ۇلتتىق ەكونوميكا ءمينيسترىنىڭ ورىنباسارى الىشەر ابدىقادىروۆ وسىنداي مالىمەت ايتتى.
«مەملەكەت باسشىسى قاسىم-جومارت توقاەۆتىڭ 7-ءشى شاقىرىلعان پارلامەنتتىڭ 1-ءشى سەسسياسىنىڭ اشىلۋىندا بەرگەن تاپسىرماسى بويىنشا زاڭ جوباسىندا ساياسي پارتيالاردىڭ پارلامەنت ماجىلىسىنە سايلاۋ كەزىندە تىركەۋدەن ءوتۋ شەگىن 7-دەن 5 پايىزعا ءتۇسىرۋ كوزدەلگەن. سونداي-اق, سايلاۋ بيۋللەتەندەرىنە «بارىنە قارسىمىن» دەگەن جازۋ ەنگىزۋ قاراستىرىلعان», دەدى ۆەدومستۆو وكىلى.
الىشەر ابدىقادىروۆتىڭ سوزىنشە, بۇل نورمالار تىركەلگەن پارتيالاردى الداعى سايلاۋلارعا قاتىسۋعا زاڭنامالىق تۇرعىدا ىنتالاندىرىپ, ەلدەگى ساياسي باسكەلەستىكتى دامىتۋعا, سايلاۋدىڭ بارلىق دەڭگەيىندە حالىقتىڭ بارشا كانديداتقا قارسىلىعىن ءبىلدىرۋ قۇقىعىن قامتاماسىز ەتۋگە مۇمكىندىك بەرەدى.
«بۇل زاڭ جوباسى ازاماتتاردىڭ وزدەرىنىڭ كونستيتۋتسيالىق قۇقىقتارىن تولىققاندى ىسكە اسىرۋعا, جەرگىلىكتى مەملەكەتتىك ورگانداردىڭ حالىقتىڭ مۇتاجدىعى مەن پروبلەمالارىنا قۇلاق اسۋىن كۇشەيتۋگە جانە «ەستيتىن مەملەكەت» تۇجىرىمداماسىن تولىق كولەمدە ىسكە اسىرۋعا مۇمكىندىك دەپ توپشىلايمىز», دەدى الىشەر ابدىقادىروۆ.
بۇعان دەيىن حابارلاعانىمىزداي, ماجىلىستە سايلاۋ تۋرالى زاڭناماعا ەنگىزىلەتىن تۇزەتۋلەر تانىستىرىلىپ جاتىر. زاڭ جوباسى بويىنشا, اكىمدەر سايلاۋىن العاشقى ەكى جىلدا وسك قارجىلاندىرادى.
