ديرەكتورلار كەڭەسى قازىرگى AIX قارجى ديرەكتورى رەنات بەكتۇروۆتىڭ 2021 جىلعى 24 مامىردا Astana International Exchange باسقارما توراعاسى بولىپ تاعايىندالاتىنىن حابارلادى.
ايتا كەتەيىك, AIX قازىرگى توراعاسى تيم بەننەتت ديرەكتورلار كەڭەسىنىڭ توراعاسى رەتىندە ءۇش جىلدىق مەرزىمگە سايلاندى جانە AIX پەن احقو-نىڭ كاپيتال نارىقتارىن دامىتۋ جونىندەگى اعا كەڭەسشىسى رەتىندە جۇمىسىن جالعاستىرادى.
«تيم بەننەتتىڭ حالىقارالىق تاجىريبەسى مەن كوشباسشىلىق قاسيەتتەرى كاسىپقويلاردىڭ ۇزدىك كومانداسىن جيناۋعا جانە قىسقا مەرزىم ىشىندە شەتەلدىك جانە جەرگىلىكتى ينۆەستورلاردىڭ جوعارى كلاستى ينفراقۇرىلىمى مەن ينتەگراتسيالانعان ەكوجۇيەسى بار الەمدىك دەڭگەيدەگى الاڭ بولىپ ۇلگەرگەن بيرجا قۇرۋعا, بىرنەشە ونداعان ليستينگتەر وتكىزۋگە جانە يننوۆاتسيالىق ونىمدەردى ىسكە قوسۋعا مۇمكىندىك بەردى. ءبىز ت.بەننەتتىڭ كاپيتال نارىعىن دامىتۋ جونىندەگى ءىس-ارەكەتتەرىمىزدى ودان ءارى قولدايتىنىنا سەنەمىز جانە جاس باسقارۋشى رەنات بەكتۇروۆقا AIX-ءتى ودان ءارى دامىتۋ مىندەتىن لايىقتى اتقارۋعا تىلەكتەسپىز. وتكەن جىلى رەنات بەكتۇروۆ پرەزيدەنتتىك جاستار كادر رەزەرۆىنە الىندى, بۇل ونىڭ قازاقستاننىڭ بولاشاق كوشباسشىلارىنىڭ ءبىرى رەتىندەگى الەۋەتىن كورسەتەدى», دەپ پىكىر ءبىلدىردى احقو باسقارۋشىسى قايرات كەلىمبەتوۆ.
سونىمەن بىرگە, AIX ديرەكتورلار كەڭەسىنىڭ توراعاسى نۇرلان قۇسايىنوۆ رەنات بەكتۇروۆتىڭ احقو قۇرىلعان 2016 جىلدان بەرى جۇمىس ىستەيتىنىن جانە 2017 جىلدان بەرى – AIX قارجى ديرەكتورى ەكەنىن اتاپ ءوتتى. نۇرلان قۇسايىنوۆ AIX ديرەكتورى, ديرەكتورلار كەڭەسىنىڭ مۇشەسى بولىپ قالادى.
