وبلىستىق توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى باسشىسىنىڭ ورىنباسارى سامات قۇماشەۆتىڭ ايتۋىنشا, جايىق وزەنىنىڭ ساعاسىندا مۇز قالماپتى. بۇعان اۋا-رايىنىڭ جىلىنۋى مەن جاڭبىردىڭ جاۋى سەبەپ بولىپ وتىر.
وسىعان وراي اتىراۋ قالالىق اكىمدىگى ادامداردىڭ قاۋىپسىزدىگى ءۇشىن جايىق وزەنىنىڭ مۇزىن بۇزۋعا كىرىسۋ تۋرالى شەشىم قابىلدادى. كەشە, 17 ناۋرىزدا دامبا اۋىلىنىڭ تۇسىنان مۇزدى جارۋ جۇمىسىنا بالىق اۋلاۋ كووپەراتيۆىنىڭ كاتەرى تارتىلدى.
«بۇگىن, 18 ناۋرىزدا وزەننىڭ جۇمىسكەر اۋىلىنىڭ تۇسىنا دەيىنگى مۇزى جارىلدى. جايىقتىڭ كەي تۇسىندا مۇزدىڭ قالىڭدىعى 10-12 سم-ءدى قۇرايدى. بۇل كاتەردىڭ قوزعالىسىنا ازداعان قيىندىق تۋدىرادى. سوعان قاراماستان وزەننىڭ مۇزى گەولوگ ەلدى مەكەنىنىڭ تۇسىنا دەيىن جارىلادى», دەدى سامات قۇماشەۆ.
