ۇمىتكەرلەردى ىرىكتەۋ جانە قۇجاتتاردى تەكسەرۋ ءراسىمى العاش رەت اقپاراتتىق جۇيەنىڭ كومەگىمەن ونلاين فورماتتا وتكىزىلدى. بايقاۋعا قاتىسۋشىلاردىڭ قىزمەتى وقىتۋ ساپاسى مەن عىلىمي-زەرتتەۋ جەتىستىكتەرى بويىنشا باعالاندى. بايقاۋ ناتيجەلەرى مينيسترلىكتىڭ سايتىنا ورنالاستىرىلدى.
مينيستر ءبىلىم جانە عىلىم جۇيەسى ءۇشىن مۇنداي بايقاۋلاردىڭ اشىق تۇردە ءوتۋى ماڭىزدى ەكەندىگىن ەرەكشە اتاپ ءوتتى.
«پاندەميا كەزىندە ەلىمىزدىڭ جوعارى ءبىلىم بەرۋ جۇيەسى ماڭىزدى سىناقتان ءوتىپ, جوو-لاردىڭ جۇمىسى جاقسى دەڭگەيدە ۇيىمداستىرىلدى. وسى رەتتە سىن-قاتەرلەردى مۇمكىندىك رەتىندە قابىلداۋعا ءتيىسپىز. قانداي دا ءبىر قيىندىقتار مەن قولايسىزدىقتارعا قاراماستان, قازاقستاندىق وقىتۋشىلار بۇل جاعدايعا تەز بەيىمدەلدى. بۇگىنگى تاڭدا ءبىزدىڭ الدىمىزدا وقىتۋشىنىڭ بەدەلىن ارتتىرۋ, ەڭبەك جۇكتەمەسىن ازايتۋ, ەڭبەكاقىنى كوبەيتۋ, وقىتۋشىلاردى وزىنە ءتان ەمەس فۋنكتسيالارعا تارتۋعا جول بەرمەۋ بويىنشا جانە ەلىمىزدىڭ پرەزيدەنتى قاسىم-جومارت توقاەۆ ايقىنداعان باسقا دا بىرقاتار ماڭىزدى مىندەت تۇر. مەن بايقاۋ جەڭىمپازدارىن بۇل ماراپاتپەن شىن جۇرەكتەن قۇتتىقتايمىن جانە ارقايسىسىنا مىقتى دەنساۋلىق, تولاعاي تابىس پەن وتباسى اماندىعىن تىلەيمىن», دەدى اسحات ايماعامبەتوۆ.
كونكۋرسقا رەسپۋبليكانىڭ 73 جوعارى وقۋ ورنىنان 623 ۇمىتكەر قاتىستى.
قازاقستاننىڭ ۇزدىك وقىتۋشىلارىنىڭ قاتارىندا بەلگىلى تەلەجۋرناليست, ل.ن.گۋميلەۆ اتىنداعى ەۇۋ-ءدىڭ پروفەسسورى ەسەنبەكوۆا ۇلبوسىن مەيىربەكقىزى دا بار.
فيلولوگيا عىلىمدارىنىڭ كانديداتى, قاۋىمداستىرىلعان پروفەسسور ۇ.م. ەسەنبەكوۆانىڭ ۇزدىك وقىتۋشى اتاعى عالىمنىڭ قازاق تەلەۆيزياسى مەن جۋرناليستيكاسىن دامىتۋعا قوسقان ەڭبەگىنىڭ ادىلەتتى باعاسى دەپ سانايمىز.
