بارلىق قارسىلاسىن قاپى قالدىرىپ, اقتىق سىنعا دەيىن القىنباي جەتكەن سۇلتان اسەت ۇلى مەن ءالىمحان سىزدىقوۆ باس جۇلدە ءۇشىن تالاستى. 63 كيلو سالماقتاعى اسەت ۇلى وسىعان دەيىن تايپەيلىك چجۋ چي حۋان جانە سيريالىق مۇحاممەد فۋازدىتىرپ ەتكىزبەي جەڭگەن بولاتىن. فينالدا ول يراندىق مەيسام دالحانيمەن كۇش سىناستى. تارازى باسى ۇزاق ۋاقىت بويى تەڭسەلىپ تۇرعان باسەكەنىڭ تاعدىرى ەكىنشى كەزەڭىنىڭ بەل ورتاسىندا شەشىلدى. قارسىلاسىن جامباسقا سالعان سۇلتان ايقىن جەڭىسكە قول جەتكىزىپ, ازيا چەمپيونى اتاندى.
130 كيلو سالماقتاعى ءالىمحان سىزدىقوۆ باستاپقى باسەكەلەردە جاپونيالىق سوتا ناكامۋرا مەن مينجون كيمدى قاپى قالدىردى. اقتىق سىندا قازاقتىڭ نار تۇلعالى بالۋانى يراننىڭ الىبى الياقپار يۋسۋپاحمادچاليمەن ايقاستى. بۇل تارتىستا پارسى ەلى وكىلىنىڭ مەرەيى ۇستەم بولدى. ءالىمحان كۇمىس مەدالدى موينىنا ءىلدى.
ال 77 كيلو سالماقتاعى دەمەۋ جادىراەۆ پەن 87 كيلو سالماقتاعى نۇرسۇلتان تۇرسىنوۆ قولا مەدال ءۇشىن سايىسقا ءتۇستى. دەمەۋ تۇركىمەنستاندىق مۇحاممەدبەردى مامەدوۆتى ۇتسا, نۇرسۇلتان وزبەكستاندىق رۋسلان اسساقالوۆپەن تەڭ ءتۇستى. ال كۇرەستىڭ ەرەجەسى بويىنشا سوڭعى ءادىستى كىم جاساسا,جەڭىس سونىڭ ەنشىسىنە جازىلادى. بۇل رەتتە اسساقالوۆتىڭ اسىعى الشىسىنان ءتۇسىپ, تۇرسىنوۆ جەڭىس تۇعىرىنا كوتەرىلە المادى.
