رۋحانيات • 16 ءساۋىر، 2021

يشانباي قاراقۇلوۆتى ەستەن شىعارمايىق

52 رەت كورسەتىلدى

بۇل ادامدار ماڭگى وشپەيتىن،

جۇرەك پەنەن كوڭىلدەن.

ءتىرى جۇرسە جول سىلتەر ەدى،

اي، جۇلدىز بوپ كوگىڭنەن.

ولجاس سۇلەيمەنوۆ

 

تاعدىر ماعان حالىققا قادىرلى، ەلگە ەلەۋلى اتاقتى ادامدارمەن تانىس، ءبىلىس قانا ەمەس، دامدەس، سىرلاس بولۋ باقىتىن بۇيىرتتى. سونداي التىنداي از، الماستاي اسىلدىڭ ءبىرى – يشانباي قاراقۇلوۆ ەدى. كەيىنگى جاستار بىلە بەرمەۋى مۇمكىن، اعا ۇرپاقتىڭ جادىندا جاتتالىپ قالعان ازامات ول!

يشانباي اعا قاراقۇلوۆ ورتا بويلى، اقسارى ءوڭدى، قىزىلشىرايلى كىسى بولاتىن. بالالىق شاعى جالشىلىقتا، تۇنگى بوزداق جۇلدىزداي وتكەلدى تۇسى جوقشىلىقتا، ەس ءبىلىپ، ەتەك جيىپ، ازامات بولىپ اتقا مىنگەن، ءىرى قىزمەتكە قولى جەتكەن كەمەڭگەرلىك كەزەڭى قيىنشىلىقتا وتكەن ادامعا ۇقسامايتىن، كوڭىلدى، اسا اقجارقىن ەدى، ءازىل-قالجىڭعا وتە شەبەر، جۇرگەن جەرى كۇلكىگە كومىلىپ، وتىرعان ورنى نۇرعا تولىپ كەتەتىن.

ءومىر مەكتەبىنەن مايىسپاي، تاعدىر سىناعىنان سىنباي كۇرەسكەرلىك مىنەز، قاجىرلى قايرات تانىتقان يشانباي اعا قاراقۇلوۆ ەل نازارىنا ەرتە ىلىكتى، بيلىككە دە تەز تانىلدى. جاس دارىگەر قازاقستان دەنساۋلىق ساقتاۋ حالىق كوميسسارى بولىپ تاعايىندالدى. باس­شىلىق جۇمىستا كىسىلىگى مەن كىشى­لىگىنەن تانباعان ول ودان سوڭ بىرىڭعاي عىلىممەن اينالىستى، ءوز سالاسىندا ماڭىزدى جاڭالىقتار اشتى. عىلىمي ەڭبەكتەر جازدى. شاكىرت تاربيەلەدى.

تالانتتى ادام سان قىرلى. يشان­باي قاراقۇلوۆ سەگىز ەمەس، سەكسەن قىرلى دەسەك جاراسار. ونىڭ ءبارىن تىزبەلەي بەرۋگە جازبامىزدىڭ كولەمى كوتەرمەيدى جانە قاجەت تە ەمەس. باستىلارىن ايتساق – ول ايتۋلى مەملەكەت قايراتكەرى، مينيستر، دەپۋتات بولعان ادام. بۇل – ءبىر. اسىل اعامىزدىڭ ەكىنشى قىرى – قازاق-ءۇندى دوستىق قوعامى سىندى ءبىراز جۇمىستاردى اقىسىز، پۇلسىز، ءمىنسىز اتقارعان كورنەكتى قوعام قايراتكەرى. ءۇشىنشى قىرى – كوپتەگەن اسا قۇندى ەڭبەك جازعان عۇلاما عالىم. ءتور­تىنشى قىرى – شاكىرت تاربيەلەگەن ۇلاعاتتى ۇستاز. بەسىنشى قىرى – ادەبيەت پەن ونەردىڭ بىلگىرى ەستەت قانا ەمەس، ءوزى دە ءار جانردا قالام تەربەگەن جازباگەر. بۇل تۇستا تىلگە تيەك ەتەرىمىز ۇلى ۇستاز مۇقاڭ – مۇحتار اۋەزوۆتىڭ يشانباي اعانىڭ «ۋ يندەيسكيح درۋزەي» ەڭبەگىنە جازعان: «پروفەسسور يشانباي كاراكۋلوۆ، بۋدۋچي ۆ يندي، منوگو ۆيدەل، منوگو سۋمەل پودمەتيت ۆنيماتەلنىم گلازوم ۆزىسكاتەلنوگو درۋگا. وب ەتوم ون راسسكازىۆاەت ۆ سۆوەي كنيگە جيۆو ي ۋۆلەكاتەلنو» دەگەن العىسوزى جانە «سىرلاسۋ» اتتى «قىرىق سۇراعىنا» جاتىق تىلمەن جاۋاپ بەرگەن «جاس تا، جاسامىس ءۇشىن دە تاربيەلىك ءمانى زور» كىتابىنا: كىر­پياز تالانت عابيت مۇسىرەپوۆتىڭ: «ومىر­دە بار نارسەنى ايتپاي جاسىرىپ، ونى ۇنەمى جاتسىنا بەرۋىمىز، شىنىنا كەلسەك، ارتىق تا، اعات ءىس» دەي كەلىپ وسى ەلەۋ­لى ەڭبەكتى جوعارى باعالاعانى دالەل.

