جۋىردا وبلىستىڭ باس سانيتارلىق دارىگەرىنىڭ مىندەتىن اتقارۋشى قانات تۋرديەۆ حالىق اراسىندا COVID-19 كوروناۆيرۋس ينفەكتسياسىنىڭ تارالۋىن تەجەۋ ماقساتىندا 2021 جىلعى 19 اقپانداعى №4 قاۋلىسىنا وزگەرىستەر ەنگىزدى. اتاپ ايتساق, سانيتارلىق ەرەجەلەر مەن كۇشەيتىلگەن سانيتارلىق-دەزينفەكتسيالىق رەجىمدى ساقتاي وتىرىپ, قالالىق جانە اۋىلدىق مەكتەپتەردە سىنىپتارداعى بالالار سانىن 25-تەن اسىرماي ءداستۇرلى فورماتتا وقىتۋعا رۇقسات بەرىلدى. ال كوللەدجدەر مەن جوعارى وقۋ ورىندارىنىڭ 1-كۋرس ستۋدەنتتەرى ءۇشىن شتاتتىق وقىتۋ جالعاستىرىلادى.
سونىمەن قاتار اتى جامان ىندەتتىڭ الدىن الۋ ءۇشىن وڭىردە كۇندەلىكتى رەيدتەر جۇرگىزىلىپ جاتىر. 26 ناۋرىزدا عانا وسكەمەندە ءموبيلدى توپتار 28 ەرەجە بۇزۋشىلىقتى تىركەدى. ولاردىڭ كوبى ماسكا رەجىمىن ساقتاماۋمەن بايلانىستى. سونداي-اق مونيتورينگتىك توپ ۇزىن سانى 310 نىساندى تەكسەرىپ, 12 ەرەجە بۇزۋشىلىقتى انىقتاعان. جالپى سوماسى 350 040 تەڭگەنىڭ ايىپپ ۇلى سالىندى. ال سەمەيدەگى ساۋدا ۇيلەرى مەن بازارلاردى تەكسەرگەن مونيتورينگتىك توپ ماسكا رەجىمىن بۇزعان 14 ازاماتقا حاتتاما تولتىردى. ودان بولەك, جاپپاي ءىس-شارا وتكىزگەندەر دە انىقتالدى. ايتا كەتەرلىگى, مۇنداي رەيدتىك شارالار وبلىستىڭ وزگە دە قالالارىندا جۇرگىزىلىپ جاتىر. دەمەك, تۇرعىنداردىڭ بارىنشا ساقتانىپ جۇرگەندەرى ابزال. دۇرىسى, رەيدتىك شارالاردان ەمەس, جۇقپالى ىندەتتەن ساقتانۋ كەرەك.
ىندەتپەن كۇرەستە الدىڭعى شەپتە جۇرەتىن ماماندار اۋىرىپ ەم ىزدەگەننەن گورى, اۋىرماۋدىڭ جولىن تابايىق دەگەن نيەتتە ەرىكتى تۇردە ەكپە دە ەككىزىپ جاتىر. كۇنى كەشە عانا وبلىستىق پوليتسيا دەپارتامەنتى قىزمەتكەرلەرى اراسىندا COVID-19-عا قارسى ەرىكتى تۇردە ۆاكتسينا الۋ باستالدى. الدىمەن ەكپە الۋعا دايىن پوليتسەيلەردىڭ ءتىزىمى جاسالدى. ولاردىڭ دەنساۋلىقتارى تەكسەرىلدى. ۆاكتسينانى العاشقىلاردىڭ ءبىرى بولىپ, وبلىستىق پد باستىعى ساعات ماديەۆ الدى.
– ىندەتتىڭ قاۋىپتى ەكەنىن بىلتىر ءبارىمىز تۇسىندىك. دارىگەرلەر, اسكەريلەر, پوليتسەيلەر كۇن-ءتۇن دەمەي, حالىقتىڭ دەنساۋلىعى ءۇشىن كۇرەستى. بىراق قاۋىپتىڭ بەتى قايتقان جوق. سوندىقتان ىندەتكە قارسى ەكپە الىپ جاتىرمىز. ءوزىم جەكە قۇرام ءۇشىن ۇلگى بولايىن دەپ ۆاكتسينانى العاشقىلاردىڭ ءبىرى بولىپ الدىم, – دەدى وبلىستىڭ باس پوليتسەيى س.ماديەۆ.
بۇگىنگى تاڭدا ۆاكتسينالانعاندار تىزىمىندە 100-دەن استام پوليتسەي بار. ولار الدىڭعى قاتاردا قىزمەت ىستەيتىن جانە حالىقپەن ءجيى قارىم-قاتىناستا بولاتىن پاترۋلدىك پوليتسيا قىزمەتكەرلەرى مەن ۋچاسكەلىك پوليتسيا ينسپەكتورلارى.
شىعىس قازاقستان وبلىسى
