نۇر-سۇلتاندا مۇمكىندىگى شەكتەۋلى جاندارعا ارنالعان مامانداندىرىلعان پاراليمپيادالىق جاتتىعۋ ورتالىعى جۇمىس ىستەيدى. قازىرگى ۋاقىتتا ول جەردە سپورتتىڭ 17 ءتۇرى بويىنشا جاتتىعۋلار وتكىزىلەدى, دەپ حابارلايدى قالا اكىمدىگىنىڭ رەسمي سايتى.
«حالىقارالىق دەڭگەيدەگى مامانداندىرىلعان پاراليمپيادالىق جاتتىعۋ ورتالىعى 2018 جىلى اشىلدى. بۇگىنگى تاڭدا بىزدە سپورتتىڭ 17 ءتۇرى دامىعان. ولاردىڭ ءبارى ەرەكشە فيزيكالىق قاجەتتىلىكتەرى بار ادامدار ءۇشىن اقىسىز جۇرگىزىلەدى. ءبىزدىڭ ورتالىققا كۇن سايىن 150-گە جۋىق ادام كەلەدى. مۇندا 3 نەگىزگى زال بار – جاتتىعۋ, ويىن جانە جەكپە-جەك زالى. سونداي-اق, كەلۋشىلەرگە ساۋنا جانە ماسساج قىزمەتتەرى قاراستىرىلعان. ورتالىق ۇسىناتىن بارلىق قىزمەت ەرەكشە فيزيكالىق قاجەتتىلىكتەرى بار ادامدار ءۇشىن تەگىن كورسەتىلەدى», دەدى "كاسپي" سپورتتى دامىتۋ قورىنىڭ اتقارۋشى ديرەكتورى ابدۋسايد نازاروۆ.
ورتالىقتا ۇستەل تەننيسى, پارا دزيۋدو, پارا كاراتە, پارا تاەكۆوندو, يوگا, شاحمات, دويبى, توعىزقۇمالاق, بوچچا, گولبول, پارا بادمينتون, وتىرىپ ويناۋ ۆولەيبولى, دارتس, پارا پاۋەرليفتينگ, پارا چەرليدينگ, پارا گرەپپلينگ جانە پارا ارمرەستلينگ سياقتى سپورت تۇرلەرى بويىنشا جاتتىعۋلار وتكىزىلەدى.
عيماراتتىڭ جالپى اۋدانى 4 682,70 ش.م. قازىرگى ۋاقىتتا ورتالىق ايىنا 3 400-دەن استام ادامدى قابىلدايدى.
«مەن ورتالىققا 2018 جىلى اشىلعاننان بەرى كەلىپ ءجۇرمىن. بۇل ءبىز ءۇشىن, ياعني مۇمكىندىگى شەكتەۋلى جاندار ءۇشىن وتە ىڭعايلى. مۇندا بارلىعى قاراستىرىلعان, كيىم شەشەتىن بولمەلەر كەڭ, سول سياقتى جۋىناتىن بولمەلەرى دە قاراستىرىلعان. وسىنداي ورتالىق اشقانىنا العىسىم شەكسىز», دەپ اتاپ ءوتتى ورتالىققا كەلۋشى اسقاربەك بولەگەنوۆ.
پاراليمپيادالىق جاتتىعۋ ورتالىعىنىڭ جۇمىسى تۋرالى قوسىمشا اقپاراتتى 790-444 تەلەفون ءنومىرى ارقىلى الۋعا بولادى.
