پاندەميانىڭ پايدالى تۇسى – حالىقتىڭ تسيفرلى ساۋاتتىلىعىنىڭ ارتقانىندا جاتىر. ايتپەسە قولدارىندا قاجەتتى گادجەتى مەن تەلەفونى بولسا دا كوپشىلىك وزىنە قاجەتتى قىزمەتتى بۇرىننان ۇيرەنگەن حالىققا قىزمەت كورسەتۋ ورتالىعىنا بارىپ العاندى ءتاۋىر كورەتىن. كوروناۆيرۋس باستالىپ, جۇرتشىلىق ۇيدەن ۇزاي الماي قالعاندا امالسىز ونلاين قىزمەت الۋعا كوشە باستادى. ازاماتتارعا ارنالعان ۇكىمەت تە قاراپ قالماي, قىزمەتكەرلەرىن قايتا دايارلاۋدان وتكىزە باستادى.
كورپوراتسيانىڭ باسقارما توراعاسى ءادىل قوجىقوۆتىڭ ايتۋىنشا, جۇرتشىلىققا كەڭەس بەرىپ, كومەك كورسەتۋ ءۇشىن 2 مىڭعا جۋىق وپەراتور قايتا دايارلاۋدان ءوتىپ, 250 مامان پورتالدا ۆيرتۋالدى كەڭەسشى قىزمەتىن اتقارعان. سول كەزدە ماماندار 13,9 ملن اۋديوقوڭىراۋ جانە 8,8 ملن بەينەقوڭىراۋ قابىلداپ, تۇرعىندارعا قىزمەتتەردى ونلاين الۋ جونىندە قولداۋ كورسەتكەن ەكەن.
حالىقتىڭ تسيفرلى ساۋاتتىلىعىن كوتەرۋگە باعىتتالعان ءىس-شارالاردىڭ ناتيجەسىندە بىلتىر ءموبيلدى ازاماتتار بازاسىنا – 9,5 ملن, EGOV Mobile قوسىمشاسىنا 1,1 ملن ادام تىركەلىپتى. حقو-داعى وزىنە-ءوزى قىزمەت كورسەتۋ سەكتورلارىندا 16 ملن ازامات ونلاين قىزمەتتەر بويىنشا كەڭەس الىپ, پورتالدى قولدانۋعا ماشىقتانعان. تسيفرلىق ورتالىقتارداعى ارنايى اشىلعان كۋرستاردا 800 مىڭنان استام ادام ءدارىس العان.
«الەۋمەتتىك جانە زەينەتاقىمەن قامسىزداندىرۋ سالاسىندا تولەمدەردىڭ 44 ساناتى بويىنشا 15 مەملەكەتتىك قىزمەت ۇسىناتىن الەۋمەتتىك بلوكتىڭ دا جۇكتەمەسى سول كەزدە ەسەلەنە ءتۇستى. بۇل باعىتتا بىلتىر 1,6 ملن قىزمەت كورسەتىلسە, «1411» بايلانىس ورتالىعى ارقىلى 1,2 ملن اقپاراتتىق تۇرعىدا كەڭەس بەرىلگەن. كورپوراتسيانىڭ دەرەگى بويىنشا كارانتين كەزىندە تاعايىندالعان 42 500 تەڭگەگە بايلانىستى 12,3 ملن تولەم, زەينەتاقى مەن جاردەماقىلارعا قاتىستى 6,2 ملن تولەم قايتا ەسەپتەلگەن. سونداي-اق پرواكتيۆتى تۇردە – 162 مىڭ, كومپوزيتتى – 115 مىڭ, «ەلەكتروندىق ۇكىمەت» پورتالى ارقىلى 224 مىڭ تولەم تاعايىندالعان. جالپى, بۇل سالاداعى قارجى اعىنى 5 787,3 ملرد تەڭگەنى قۇراپتى.
ىندەت كەزىندە ونلاين كورسەتىلەتىن قىزمەتتىڭ سانى دا ارتقانىن بايقاۋعا بولادى. مىسالى, جەر قاتىناستارىنا بايلانىستى قىزمەت تۇرلەرى ونلاين رەجىمگە اۋىستىرىلعان, مەملەكەتتىك قىزمەت كورسەتۋ ۇردىسىنە Blockchain تەحنولوگياسى ەنگىزىلگەن جانە بىرىڭعاي مەملەكەتتىك جىلجىمايتىن م ۇلىك كاداسترى قاناتقاقتى جوباسى اياسىندا جەر ۋچاسكەسى العاش رەت ونلاين ساتىلا باستاعان. سونىمەن قاتار كولىكتىڭ تەحنيكالىق پاسپورتى مەن مەملەكەتتىك تىركەۋ ءنومىرى بەلگىسىن ۇيگە جەتكىزۋ, جەكە مەنەدجەر قىزمەتىن پايدالانۋ, QR-كود ارقىلى تولەم جاساۋ سەرۆيستەرى دە جۇزەگە اسقانىن اتاپ وتكەن ءجون. بىلتىرعى قورىتىندى بويىنشا ازاماتتارعا ارنالعان ۇكىمەت بارلىعى 41,7 ملن قىزمەت كورسەتكەن. سونىڭ ىشىندە جىلجىمايتىن م ۇلىك سالاسى بويىنشا − 2,5 ملن, الەۋمەتتىك قامسىزداندىرۋ سالاسىندا – 1,6 ملن, جەر كاداسترى بويىنشا – 379 مىڭ قىزمەت. كارانتين جىلىندا ازاماتتاردان كەلىپ تۇسكەن اۋديو-بەينەقوڭىراۋلاردىڭ سانى 23,9 ملن بولسا, سونىڭ 1,2 ملن-ى «1411» بايلانىس ورتالىعىنا كەلىپ تۇسكەن.
