الماتىداعى ۇشاق اپاتى

وسىنداي جايسىز حاباردى ەستىگەن بەتتە اتالمىش ۆەدومستۆو وكىلدەرىمەن حابارلاستىق. ولار: ساعات 17:20 شاماسىندا اۋەجايعا قونايىن دەپ جاتقان نۇر-سۇلتان – الماتى باعىتىنداعى ۇشاقپەن بايلانىس ءۇزىلدى. الدىن الا مالىمەت بويىنشا, ۇلتتىق قاۋىپسىزدىك كوميتەتىنىڭ  ان-26 ۇشاعى قۇلاعان. اۋە كەمەسىنىڭ بورتىندا 6 ادام بولعان», دەپ مالىمدەدى.

كەيىننەن بەلگىلى بولعانداي ءتورت ادام سول جەردە قازا تاپتى. ولار – مايور عابيت بارلىقباەۆ (1987 جىلى تۋعان), اعا لەيتەنانت دوسجان باي­مۇراتوۆ (1978 جىلى), لەيتەنانت مۇحتار ساعىنباەۆ (1995 جىلى) جانە سەرجانت ەۆگەني ۆاسيلكوۆ (1986 جىلى). تاعى ەكى ادام الماتىداعى №4 قا­لالىق اۋرۋحاناعا جەتكىزىلدى. دارى­گەر­لەردىڭ ايتۋىنشا, ولاردىڭ جاعدايى وتە اۋىر.

وقيعا ورنىندا الماتى قالاسى مەن وبلىسى توتەنشە جاعدايلار دەپارتا­مەنتتەرى, اۋەجاي قىزمەتى, قر تجم رجقج, 109 قۇتقارۋ قىزمەتىنەن 45 ادام, 15 بىرلىك تەحنيكا جۇمىس ىستەدى. اپات بولعان جەردە ءورت شىعىپ, ۇشاقتىڭ جانۋى سول كۇنى ساعات 18.02-دە توقتاتىلدى.

پرەزيدەنت  قاسىم-جومارت توقاەۆ قۇ­زىر­لى ورگاندارعا الماتى ما­ڭىندا بولعان ۇشاق اپاتىنىڭ سەبەپ­تەرىن انىقتاۋدى تاپ­سىردى. «الماتى اۋەجاي­ىن­دا اپات­قا ۇشىراعان ۇشاقتا قازا بولعان اس­كەري قىزمەتكەرلەردىڭ تۋىستارى مەن جا­قىن­دارىنا كوڭىل ايتامىن. جا­راقات العان­داردىڭ تەزىرەك ساۋى­عىپ كەتۋىن تىلەيمىن. مەنىڭ تاپ­سىر­مام بويىن­شا اۋە اپاتىنىڭ سەبەپ­تەرىن انىقتاۋ جۇ­مىس­تارى باستالدى. مۇنداي وقىس وقيعالار قايتالانباۋى كەرەك», دەپ مالىمدەدى مەم­لەكەت باسشىسى. 

الماتى