سونىمەن قاتار, كۇزدە كەڭەسكە تۇرىكمەنستان باقىلاۋشى بولسا نەمەسە بىردەن مۇشەلىككە ەنسە, تاڭعالماس ەدىم. وسى جولعى جيىندا سونداي قادامنىڭ نەگىزى قالاندى. ەكىنشىدەن, وسى جولعى سامميت قارساڭىندا تۇركى ينتەگراتسياسىنا قىزمەت ەتەتىن ۇيىمداردىڭ مارتەبەسى بەكىگەنىن اتاپ ءوتۋ كەرەك. اتاپ ايتقاندا, حالىقارالىق تۇركى اكادەمياسىن قارجىلاندىرۋ تەتىگى رەسمي تۇردە بەكىدى. مۇنىڭ ءوزى ينتەگراتسيانىڭ جاڭا ساتىعا كوتەرىلىپ كەلە جاتقانىن كورسەتەدى. ياعني سامميت ارالىق كەزەڭدەردە قىرۋار شارۋا اتقارىلىپ جاتىر. بۇل – ۇلكەن جەتىستىك.
ءارى ەندىگى بايلانىستاردا ەكونوميكالىق سيپات باسىمدىققا يە بولا باستاعان سىڭايلى. پرەزيدەنت قاسىم-جومارت توقاەۆتىڭ تۇركى الەمىن جاھانداعى ماڭىزدى ەكونوميكالىق, مادەني-گۋمانيتارلىق كەڭىستىككە اينالدىرۋ, وزبەكستان باسشىسى شاۆكات ميرزيوەۆتىڭ تۇركى دامۋ بانكىن قۇرۋ جونىندەگى ويلارى سونى مەڭزەيدى.
دەگەنمەن, تۇركى كەڭەسىنە مۇشە مەملەكەتتەر ينتەگراتسيالىق پروتسەستەردى سابىرلى, جان-جاقتى ويلاستىرا وتىرىپ جۇرگىزىپ جاتىر. بولاشاقتا ءوزارا بايلانىستارعا كەدەرگى كەلتىرۋى ىقتيمال فاكتورلاردى تۋىنداتپاۋ جاعىن ەسكەرۋدە.
ەڭ باستىسى, بەيرەسمي سامميت اقش پەن رەسەي, سونداي-اق اقش, ەۋروپا وداعى مەن قىتاي اراسىندا كۇشەيە باستاعان تەكەتىرەس كەزەڭىندە تۇركى الەمىنىڭ ارەكەتىن پىسىقتاپ الۋعا تاپتىرماس مۇمكىندىك بولدى دەپ بىلەمىن. ويتكەنى جاھاندىق دەرجاۆالاردىڭ كەز كەلگەنىمەن تۇركى مەملەكەتتەرى تىعىز قارىم-قاتىناس ورناتقان. تۇركى ەلدەرى ولاردىڭ اراسىنداعى كيكىلجىڭدە ءبىر تاراپتى جاقتاۋدان اۋلاق بولۋعا تىرىسادى.
امانگەلدى قۇرمەت,
«ايقىن» گازەتى باس رەداكتورىنىڭ ورىنباسارى
