قازاقستان ءۇشىن چەحيا شىعىس جانە ورتالىق ەۋروپا نارىقتارىنا شىعۋعا مۇمكىندىك بەرەتىن ماڭىزدى حاب رەتىندە قاراستىرىلادى. ماسەلەن, QazTrade-ءتىڭ باعالاۋىنا سايكەس, چەحيا رەسپۋبليكاسىنا شيكىزاتتىق ەمەس ەكسپورتتى 654,8 ملن دوللارعا دەيىن ارتتىرۋعا بولادى. ايتالىق, ەلىمىز اۋىل شارۋاشىلىعى سالاسى بويىنشا 28,4 ملن دوللار كولەمىندە جانە ونەركاسىپكە قاتىستى 626,4 ملن دوللار شاماسىندا ءونىم ەكسپورتتاۋعا قاۋقارلى. شيكىزاتتىق ەمەس ءونىمدى سىرتقى نارىقتارعا ساتۋدى ۇلعايتۋ باعىتىندا ساۋدا جانە ينتەگراتسيا مينيسترلىگى ەكسپورتتاۋشىلارعا ىنتالاندىرۋ تەتىكتەرىن قاراستىرعانىن ايتا كەتكەن ورىندى.
بۇل رەتتە QazTrade ونىمدەرى قىتاي مەن ەاەو ەلدەرىندە سۇرانىسقا يە ەكسپورتتاۋشىلار پۋلىن ازىرلەگەن. ەكسپورتتىق اكسەلەراتسيا باعدارلاماسىن ىسكە اسىرۋ ارقىلى تاماق ونەركاسىبىمەن اينالىساتىن 35 كومپانيا ەۋروپا نارىعىنا ماي, تۇز, بال, ماكارون جانە ۇن ونىمدەرىن جەتكىزۋگە دايىن. اتاپ ايتقاندا, بال ءوندىرىسىن جولعا قويعان «لەپسينسك ءونىمى» جشس ونىمدەرى ەو ستاندارتتارىنا سايكەس سەرتيفيكاتتاۋدان وتكىزىلدى. بۇعان قوسا جوعارى ساپا ستاندارتتارىنا ساي دايىندالاتىن جىلقى مەن تۇيە مالىنىڭ قۇرعاق ءسۇت ونىمدەرى جوعارى سۇرانىستا.
ەلەكتروندى ساۋدا الاڭدارىندا وتاندىق ءونىمنىڭ ۇلەسىن ارتتىرۋ باعدارلاماسى ارقىلى بۇگىندە Alibaba.com پلاتفورماسىندا 4 مىڭعا جۋىق وتاندىق ءونىم تۇتىنۋشىلاردىڭ نازارىنا ۇسىنىلعان.
قازىر قازاقستان مەن چەحيا بىرقاتار باعىتتا ساۋدا-ەكونوميكالىق بايلانىستى ارتتىرماق نيەتتە. ماسەلەن, جاڭا ەكولوگيالىق كودەكس اياسىندا ەلىمىز قالدىقتى قايتا وڭدەۋ جانە كادەگە جاراتۋ سالاسىن بەلسەندى دامىتۋعا مۇددەلى. بۇل ورايدا چەحيا قالدىقتى قايتا وڭدەۋگە قاتىستى تەحنولوگيالاردى ەنگىزۋ مەن ونەركاسىپتە زاماناۋي «جاسىل» تەحنولوگيالارعا كوشۋ تاجىريبەسىمەن بولىسە الادى. سول سەكىلدى چەحيالىق ءبىلىم بەرۋ مەكەمەلەرى مەن اۆياتسيالىق وقۋ ورىندارىندا قازاقستاندىق ۇشقىشتاردى وقىتىپ, سەرتيفيكاتتاۋ جۇرگىزىلۋى مۇمكىن. ۇلتتىق اگەنتتىكتەر چەحيالىق ينۆەستورلاردى ماشينا جاساۋ جانە جەر قويناۋىن پايدالانۋ سالاسىنا تارتۋ باعىتىندا جۇمىس جۇرگىزىپ جاتىر.
