«KEGOC» اق-نىڭ مالىمەتىنە سۇيەنسەك, 10 قاڭتاردا نۇر-سۇلتان ۋاقىتىمەن ساعات 19:25-تە اۋا رايىنىڭ كۇرت وزگەرۋىنەن, دالىرەك ايتقاندا قار مەن جاڭبىر تۇرىندەگى ەكپىندى جاۋىن-شاشىن مەن مۇزدىڭ قاتۋى سالدارىنان اتىراۋ جانە ماڭعىستاۋ وبلىستارىندا 220 كۆ-تىق «يندەر-اتىراۋ» جوعارى ۆولتتىق ەلەكتر جەتكىزۋ جەلىسى اجىراتىلعان. وسى ۋاقىتتا قاراباتان گتەس-ىندە جالپى جۇكتەمەسى 100 مۆت بولاتىن ەكى گەنەراتور اجىراتىلدى. بۇل اتىراۋ مەن ماڭعىستاۋ وبلىستارىندا جيىلىكتىڭ كۇرت تومەندەۋىنە الىپ كەلدى. وسىنىڭ سالدارىنان جيىلىكتىڭ تومەندەۋىنىڭ الدىن الاتىن اۆتوماتيكا ىسكە قوسىلدى.
اۆتوماتيكانىڭ ىسكە قوسىلۋىنىڭ ناتيجەسىندە ەكى وبلىستا ەلەكتر ەنەرگياسىنىڭ تولىقتاي ءسونىپ قالۋ قاۋپىن تۋعىزاتىن جيىلىكتىڭ تەرەڭ تومەندەۋىنە جول بەرىلگەن جوق. ال ساعات 23:22-دە قاراباتان گتەس-ءىنىڭ ءبىر گەنەراتورى ىسكە قوسىلىپ, ستانسا گەنەراتسياسى 50 مۆت-قا ارتتىرىلدى. ساعات 22:59-دا جەس-3 ماەك-تە قۋاتى 200 مۆت بلوكتى قوسۋعا نۇسقاۋ بەرىلىپتى.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى باۋىرجان تۇحفاتوۆتىڭ ايتۋىنشا, ەلەكترمەن جابدىقتاۋداعى وسىنداي ىركىلىس 11, 15, 16 قاڭتاردا دا تۋىندادى. بىراق ەنەرگەتيكتەر ەلەكتر ەنەرگياسىمەن جابدىقتاۋدى قالپىنا كەلتىردى. بۇل اقاۋدىڭ سەبەبىن زەرتتەۋ ءۇشىن ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ كوميتەتى كوميسسيا قۇردى. وسى كوميسسيا جۇمىسىنىڭ قورىتىندىسىمەن ناقتى شارالار قابىلدانادى, – دەيدى ب.تۇحفاتوۆ.
«كەGوس» اق «باتىس جۇيەارالىق ەلەكتر جەلىلەرى» فيليالىنىڭ ديرەكتورى كونستانتين چەرنوحاەۆ ەلەكترمەن جابدىقتاۋداعى ىركىلىس اتىراۋ جەو-دا, قاراباتانداعى ەلەكتر ستانساسىندا (Karabatan Utility Solutions جشس) گەنەراتسيانىڭ تومەندەۋى مەن «تەڭىزشەۆرويل» جشس-نىڭ جۇيەسىندە اۋىتقۋ بولعانىن راستادى. جىلىوي, يندەر, قىزىلقوعا, ماحامبەت, قۇرمانعازى, ماقات اۋداندارى مەن اتىراۋ قالاسىنىڭ سول جاعالاۋ بولىگىندە «اتىراۋ-جارىق» اق-نىڭ تۇتىنۋشىلارى جارىقسىز قالدى.
ك.چەرنوحاەۆتىڭ ايتۋىنشا, وسى كەزدە اۆتوماتتى اجىراتۋدى ەنگىزەتىن اپاتقا قارسى اۆتوماتيكا ەكى رەت ىسكە قوسىلىپتى. شەكتەۋلەردىڭ جالپى كولەمى شامامەن 100 مۆت, ونىڭ ىشىندە اتىراۋدا – 70, ال ماڭعىستاۋدا 30 مۆت-تى قۇرادى. ءىرى قوسالقى ستانسالاردى, ستراتەگيالىق ماڭىزدى نىسانداردى اجىراتۋدىڭ نەگىزگى سەبەبى جەلسىز نوسەر جاڭبىر عانا ەمەس.
– بۇل جاڭبىر قانداي دا ءبىر زات اكەلدى. بۇل وقشاۋلاۋدىڭ قاباتتاسۋىنا سەبەپ بولدى. قۇرامىندا نە بولعانىن قازىر ايتا المايمىز. مۇمكىن بۇل جەلمەن كوتەرىلىپ, الدەبىر تسيكلونعا شوعىرلانعان كاسپي نەمەسە ارال تەڭىزىنىڭ تۇزى شىعار. مۇمكىن باسقا ءبىر نارسە بولار, – دەيدى ك.چەرنوحاەۆ.
سودان بەرى ەكى ايعا جۋىق مەرزىم ءوتتى. الايدا ەلەكتر جەلىسىندەگى اقاۋدىڭ ناقتى سەبەبى ءالى دە جۇمباق كۇيىندە قالىپ وتىر. ال سالدارى كۇردەلى ەكەنى بىلىنە باستادى. ماسەلەن, اتىراۋ مۇناي وڭدەۋ زاۋىتىنىڭ باس ديرەكتورى شۋحرات دانبايدىڭ ءمالىم ەتۋىنشە, كاسىپورىندا ايماقتى ەلەكترمەن جابدىقتاۋ جۇيەسىندە بولعان ىركىلىستىڭ سالدارىنان تەحنوگەندىك اقاۋلار ءجيى كەزدەسكەن.
