قانات باستاعان قايىرىمدى جىگىتتەر ساي-وتەس اۋىلىندا جاستار ءۇشىن فۋتبول الاڭىن سالىپ بەردى. وسى ەلدى مەكەنگە كىرەبەرىستەگى جولدى 2-3 شاقىرىم شاماسىندا جاماپ-جاسقاپ, حالىق يگىلىگىنە ۇسىندى. ەندى اۋىلداعى جاعدايسىز وتباسىعا شاعىن باسپانا سالىپ بەرۋگە كىرىسىپتى. ولار بىلتىر ىندەت باستالىسىمەن ەل ءۇشىن جۇمىلا ەڭبەك ەتتى. اقتاۋعا بارىپ, وبلىستىق اۋرۋحاناعا وتتەگى باللوندارىن تاسىپ تىنىم كورمەدى.
– سول كەزدە ناۋقاستاردىڭ كوپشىلىگى اۋدانداردان, اۋىلدىق جەرلەردەن كەلىپ جاتقانىن بايقادىق. ولار اۋىلدا نەگە ەمدەلمەيدى دەگەن وي كەلدى. سويتسەك, باللون, وتتەگى جوق ەكەن. دەرەۋ «حالىققا كومەك» شتابىمەن بىرلەسىپ, اۋىلدارعا وتتەگى جەتكىزۋمەن اينالىستىق. ماڭعىستاۋ اۋدانىنىڭ بارلىق اۋىلىنا دەۋگە بولادى, سونداي-اق جاڭاوزەن قالاسى ماڭىنداعى ەلدى مەكەندەرگە اۋا تولتىرىلعان ءبىر وتتەگى باللونى, التى-جەتى اۋا تولتىرىلعان قاپشىق, پۋلسوكسيمەتر جەتكىزىلىپ بەرىلدى جانە ولاردى قاتتى ناۋقاستاردىڭ ۇيلەرىنە اپارىپ بەردىك. كۇنى-ءتۇنى دامىل تاپپاي جۇرگەن اۋىر كۇندەر بولدى ول كەز, – دەيدى قانات راقىم ۇلى.
جاقىندا قانات باستاعان قايىرىمدى جىگىتتەر سايىن شاپاعاتوۆ اۋىلىندا كوپ بالالى وتباسىنىڭ سالىنا باستاعانمەن, اياقتالماي قالعان باسپاناسىنىڭ قۇرىلىسىن اياقتاپ, قىستىڭ سۋىعىندا سىلاعى دا بىتپەگەن ءۇيدى پانالاۋعا ءماجبۇر بولعان جانداردىڭ قولتىعىنان دەمەپ, ءىشى-سىرتى سىڭعىراعان سۋ جاڭا ۇيگە كىرۋىنە سەپ بولدى.
– شۇكىر, جانىما جۇرەگى جۇمساق, جاقسىلىق جاساۋعا قۇشتار جىگىتتەر توپتاستى, – دەگەن قانات دوستارىمەن بىرگە ەل يگىلىگىنە ءالى تالاي شارۋانى اتقاراتىنىنا سەنىمدى.
ماڭعىستاۋ وبلىسى