جالپى, تسيفرلاندىرۋ – وزىق تەحنولوگيانى پايدالانا وتىرىپ وزۋ, حالىققا كورسەتىلەتىن مەملەكەتتىك قىزمەتتەردەگى اكىمشىلىك كەدەرگىلەردى ازايتۋ. كەزىندە حالىق ءبىر جاپىراق قاعاز الۋ ءۇشىن بىرنەشە مەكەمەنىڭ تابالدىرىعىن توزدىراتىن. ال قازىر بۇل سالاداعى كەمشىلىك ەداۋىر تۇزەلىپ كەلەدى. ەلدىڭ دە ارتىق ءجۇرىسى ازايدى. ماسەلەن, «ازاماتتارعا ارنالعان ۇكىمەت» مەملەكەتتىك كورپوراتسياسى ءتورت مەكەمەنىڭ – «حالىققا قىزمەت كورسەتۋ ورتالىعى», «زەينەتاقى تولەۋ جونىندەگى مەملەكەتتىك ورتالىق», «جىلجىمايتىن م ۇلىك ورتالىعى» مەن «جەر كاداسترى عىلىمي-وندىرىستىك ورتالىعىنىڭ» نەگىزىندە قۇرىلدى. دەمەك ءتورت مەكەمەنىڭ جۇمىسى ءبىر كورپوراتسياعا توپتاستى دەگەن ءسوز.
كورپوراتسيا قۇرىلعان بەس جىلدىڭ ىشىندە ءبىراز مەملەكەتتىك قىزمەت ەلەكتروندى فورماتقا كوشتى. ايتالىق, مەملەكەتتىك قىزمەتتەردى كورسەتۋ تيىمدىلىگىن ارتتىرۋ ماقساتىندا بىرقاتار جوبالار, سونىڭ ىشىندە جىلجىمايتىن م ۇلىكتى تەحنيكالىق تەكسەرۋ راسىمدەرىن جەڭىلدەتۋ, جەر ۋچاسكەلەرىنىڭ كاداسترلىق قۇنىن ايقىنداۋ مەن كولىككە تەحنيكالىق پاسپورت الۋ ۋاقىتىن قىسقارتۋ, بالا تۋعا بايلانىستى ءتورت بىردەي قىزمەتتى پەرزەنتحانادا راسىمدەۋ سياقتى جوبالار ەنگىزىلدى. سونداي-اق «ازاماتتارعا ارنالعان ۇكىمەت» مەملەكەتتىك كورپوراتسياسىندا ەلىمىزدىڭ وسىمدىكتەر الەمىن زەرتتەيتىن بىرىڭعاي گەرباري قورى قۇرىلدى.
تسيفرلاندىرۋدىڭ ەل دامۋىندا پايداسى كوپ. سوندىقتان ازاماتتاردىڭ وزدەرى دە بۇرىنعى بولمىستان ارىلىپ, مەملەكەتتىك قىزمەتتەردى ونلاين الۋعا داعدىلانۋى كەرەك. مەملەكەتتىك قىزمەتتەردى ەلەكتروندى فورماتقا كوشىرۋ باعىتىندا ازاماتقا ارنالعان ۇكىمەتتىڭ دە ءوز جوسپارى بار.
«كۇن تارتىبىندە تۇرعان ماسەلەلەر كوپ. اتاپ ايتقاندا, بىرقاتار الەۋمەتتىك قىزمەتتى وڭتايلاندىرىپ, ونداعى قىزمەتتى اۆتوماتتى جۇيەگە اۋىستىرۋ, حقو-داعى سەرۆيس ساپاسىن كوتەرىپ, قىزمەت كورسەتۋدىڭ جاڭا فورماتىن ەنگىزۋ, جۇرتشىلىقتىڭ ارىز-شاعىمىنا دەر كەزىندە كوڭىل اۋدارىپ, دەرەۋ شەشىم قابىلداۋ سىندى ماسەلەلەردى شەشۋدى قاراستىرىپ وتىرمىز», دەيدى ءا.قوجىقوۆ. ول سونداي-اق ساراپتاما جاساي الاتىن Support-قىزمەتىن ىسكە قوسۋ, مامانداندىرىلعان حقو-لاردى ترانسفورماتسيالاۋ, باسەكەگە قابىلەتتى كادرلىق رەزەرۆتى جاساقتاۋ ءتارىزدى جۇمىستار دا كوپ ۇزاماي ىسكە قوسىلاتىنىن جەتكىزدى.