ءتۇيىپ ايتساق، كورنەكتى مەملەكەت جانە قوعام قايراتكەرى، عۇلاما عالىم، ۇلا­عاتتى ۇستاز، اكادەميك، پروفەسسور يشان­باي قاراقۇلوۆ سان قىرلى تالانتىمەن حالىق ءۇشىن قالتقىسىز جۇ­مىس ىستەپ، ەلگە ەڭبەگى سىڭگەن تۇعىرى بيىك تۇلعا.

ەل تاريحىنان ويىپ تۇرىپ ءوز ورنىن العان كورنەكتى مەملەكەت قايرات­كەرى ومىردەن وزعالى وتىز جىلدان اسىپ بارادى. ايتسە دە ءالى كۇنگە دەيىن ونىڭ اتىندا نە ءبىر كوشە، نە ءبىر مەكتەپ، وزگەدەي دە ەش بەلگى جوق.

يشانباي قاراقۇلوۆتى نەگە ۇمىت­­ت­ىق؟.. وسىنداي تۇلعالى تۇلعانى ۇمى­تۋعا بولا ما؟ ونى ۇمىتپايىق، ەڭبەگىنە وراي قۇرمەتتەيىك. كوشە، مەكتەپ، جوعارى وقۋ ورىندارىنا اتىن بەرىپ، الماتىدا ەڭسەلى ەسكەرتكىش ورنا­تايىق!

يشانباي قاراقۇلوۆتى ۇمىتۋ – باسشىلارعا سىن، ازاماتتىعىمىزعا ءمىن ەمەس پە؟

 

ءسابيت دوسانوۆ،

جازۋشى، مەملەكەتتىك سىيلىقتىڭ لاۋرەاتى،  ماحمۇد قاشقاري اتىنداعى حالىقارالىق سىيلىقتىڭ يەگەرى

 

سوڭعى جاڭالىقتار

ارداگەرلەر ازايىپ بارا جاتىر...

قازاقستان • بۇگىن، 19:00

مەرەكە كۇندەر جاڭبىرلى بولادى

اۋا رايى • بۇگىن، 16:00

فۋتبول: «چەلسي» فينالعا شىقتى

فۋتبول • بۇگىن، 15:01

اممانعا اتتاندى

سپورت • بۇگىن، 14:10

قازاندا كۇش سىناسۋدا

سپورت • بۇگىن، 13:40

شەت ەلدەگى قازاق گەنەرالدارى

قازاقستان • بۇگىن، 11:54

قادىر ءتۇنىنىڭ قاسيەتى

رۋحانيات • بۇگىن، 08:10

ەرلىك پەن پاتريوتيزم مەكتەبى

قازاقستان • بۇگىن، 08:06

قارۋلى كۇشتەرىمىز وسىلاي قۇرىلعان

قازاقستان • بۇگىن، 08:05

ۇقساس جاڭالىقتار