ارىستان ءبىرنازاروۆ اۋەلدە وڭ كوزىن قاتتى جاراقاتتاپ العان. سول كەزدە كوزدىڭ قابىعى زاقىمدانعان. جىگىت ءتورت وپەراتسيا جاسادى, ونىڭ ەكەۋى پورتال بويىنشا الماتى عزي-دا وتكەن. زاقىمدالعان ورگانعا سيليكون سالىنعان. 5 ايدان كەيىن ونى الىپ تاستاۋ كەرەك ەدى. جىگىتتىڭ ايتۋىنشا, اقتوبەدەگى ەمدەۋشى دارىگەرلەر دەر كەزىندە ءوتىنىم جىبەرمەگەن. ارىستان ءبىر جارىم جىلدان كەيىن, قازعزي-عا كەلگەندە, تىم كەش قالعانىن بىلگەن.
- ماعان الماتىلىق دارىگەرلەر: «مىنە, قاراشى, پورتال بار, ال وندا وتىنىمدەر جوق. سەنىڭ اتىڭنان ەشقانداي ءوتىنىش بەرمەگەن» دەدى. مەن قازىر نە ىستەرىمدى بىلمەيمىن. مەنىڭشە, ءبارى بىتكەن سەكىلدى. ولار كوزىمنىڭ قابىناتىن سيليكونعا تاۋەلدى ەكەنىن ايتتى. ياعني ۋاقىت وتە كەلە, كوزدى كەسۋگە تۋرا كەلەتىن ءسات ەرتە مە, كەش پە ءبارىبىر كەلەدى, - دەيدى اقتوبە قالاسىنىڭ تۇرعىنى ارىستان ءبىرنازاروۆ.
قازىر ارىستاننىڭ ءبىر كوزى عانا كورەدى. جاس جىگىت ءۇشىنشى توپتاعى مۇگەدەك رەتىندە تىركەلگەن. ۋاقىتىلى ورىندالۋى كەرەك بولعان وپەراتسيا, كورۋ قابىلەتىن قالپىنا كەلتىرۋدىڭ ازعانتاي مۇمكىندىكتەرىنىڭ ءبىرى ەدى. بىراق جىگىتتىڭ دارىگەرى وپەراتسياعا 2020 جىلدىڭ قاڭتارىندا ءوتىنىش بەرگەنىن مالىمدەدى. تەك الماتى ينستيتۋتى ناۋقاستى كارانتينگە بايلانىستى قابىلداۋدان باس تارتقان.
- مۇمكىن, كارانتينگە بايلانىستى 7-8 ايعا كەشىكتىرىلگەن شىعار. ايتالىق, ءبىز قاڭتاردىڭ باسىندا تامىزعا دەيىن, ودان سوڭ قاراشاعا دەيىن كارانتين جاريالادىق, وپەراتسيالار تولىعىمەن بولمادى, - دەيدى اقتوبە قالاسى №1 ەمحاناسىنىڭ وفتالمولوگ-دارىگەرى ۆەنەرا ورازالينا.
مۇنداعىلار ەمحانادا باسقا قالاداعى ناۋقاستاردى ەمدەۋگە بارلىق وتىنىمدەردى وبلىستىق دەنساۋلىق ساقتاۋ باسقارماسى بەرەتىنىن ايتادى. الايدا وبلىستىق دەنساۋلىق ساقتاۋ باسقارماسى مۇنى جوققا شىعارىپ وتىر. ايتۋلارىنشا, ۆەدومستۆونىڭ مىندەتى - ەمحانادان مالىمەت الۋ, سودان كەيىن عانا پاتسيەنتتى پورتالعا قويۋ.
بەلگىلى بولعانداي, بىلتىرعى اقپان ايىندا ەمحانا ارىستانعا وتا جاساۋعا سوڭعى ءوتىنىمدى جىبەرگەن. ياعني, ءبىر جىلعا كەشىكەن.
ءوتىنىمدى ەمحانا دا تىكەلەي قويا الادى, ويتكەنى بۇل قىزمەت مامانداندىرىلعان مەديتسينالىق كومەككە جاتادى. سوندىقتان ولار دا ونى جىبەرە الادى, ەمحانا ارقىلى دا پورتالعا قويۋعا بولادى, - دەيدى اقتوبە وبلىسى دەنساۋلىق ساقتاۋ باسقارماسىنىڭ باس مامانى ءاليا شارباقوۆا.
سارساڭعا تۇسكەن ارىستان ادىلدىككە قول جەتكىزگىسى كەلەدى. جىگىت مەديتسينالىق قىزمەت ساپاسىن باقىلاۋ كوميتەتىنە حابارلاسىپ, سوتقا تالاپ ارىز بەرۋگە نيەتتى. قازىرگى ساتتە ونىڭ وتباسى كۇردەلى ناۋقاستى قابىلدايتىن جانە جاس ادامنىڭ كوزىن ساقتاي الاتىن شەتەلدىك كلينيكالاردى ىزدەستىرىپ جاتىر.
