ايماقتار • 16 ءساۋىر، 2021

شۋ اۋدانىندا گوللانديالىق كارتوپ وسىرىلەدى

65 رەت كورسەتىلدى

قازىرگى كەزدە شۋ اۋدانىندا كوكتەمگى ەگىس دالا جۇمىستارى باستالىپ كەتتى، دەپ حابارلايدى Egemen.kz.

بۇل رەتتە كۇنى-ءتۇنى تىنباي ەڭبەك ەتەتىن ديقانداردىڭ ەڭبەگى ەرەن. ال، جەردەن مول ءونىم الۋ ءۇشىن تىنىمسىز ەڭبەك قاجەت. وسى ورايدا، شۋ اۋدانىنىڭ اكىمى نۇرجان كالەندەروۆ  ورىنباسارى ءاليحان بالقىبەكوۆپەن بىرگە ايماقتاعى ەگىس القاپتارىن ارالادى. كوكتەمگى ەگىس دالا جۇمىستارىمەن تانىسىپ، جۇمىس باعىتىن كوردى.

اۋدانداعى «Qyzylsha» جاۋاپكەرشىلىگى شەكتەۋلى سەرىكتەستىگى نەگىزىنەن ەگىنشىلىكپەن اينالىسادى. مۇندا بيىل 765 گەكتار جەرگە قانت قىزىلشاسىنىڭ جوعارى سورتى ەگىلەدى دەپ جوسپارلانعان. سونىمەن قاتار، وڭىردە العاش رەت 113 گەكتار جەرگە جوعارى سۇرىپتى گوللانديالىق كارتوپ ءوسىرۋ دە قولعا الىنۋدا. اتالعان ەرەكشە سۇرىپ 55 كۇننىڭ ىشىندە ءونىم بەرە باستايدى ەكەن. ال، سەرىكتەستىك يەلەرى بۇل ونىمگە قازىردىڭ وزىندە سۇرانىس جوعارى ەكەنىن ايتۋدا. سونىمەن قاتار، 667 گەكتار جەرگە جۇگەرى، 600 گەكتار ماقسارى ەگىلەدى. بۇدان بولەك، «Qyzylsha» سەرىكتەستىگى يرريگاتسيا جوباسىن جۇزەگە اسىرۋ اياسىندا 1562 گەكتار اۋماقتى قامتيتىن 25 امەريكاندىق «ۆاللەي» جاڭبىرلاتىپ سۋارۋ قۇرىلعىلارىن دا ورناتۋدا. جالپى، بيىل اۋداندا ەگىستىك كولەمى جىلداعىدان ۇلعايعان. ياعني، اعىمداعى جىلدىڭ ءونىمى ءۇشىن اۋىلشارۋاشىلىعى داقىلدارىنىڭ ەگىس القابىن 137 مىڭ گەكتارعا ورنالاستىرۋ جوسپارلانعان. بۇل وتكەن جىلمەن سالىستىرعاندا 1،8 مىڭ گەكتارعا ارتقان. قازىرگى كەزدە شۋ اۋدانىنىڭ شارۋالارى وسىعان كۇش سالىپ وتىر.

كوكتەمگى ەگىس جۇمىستارىنا 85 مىڭ 850 گەكتار جەر دايىنداۋ جوسپارلانعان. بۇگىندە 54 مىڭ 511 گەكتار جەر ازىرلەنگەن. ونىڭ ىشىندە 22 مىڭ 825 گەكتارعا ارپا داقىلى، 2893 گەكتارعا كوپ جىلدىق شوپتەر، 3498 گەكتارعا كوكونىس داقىلدارى، 4090 گەكتارعا  مايلى داقىلدار، 35 گەكتارعا قانت قىزىلشاسى، 2265 گەكتارعا باقشا داقىلدارى، 124 گەكتارعا كارتوپ جانە 4995 گەكتارعا ءبىر جىلدىق ءشوپ ەگىلگەن. ال، ديقانداردىڭ  جازدىق داقىلدارىنا قاجەتتى 8،1 مىڭ توننا تۇقىم تولىعىمەن دايىن. ونىڭ 5پايىزى ەليتا جانە 7،7 مىڭ تونناسى 3 رەپرودۋكتسيادان تومەن ەمەس. «سونداي-اق، قازىر اۋداننىڭ اۋىلشارۋاشىلىعى القاپتارىنداعى كوكتەمگى دالا جۇمىسىن 963 تەحنيكا اتقارۋدا. ياعني، ديقانداردى قاجەتتى تراكتور مەن قوسالقى تەحنيكامەن قامتۋ دەڭگەيى 100 پايىزعا جەتكەن. «بيىلعى جىلى ەگىس قارقىنى جامان ەمەس. الداعى كۇندەرى اۋا رايى قولايلى بولسا، قوڭىر كۇزدە مول ءونىم الۋعا بولادى. ول ءۇشىن دالاداعى استىقتى كۇتىپ-باپتاۋ شارالارىن وسى باستان ءتيىستى دەڭگەيدە جۇرگىزۋ قاجەت»، دەيدى نۇرجان كالەندەروۆ.

 

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار