ايماقتار • 16 ءساۋىر، 2021

بقو-دا كارانتين تالاپتارىن بۇزعاندارعا 4،2 ملن تەڭگە ايىپپۇل سالىندى

9 رەت كورسەتىلدى

باتىس قازاقستان وبلىسىندا ءساۋىر ايىندا كارانتين تالاپتارىن بۇزعاندارعا 4،2 ملن استام تەڭگە ايىپپۇل سالىندى، دەپ حابارلايدى ەgemen.kz.

بقو سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆتىڭ وڭىرلىك كوممۋنيكاتسيالار قىزمەتى الاڭىندا وتكەن بريفينگىدە ءمالىم ەتكەنىندەي، مونيتورينگتىك توپتار وسى ايدا 365 رەيد جۇرگىزدى.

بارلىعى 2309 نىسان قامتىلدى. 19 نىساندا كارانتين ءتارتىبىن بۇزۋشىلىق انىقتالدى. 57 حاتتاما تولتىرىلىپ، 4 ملن 244،235 مىڭ تەڭگە ايىپپۇل سالىندى.

نۇرلىبەك ەرمەك ۇلىنىڭ سوزىنە قاراعاندا، وڭىردە بيىلعى قاڭتاردا – 1837، اقپاندا – 1950، ناۋرىزدا – 2138، ساۋىردە 1696 ادامنان كوروناۆيرۋس انىقتالدى. ساۋىردە كۆي جۇقتىرعان ناۋقاستارمەن قارىم-قاتىناستا بولعان 3295 ادام انىقتالىپ، مەديتسينالىق باقىلاۋعا الىندى. وتكەن اپتامەن (2-8 ءساۋىر) سالىستىرعاندا، سوڭعى اپتادا (9-15 ءساۋىر) ىندەت جۇقتىرۋ كورسەتكىشى (760-تان 832-گە) 8،6 پايىزعا وسكەن. وسى ايدا اۋىرعانداردىڭ 578-ءى (34 پايىزى) – جۇمىس ىستەيتىندەر، 418-ءى (24،6 پايىزى) – زەينەتكەرلەر، 408-ءى (24 پايىزى) – جۇمىسسىزدار، 129-ى (7،6 پايىزى) – وقۋشىلار، 44-ءى (2،5 پايىزى) – مەديتسينا قىزمەتكەرلەرى، 34-ءى (2 پايىزى) – مۇعالىمدەر. «وقۋ جىلى باستالعاننان بەرى بارلىعى 758 وقۋشىدان كوروناۆيرۋس تابىلدى، سونىڭ 387-ءسى ءداستۇرلى سيپاتتا، 371-ءى قاشىقتان وقيدى. ءتورتىنشى توقساندا (1 ساۋىردەن باستاپ) 129 وقۋشىنىڭ (48-ءى ءداستۇرلى سيپاتتا، 81-ءى قاشىقتان ءبىلىم الادى) سىرقاتتانعانى تىركەلدى»، دەدى ن.مۇستاەۆ.

ءساۋىر ايىنىڭ باسىنان بەرى 14715 ادام مەملەكەتتىك شەكارادان وتسە، سونىڭ 3384-ءى – جولاۋشىلار. انىقتاماسى بولماعان 283 جولاۋشىنىڭ التاۋىنان كوۆيد انىقتالدى. حالىقارالىق جۇك تاسىمالىمەن اينالىساتىن 7508 جۇرگىزۋشىنىڭ 1759-ىندا انىقتاما بولماي شىقتى. ولاردان ىندەت تابىلعان جوق.



سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار