ايماقتار • 18 ناۋرىز، 2021

تارازدا عازيز بايتاسوۆ ەسكەرتكىشىنىڭ ىرگەتاسى قالاندى

285 رەت كورسەتىلدى

بيىل حالىق قاھارمانى، پوليتسيا كاپيتانى عازيز بايتاسوۆ ءتىرى بولعاندا ەردىڭ جاسى ەلۋگە تولاتىن ەدى. ول 2011 جىلى تاراز قالاسىندا قاۋىپتى تەرروريستى ۇستاۋ كەزىندە ەرلىكپەن قازا تاپقان بولاتىن. ەرجۇرەك پوليتسەيدىڭ ەسىمى ەل ەسىندە ماڭگى ساقتالادى، دەپ حابارلايدى Egemen.kz

بۇگىندە ءوزى وقىعان مەكتەپ پەن تاراز قالاسىنداعى كوشە باتىردىڭ اتىمەن اتالادى. سونداي-اق وبلىستىق پوليتسيا دەپارتامەنتىنىڭ الدىنا عازيز بايتاسوۆتىڭ ءبيۋستى ورناتىلعان.   

الداعى ءساۋىر ايىنىڭ باسىندا، ياعني باتىردىڭ تۋعان كۇنىنە وراي، وبلىس ورتالىعىنداعى ب.مومىش ۇلى اتىنداعى «جەڭىس» ساياباعىندا وبلىستىق پوليتسيا دەپارتامەنتىنىڭ باستاماسىمەن جانە وبلىس اكىمدىگىنىڭ قولداۋىمەن حالىق قاھارمانىنا ەسكەرتكىش ورناتىلادى. وسى ماقساتتا بيلىك جانە قۇقىق قورعاۋ ورگاندارى وكىلدەرىنىڭ، دەپۋتاتتار مەن باتىردىڭ تۋىستارىنىڭ قاتىسۋىمەن ەسكەرتكىشتىڭ ىرگەتاسى قالاندى. «عازيز بايتاسوۆ «حالىق قاھارمانى» جوعارى اتاعىن العان ءبىرىنشى جانە جالعىز پوليتسەي بولىپ تابىلادى. ءبىزدىڭ باستامامىزعا قولداۋ بىلدىرگەنى ءۇشىن وبلىس جانە تاراز قالاسىنىڭ باسشىلىعىنا شىن جۇرەكتەن ريزاشىلىعىمدى جەتكىزگىم كەلەدى»، دەدى پوليتسيا دەپارتامەنتىنىڭ باستىعى، گەنەرال-مايور جانات سۇلەيمەنوۆ. سونداي-اق، جيىنعا باتىردىڭ جەسىرى گۇلجامال تاجيەۆا مەن بالالارى دا قاتىستى. «مەن ءوزىمنىڭ جانە بالالارىمنىڭ اتىنان عازيزدى ەسكە الۋشىلاردىڭ بارلىعىنا، ەڭ الدىمەن ونىڭ ارىپتەستەرى مەن جەرگىلىكتى بيلىككە العىس ايتقىم كەلەدى. ءبىزدى ارقاشان ۇمىتپاي، ەلەپ، ەسكەرىپ، كوپتەگەن ءىس-شارالارعا قۇرمەتتى قوناق رەتىندە شاقىرىپ وتىرادى. ال، قالاداعى «جەڭىس» ساياباعىنان ەسكەرتكىشتىڭ اشىلۋى ونىڭ جانقيارلىق ەرلىگىنىڭ لايىقتى باعاسىنىڭ جانە كورسەتىلگەن قۇرمەتتىڭ تاعى ءبىر كورىنىسى دەپ بىلەمىن»، دەدى گۇلجامال تاجيەۆا.

قىرىق جاسىندا ەل تىنىشتىعىن كۇزەتۋ جولىندا وپات بولعان عازيز بايتاسوۆتىڭ ەسىمى ماڭگى ەل ەسىندە. باتىردىڭ ونەگەلى ءومىرى مەن جانقيارلىق ەرلىگى جاس ۇرپاقتىڭ دا تاربيەسىنە ۇلەس قوساتىنى ءسوزسىز.

 

جامبىل وبلىسى

سوڭعى جاڭالىقتار

ءمىنسىز – كىم؟

رۋحانيات • كەشە

سەمەيدەگى سەرپىلىس

ايماقتار • كەشە

ۇقساس جاڭالىقتار