سوڭعى ايلاردا 12 قازاقستاندىق ساربازدىڭ اتى-ءجونى مەن جەرلەنگەن جەرى انىقتالدى. ەسىمدەرى بەلگىلى قازاقستاندىق سولداتتاردىڭ جالپى سانى 56 ادام. تىزىمدە ساربازدىڭ تۋعان جىلى مەن مەكەنى, اسكەرگە شاقىرۋ, قىزمەت ەتۋ, تۇتقىندالۋى, قايتىس بولۋى جانە جەرلەنگەن جەرى, تۋىستارى تۋرالى مالىمەتتەر, سونداي-اق قولدا بار قۇجاتتارعا سىلتەمەلەر بەرىلگەن. ءتىزىم «فالستاد ورتالىعى» (نورۆەگيا), قازاقستان اۋماعىنان شاقىرىلىپ ۇلى وتان سوعىسى كەزىندە قازا تاپقان نەمەسە حابارسىز كەتكەن اسكەري قىزمەتشىلەر تۋرالى «مەموريال» دەرەكتەر بانكى, سونداي-اق رەسەيلىك «مەموريال» جيىنتىق دەرەكتەر بانكى سياقتى بىرنەشە دەرەكتەر كوزدەرىنەن الىنعان اقپاراتتى سالىستىرۋ ارقىلى جاسالدى.
«فالستاد ورتالىعى» ۇسىنعان اقپارات سولداتتىڭ جەرلەنگەن ورنى تۋرالى ناقتى مالىمەتتەرىمەن قۇندى. رەسەيلىك «مەموريالدا» اسكەري تۇتقىنداردىڭ كارتوتەكاسى, ال قازاقستاندىق «مەموريالدىڭ» مالىمەتتەرى – قازاقستانداعى جاۋىنگەردىڭ تۋعان جەرى مەن اسكەرگە شاقىرىلۋى تۋرالى تولىق اقپارات بار. قازا تاپقان ساربازداردىڭ كوبىسى ءبىر نەمەسە ەكى عانا مالىمەتتەر بازاسىندا كورسەتىلگەنى ىزدەۋدى قيىنداتادى. كوپتەگەن جاعدايدا سولدات ەسىمى مەن گەوگرافيالىق اتاۋلاردىڭ بۇرمالانىپ جازىلۋى پروبلەماسى دا بار.
ەلشىلىك نورۆەگيادا جەرلەنگەن قازاقستاندىق ساربازداردىڭ بارىنشا تولىق ءتىزىمىن جاساۋ ماقساتىندا نورۆەگيالىق «فالستاد ورتالىعىمەن» ءوزارا ارەكەتتەسۋدى جالعاستىرماق. بۇگىنگى كۇنگە دەيىن نورۆەگيادا جەرلەنگەن كەڭەستىك اسكەريلەردىڭ شامامەن 15 500 سانى تۋرالى بەلگىلى بولىپ, ولاردىڭ 7 804-ءتىڭ ەسىمدەرى انىقتالدى. سونىمەن قاتار, ەلشىلىك نورۆەگياداعى قازا تاپقان قازاقستاندىقتاردىڭ تاعدىرى تۋرالى باسقا دا دەرەككوزدەردەن العان.
اتاپ ايتقاندا, جۋىردا تابىلعان دەرەككوز بويىنشا 1944 جىلى 27 ماۋسىمدا كيركەنەستى بومبالاۋ كەزىندە 22 قازاقستاندىقتىڭ قازاعا ۇشىراۋى تۋرالى اقپارات زەرتتەلۋدە. 2020 جىلدىڭ قاڭتارىندا 44 سولداتتىڭ العاشقى ءتىزىمى جاريالانعاننان بەرى تەك ءبىر ساربازدىڭ تۋىسقاندارى عانا تابىلدى. ەلشىلىك جاريالانعان اقپارات ساربازداردىڭ ۇرپاقتارىن, تۋىستارى مەن جاقىندارىن تابۋعا كومەكتەسەدى, زەرتتەۋلەردى ودان ءارى جۇرگىزۋگە جانە سولداتتاردى ماڭگى ەستە قالدىرۋعا ۇلەس قوسادى دەپ ۇمىتتەنەدى.
