الماتى قالالىق پوليتسيا دەپارتامەنتىنىڭ مالىمەتىنشە, زەرتحانا مەدەۋ اۋدانىنداعى باۋ-باقشا قوعامىنىڭ اۋماعىنداعى جەكە ۇيدە ورنالاسقان. ونى 25 جانە 24 جاستاعى ەكى جىگىت باسقارعان.
ء«ۇيدى سانكتسيالانعان ءتىنتۋ كەزىندە «مەفەدرون» سينتەتيكالىق پسيحوتروپتىق زاتىن ءوندىرۋ بارىسىندا قولدانىلاتىن ۇنتاق جانە كەسەك زاتتار, حيميالىق زاتتار سالىنعان پلاستيك ىدىستار, ءتۇرلى سۇيىققا تولى زەرتحانالىق ىدىس, ەلەكتروندى تارازى جانە باسقا دا زاتتار تابىلدى جانە ولار ءىس جۇرگىزۋ تارتىبىمەن تاركىلەندى. كۇدىكتىلەردىڭ ەسىرتكى ازىرلەۋگە ارنالعان كومپونەنتتەردى رەسەي فەدەراتسياسىنان كولىك-لوگيستيكالىق كومپانيانىڭ قىزمەتى ارقىلى العانى انىقتالدى», دەدى الماتى قالالىق پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى ەرلان الماعامبەتوۆ.
ءۇش كەلى كەپتىرىلگەن جانە ون كەلى ساتۋعا دايىن تاركىلەنگەن زاتتارعا سوت-حيميالىق ساراپتاما تاعايىندالدى.
«كۇدىكتىلەردىڭ ارەكەتتەرى قىلمىستىق كودەكستىڭ 297-بابى بويىنشا تىركەلدى. ولار وزدەرىنىڭ كىناسىن تولىق مويىنداپ, وندىرىلگەن تاۋارلاردىڭ مەدەۋ, بوستاندىق جانە ناۋرىزباي اۋداندارىنىڭ اۋماعىندا بەلگىلى ءبىر ورىندارعا جاسىرىپ كەتۋ ارقىلى ساتىلاتىندىعىن ايتتى. ۇستالعان ازاماتتار پد ۋاقىتشا ۇستاۋ يزولياتورىنا قامالدى. ولاردىڭ باسقا دا قىلمىستارعا قاتىسى بار-جوعى تەكسەرىلەدى», دەدى ەرلان الماعامبەتوۆ.
