اتالعان ەلدى مەكەن وبلىس ورتالىعىنان 255 شاقىرىم شالعايدا ورنالاسقانىن ەسكەرسەك, اۋىل حالقى ۇزاق جىلدان بەرى ساپالى ينتەرنەتتەن تارشىلىق كورىپ كەلدى. ۇلتتىق وپەراتوردىڭ اقپاراتىنا سۇيەنسەك, العاش رەت جارلىعا ينتەرنەت 2015 جىلى EV-DO تەحنولوگياسى ارقىلى تارتىلعان ەدى. الايدا ونىڭ جىلدامدىعى 512 كيلوبيت سەكۋندتان ارى اسپاي, ونى تەك 1189 اۋىل تۇرعىنىنىڭ 12-ءسى عانا پايدالانعان.
«بۇگىندە EV-DO تەحنولوگياسى ەسكىرگەن, ال ونىڭ كوپتەگەن بولشەگى قازىر شىعارىلمايدى. ينتەرنەت جىلدامدىعىنىڭ تومەندىگىنە قاراماستان, بۇل قىزمەتكە اۋىل تۇرعىندارىنىڭ سۇرانىسى جوعارى ەدى. سول سەبەپتى اۋىلداعى ينتەرنەتكە قاتىستى ماسەلەنى رەتتەۋ ءۇشىن وڭتايلى شەشىم قابىلداۋ كەرەك بولدى», دەدى «قازاقتەلەكوم» اق ورتالىق ءوتد ۆ2س سەگمەنتىنىڭ كوممەرتسيالىق ديرەكتورى دامير سەيسەنبەكوۆ.
بىلتىر ۇلتتىق بايلانىس وپەراتورىنىڭ فيليالى جارلى ەلدى مەكەنىن راديوكوپىر تەحنولوگياسى ارقىلى 12 مبيت/س دەيىنگى جىلدامدىقتى ينتەرنەتپەن قامتاماسىز ەتۋ جونىندە تەحنيكالىق شەشىم ازىرلەپ, قازىر «قازاقتەلەكوم» العاشقى 100 ابونەنتتى ساپالى ينتەرنەتكە قوسىپ ۇلگەردى. ناتيجەسىندە حالىق بارلىق زاماناۋي تەلەكوممۋنيكاتسيا قىزمەتىن, ونىڭ ىشىندە ونلاين ساباق, بەينەقوڭىراۋ جانە باسقا دا قىزمەت تۇرلەرىن پايدالانۋ مۇمكىندىگىن الدى.
«بۇرىن تەك حابارلاما عانا جولداي الاتىنبىز. فوتو جانە بەينەروليكتەردى جۇكتەۋ قيىنعا سوعاتىن. تاياۋدا «قازاقتەلەكومنىڭ» قىزمەتىن قوستىق, سول ارقىلى الەۋمەتتىك جەلىلەردى پايدالانۋدى ۇيرەندىم. قازىر Telegram نەمەسە Zoom ارقىلى قازاقتىڭ ۇلتتىق قول ونەرى بويىنشا شەبەرلىك ساباقتارىن كورىپ ءجۇرمىن. سۇيىكتى ءىسىم تابىس اكەلەتىن بولسا, بۇل مەن ءۇشىن باقىت», دەدى جارلى اۋىلىنىڭ تۇرعىنى كۇلجان الداشەۆا.
سونىمەن قاتار اۋداندىق اكىمدىكتەردىڭ قولداۋىمەن قاراعاندى وبلىسىنىڭ 30 اۋىلىنا جوعارى جىلدامدىقتى ءموبيلدى ينتەرنەتتى پايدالانۋعا مۇمكىندىك بەرەتىن قوندىرعى ورناتىلدى. بۇل رەتتە اتالعان ءوڭىردىڭ ەلدى مەكەندەرىنە جوعارى جىلدامدىقتى ينتەرنەتتى تارتۋعا اۋىلدىق ەلدى مەكەندەرگە تالشىقتى-وپتيكالىق بايلانىس جەلىسىنىڭ (اەم توبج) قۇرىلىسىنا بايلانىستى جالپىۇلتتىق جوبا سەپتىگىن تيگىزگەنىن ايتا كەتكەن ورىندى. وسى جوبا ءوڭىردىڭ 36 اۋىلىنداعى 120-دان استام مەملەكەتتىك مەكەمەنى (اكىمدىكتەر, مەكتەپتەر, اۋرۋحانالار, پوليتسيا بولىمشەلەرى) 10-نان باستاپ 100 مبيت/س دەيىنگى جىلدامدىقتاعى ينتەرنەتپەن قامتاماسىز ەتۋگە مۇمكىندىك بەردى. اتالعان ەلدى مەكەندەردەگى ءۇي شارۋاشىلىقتارىنىڭ تەلەكوممۋنيكاتسيا قىزمەتتەرىنە قوسىلۋ سانى 4 مىڭعا دەيىن وسكەن.
«اەم توبج», «250+» GPON تەحنولوگياسى, راديوقوسىلۋ جوبالارى ارقىلى قالالار مەن اۋىلدار اراسىنداعى تسيفرلى تەڭسىزدىكتى جويۋ باعىتىنداعى باستى مىندەتتى شەشىپ كەلەمىز. ەندى جارلى اۋىلىنىڭ تۇرعىندارىنا دا ءىرى قالالارداعى سەكىلدى تەلەكوممۋنيكاتسيا قىزمەتتەرى قولجەتىمدى. حالىققا انىقتاما جانە باسقا دا قۇجاتتار الۋ ءۇشىن اۋدان ورتالىعىنا بارۋدىڭ قاجەتى جوق. ونىڭ بارلىعىن قاشىقتان الۋعا مۇمكىندىكتەرى بار», دەدى د.سەيسەنبەكوۆ.
قۇرىلعان جەلىلىك ينفراقۇرىلىمنىڭ نەگىزىندە ءموبيلدى وپەراتورلار, «250+» جوباسى اياسىندا قاراعاندى وبلىسىنداعى 85 اۋىلدى كەڭ جولاقتى ءموبيلدى ينتەرنەتكە قوستى. ال FTTH جانە GPON تەحنولوگياسى ارقىلى قاراعاندى, جەزقازعان, بالقاش, شاحتينسك, تەمىرتاۋ قالالارى مەن وساكاروۆ كەنتىنىڭ 50 مىڭنان استام تۇرعىنى تسيفرلى ينفراقۇرىلىمعا قول جەتكىزدى. وبلىستىڭ تاعى ەكى قالاسىندا, اتاپ ايتقاندا, ساران جانە ابايدا جاڭا جەلىمەن 508 كوپ پاتەرلى ءۇيدى قامتۋ جوسپارلانىپ وتىر.
