديناميكاسىنا بايلانىستى. بۇل جاياۋ جۇرگىنشىلەردى سوعۋ, اۋدارىلۋ جانە كولىكتەردىڭ بەتپە-بەت سوقتىعىسۋى. وسى تۇرلەردەگى ءولىم-ءجىتىم بارلىق اپاتتا قازا تاپقانداردىڭ 56 پايىزى بولعان. «ولاردىڭ الدىن الۋ ءۇشىن قورشاۋلار قويىپ, رەتتەلەتىن جەرۇستى جانە جەراستى جاياۋ جۇرگىنشىلەر وتكەلدەرىن ورناتۋ كەرەك», دەدى ول.
