ۇكىمەت • 12 ءساۋىر، 2021

ا. مامين ۆاكتسينالاۋ كەستەسىنىڭ ورىندالۋىن قامتاماسىز ەتۋدى تاپسىردى

47 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق احۋال قارالدى، دەپ حابارلايدى ەgemen.kz.

قازىرگى جاعداي، حالىقتى ۆاكتسينالاۋ بارىسى جانە مەملەكەت باسشىسى قاسىم-جومارت توقاەۆتىڭ بەرگەن تاپسىرمالارىن ورىنداۋ اياسىندا قابىلدانىپ جاتقان شارالار تۋرالى دەنساۋلىق ساقتاۋ ءمينيسترى الەكسەي تسوي، الماتى وبلىسىنىڭ اكىمى اماندىق باتالوۆ، اقتوبە وبلىسىنىڭ اكىمى وڭداسىن ورازالين، اقمولا وبلىسىنىڭ اكىمى ەرمەك مارجىقپاەۆ باياندادى.

رەسپۋبليكا بويىنشا ۆيرۋستىڭ رەپرودۋكتيۆتىك كورسەتكىشى 1،15 قۇرايدى. ينفەكتسيالىق توسەك ورىندارىنىڭ جۇكتەمەسى 41%، رەانيماتسيالىق توسەك ورىندارى – 27% قۇرايدى. قازىرگى ۋاقىتتا Covid-19 تارالۋ قارقىنى بويىنشا نۇر-سۇلتان جانە الماتى قالالارى، باتىس قازاقستان، الماتى، اتىراۋ، اقتوبە، اقمولا جانە قاراعاندى وبلىستارى «قىزىل ايماقتا» تۇر. شىعىس قازاقستان جانە تۇركىستان وبلىستارىن قوسپاعاندا، قالعان بارلىق وڭىرلەر – «سارى ايماقتا».

«مەملەكەت باسشىسى قاسىم-جومارت كەمەل ۇلى توقاەۆ سانيتارلىق-ەپيدەميولوگيالىق جاعدايدى تۇراقتاندىرۋ جانە ۆاكتسينا الاتىنداردىڭ سانىن ارتتىرۋ بويىنشا الدىمىزعا ناقتى مىندەت قويدى»، دەدى ا. مامين.

پرەمەر-مينيستر اكىمدەرگە ەپيدەميولوگيالىق جاعدايعا بايلانىستى جەدەل شەكتەۋ شارالارىن قابىلداۋدى، بارلىق ەمدەۋ مەكەمەلەرىن ءدارى-دارمەكتەر مەن مەديتسينالىق بۇيىمداردىڭ قاجەتتى كولەمىمەن تولىق قامتاماسىز ەتۋدى، سانيتارلىق نورمالار مەن ماسكا تاعۋ رەجيمىن ساقتاۋدى كۇشەيتۋدى تاپسىردى.

دەنساۋلىق ساقتاۋ مينيسترلىگى مەن اكىمدىكتەرگە توسەك ورىن قورىنىڭ تولىق دايىندىعىن قامتاماسىز ەتۋ، سونداي-اق قوعامدىق ورىنداردى، ونىڭ ىشىندە ساۋدا ورتالىقتارىن پايدالانا وتىرىپ ۆاكتسينالاۋدىڭ قولجەتىمدىلىگىن قامتاماسىز ەتۋ تاپسىرىلدى.

سوڭعى جاڭالىقتار

ۇقساس جاڭالىقتار