جالپى, امەريكانىڭ ەڭ تانىمال وقۋ ورىنىنىڭ بىرىنە ءتۇسۋ – سەزىم ءۇشىن كەزدەيسوق جەتىستىك ەمەس. جاس دارىن بۇل تابىسقا تالماي ىزدەنۋ مەن قاجىرلى ەڭبەكتىڭ ناتيجەسىندە جەتتى. وسى مەكتەپتەگى جوعارى وقۋ جەتىستىكتىگى, كوشباسشىلىق قاسيەتتى جانە عىلىمعا دەگەن قۇشتارلىعى قازاق بالاسىنا باسەكەگە قابىلەتتى ءبىلىمنىڭ قاقپاسىن اشقانداي. ويتكەنى, گارۆارد – جوعارى ءبىلىم بەرۋ ستاندارتتارى بويىنشا اقش قانا ەمەس, دۇنيەجۇزىنە تانىمال ەليتالىق ۋنيۆەرسيتەتىڭ ءبىرى. ال تالدىقورعاندىق سەزىم ەرتاڭاتوۆ ەندى وسى ۋنيۆەرسيتتەتىڭ كومپيۋتەرلىك عىلىمدار بولىمىنە ءتۇسىپ, باكالاۆريات باعدارلاماسى بويىنشا وقىماقشى.
– مەنى ارقاشان اقپاراتتىق تەحنولوگيالاردىڭ تەوريالىق جانە ماتەماتيكالىق تۇرعىدان قالاي جۇمىس جاسايتىنى قىزىقتىرادى. قازىرگى ۋاقىتتا مەن Java, C++, PHP سياقتى باعدارلامالاۋ ءتىلىن ۇيرەندىم. ءوزىم, سونداي-اق ءتۇرلى ۆەب-سايتتاردى جاساعاندى, دەرەكتى فيلمدەر تۇسىرگەندى جانە باعدارلامالاردى رەداكتسيالاعاندى ۇناتامىن, – دەيدى بولاشاق ستۋدەنت.
ونىڭ ۇستازى, تالدىقورعان قالاسىنداعى نازارباەۆ زياتكەرلىك مەكتەبى ماتەماتيكا ءپانىنىڭ مۇعالىمى زۋحرا داۋتوۆا سەزىمنىڭ بولاشاقتا الەمدى اۋزىنا قاراتاتىن تابىستى مامان بولۋىنا تولىق مۇمكىندىگى بار دەگەن پىكىردە.
– سەزىمنىڭ تاپقىرلىعى تەك ماتەماتيكا ساباعىندا عانا ەمەس, جالپى مەكتەپتىڭ ءوزىن-ءوزى باسقارۋ باعىتىندا دا ەرەكشەلەنىپ كورىندى. مەكتەپ قابىرعاسىندا سەزىم بىرقاتار ەرىكتىلەر قوزعالىسىن ۇيىمداستىردى, كاسىپتىك باعدارلاۋ كوميتەتىن اشتى جانە بۇۇ مودەلى ويىنى بويىنشا قالالىق كونفەرەنتسيا ۇيىمداستىردى. سونىمەن بىرگە ول ينفورماتيكا جانە قازاق ءتىلى پاندەرىنەن «جاس عالىم», «دارابوز» اتتى حالىقارالىق, رەسپۋبليكالىق وليمپيادالاردنىڭ جۇلدەگەرى جانە جەڭىمپازى اتاندى, – دەيدى ۇستاز زۋحرا داۋتوۆا.
ايتپاقشى, سەزىم ەرتاڭاتوۆ تالدىقورعان قالاسىنداعى نازارباەۆ زياتكەرلىك مەكتەبىندە وقىپ ءجۇرىپ, گارۆارد ۋنيۆەرسيتەتىنىڭ گارنتىن جەڭىپ العان ەكىنشى تۇلەك ەكەن. بۇعان دەيىن وسى مەكتەپتىڭ تاعى ءبىر وقۋىشىسى امەريكادان شاقىرتۋ الىپ, قازىر سول ەلدە ءبىلىمىن جەتىلدىرىپ جاتىر.