– بيىلعى قاڭتاردا زاۋىتتا كەرنەۋدىڭ 21 تەرەڭ اقاۋى بايقالدى. سونىڭ سالدارىنان CCR تەحنولوگيالىق قوندىرعىسى كاتاليزاتورلارىنىڭ 90 پايىزى ىستەن شىقتى. بۇدان باسقا دا سالدارلار پايدا بولدى. سول سەبەپتەن, زاۋىت ءالى كۇنگە دەيىن تۇراقتى تەحنولوگيالىق رەجىمگە ەنە الماي وتىر. كاسىپورىنعا كەلتىرىلگەن شىعىن 25 ملرد تەڭگەگە باعالاندى, – دەيدى ش.دانباي.
مۇناي وڭدەۋ زاۋىتىنىڭ تۇراقتى تەحنولوگيالىق رەجىمگە ەنە الماعانى اتىراۋدا كولىككە قۇياتىن سۇيىتىلعان گاز تاپشىلىعىن تۋىنداتارىن ەشكىم بولجاي الماعان سەكىلدى. بۇل ماسەلە ۋشىعا باستاعاندا وبلىس اكىمى ماحامبەت دوسمۇحامبەتوۆ جەدەل كەڭەس وتكىزىپ, سۇيىتىلعان گاز تاپشىلىعىنىڭ تۋىنداۋىنا جول بەرگەن جاۋاپتى تۇلعالاردىڭ سالعىرتتىعىن سىنعا الدى.
– جاۋاپتى باسقارما باسشىلارى ماسەلەنىڭ ۋشىعۋىنا جول بەرىپ وتىر. ەنەرگەتيكا مينيسترلىگى مەن اتىراۋ مۇناي وڭدەۋ زاۋىتىمەن تىعىز بايلانىس جاساپ, ماسەلەنى ۋاقتىلى رەتتەگەندە مۇنداي جاعداي بولماس ەدى. وسىنداي ولقىلىققا تىكەلەي جاۋاپتى تۇلعالارعا قىزمەتتىك شارا قولدانىلادى, – دەدى م.دوسمۇحامبەتوۆ.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى دانيار مۇقىشەۆتىڭ ايتۋىنشا, ەنەرگەتيكا مينيسترلىگىنىڭ جوسپارىنا سايكەس, اقپاندا ناۋرىز ايى ءۇشىن وبلىسقا قاجەتتى 4 600 توننا سۇيىتىلعان گاز بەرۋ تۋرالى كەستە جىبەرىلىپتى. بىراق اتىراۋ مۇناي وڭدەۋ زاۋىتى جوندەۋ جۇمىستارىنىڭ جۇرگىزىلۋىنە بايلانىستى ءتيىستى كولەمدەگى سۇيىتىلعان گازدى بەرە الماي وتىر. وسىعان بايلانىستى وزگە كومپانيالاردان 4 500 توننا گاز ساتىپ الۋ جوسپارلانىپتى.
ەنەرگەتيكا مينيسترلىگىنىڭ ءباسپاسوز قىزمەتى ۇسىنعان اقپاراتقا قاراعاندا, اتىراۋ مۇناي وڭدەۋ زاۋىتىنداعى كاتاليتيكالىق كرەكينگ قوندىرعىسىنىڭ ىستەن شىعۋىنا بايلانىستى سۇيىتىلعان مۇناي گازىن ءوندىرۋ جۇزەگە اسىرىلمايدى. اتالعان قوندىرعىنى قالپىنا كەلتىرۋ ناۋرىزدىڭ سوڭىنا دەيىن جالعاسقالى وتىر. وسىعان وراي مينيسترلىك ناۋرىز ايىنا سۇيىتىلعان مۇناي گازىن جەتكىزۋدىڭ تۇزەتىلگەن جوسپارىن قايتا جاساقتادى. وندا اتالعان اتىراۋداعى زاۋىتقا بەكىتىلگەن وڭىرلەر وزگە زاۋىتتاردىڭ رەسۋرستارىنا قايتا ءبولىندى.
– اتاپ ايتقاندا, الماتى, قاراعاندى, سولتۇستىك قازاقستان, جامبىل وبلىستارى مەن نۇر-سۇلتان, الماتى قالالارىنا سۇيىتىلعان گازدى جەتكىزۋ «پەتروقازاقستانويلپروداكتس» جشسنا جۇكتەلدى. ال قوستاناي مەن ماڭعىستاۋ وبلىستارىنا «سنپس-اقتوبەمۇنايگاز» اق جەتكىزەدى. اتىراۋ وبلىسىن «تەڭىزشەۆرويل» جشس, باتىس قازاقستان وبلىسىن «جايىقمۇناي» جشس قامتيتىن بولادى. قازىر قايتا تۇزەتىلگەن جوسپارعا سايكەس گاز جەلىسى ۇيىمدارى مەن جەتكىزۋشى زاۋىتتار اراسىندا شارتتار جاساۋ جۇرگىزىلىپ جاتىر. وسىلايشا, وڭىرلەردىڭ سۇيىتىلعان مۇناي گازىنا قاجەتتىلىگى جوسپارلى كولەمدە قامتاماسىز ەتىلەدى, – دەپ حابارلادى مينيسترلىكتىڭ ءباسپاسوز قىزمەتى.
مىنە, وسىدان-اق ەلەكتر جەلىسىندەگى اقاۋدىڭ سالدارى كۇردەلى ەكەنىن اڭعارۋعا بولادى.
اتىراۋ وبلىسى
