مينيسترلىكتىڭ ءباسپاسوز قىزمەتى پاندەميا كەزەڭىندە اتقارىلعان جۇمىستى باياندادى.
اتاپ ايتقاندا, قازاقستان ازاماتتارىنا كونسۋلتاتيۆتىك كومەك كورسەتۋ ءۇشىن سىرتقى ساياسي ۆەدومستۆو جانىنان جەدەل شتاب قۇرىلدى, ول تاۋلىك بويى ەلەكتروندىق پوشتاعا جانە جەدەل جەلى تەلەفوندارىنا كەلىپ تۇسەتىن ساۋالداردى قاراستىردى.
شتابتاعى جەدەل جەلىنىڭ ءۇش ءنومىرى دە – 72-00-46, 72-00-47, 72-05-49 جانە covid19@mfa.kz. ەلەكتروندى پوشتاسى ءالى جۇمىس ىستەپ تۇر.
«قر ءسىم ورتالىق اپپاراتى مەن شەت ەلدەردەگى مەكەمەلەر قىزمەتكەرلەرىنىڭ ۇيلەسىمدى جۇمىسى ارقىلى 2020 جىلعى 2 اقپاننان باستاپ قازىرگى كۇنگە دەيىن الەمنىڭ 72 ەلىنەن 33 مىڭنان استام قر ازاماتىن ەلگە قايتارۋعا جاردەم كورسەتىلگەن. وسى ماقساتتا 424 چارتەرلىك, ارنايى جانە تۇراقتى اۆياتسيالىق, اۆتوبۋس جانە پاروم رەيستەرى پايدالانىلدى. دەنساۋلىق ساقتاۋ مينيسترلىگىمەن جانە قورعانىس مينيسترلىگىمەن بىرلەسىپ, اۋىر سىرقاتتانعان قازاقستاندىقتاردى سانيتارلىق جانە اسكەري-كولىك اۆياتسياسىمەن جەتكىزۋگە كومەك كورسەتىلدى», دەلىنگەن مينيسترلىك حابارلاماسىندا.
ءسىم كورشىلەس مەملەكەتتەردىڭ ازاماتتارى ءۇشىن قازاقستان ارقىلى ترانزيتتىك دالىزگە (تەمىرجول جانە اۆتوبۋس كولىگىمەن) رۇقسات بەرۋدى تۇراقتى تۇردە ۇيىمداستىردى. شەت مەملەكەتتەرگە ولاردىڭ ازاماتتارى ءۇشىن رەپاترياتسيالىق اۋە رەيستەرىن جۇرگىزۋگە جانە قازاقستان اۋماعىنان گۋمانيتارلىق جۇكتى تاسىمالداۋعا كومەك كورسەتىلدى.
مىسالى, قر ءسىم كومەگىمەن ەلىمىزدىڭ اۋماعى ارقىلى 40 مىڭنان استام وزبەكستان ازاماتى, 13 مىڭنان استام قىرعىزستان ازاماتى جانە 3 مىڭنان استام تاجىكستان ازاماتى تاسىمالدانعان.
ء«سىم قىزمەتىندەگى بولەك بلوك رەتىندە – شەتەلدىك ارىپتەستەرىمىزدىڭ گۋمانيتارلىق كومەكتەرىن جەتكىزۋ, تاجىريبە الماسۋ ءۇشىن دەنساۋلىق ساقتاۋ سالاسىنداعى شەتەلدىڭ جەتەكشى ماماندارىمەن بەينەكونفەرەنتسيا جاساۋ ماسەلەلەرى تۇردى. سونداي-اق, سىرتقى ساياسي ۆەدومستۆونىڭ قىزمەتكەرلەرى وتاندىق مەديتسينا قاجەتتىلىكتەرى ءۇشىن بەلگىلى ءبىر ءدارى-دارمەك پەن ارنايى جابدىقتاردى جەتكىزۋ بويىنشا شەتەلدىك سەرىكتەستەرمەن كەلىسسوزدەر پروتسەسىنە تىكەلەي قاتىستى. مينيسترلىك مۇددەلى مەملەكەتتىك ورگاندارمەن بىرلەسىپ تج رەجيمى كەزەڭىندە قر مەملەكەتتىك شەكاراسىن كەسىپ ءوتۋ ءتارتىبىنىڭ جوباسىن ازىرلەدى. ەلدەگى توتەنشە جاعداي رەجيمى اياقتالعان سوڭ «2020 جىلعى 11 مامىردان باستاپ كارانتين شارالارى كەزەڭىندەگى قر مەملەكەتتىك شەكاراسىن كەسىپ ءوتۋ ءتارتىبى» پىسىقتالىپ, قابىلداندى», دەيدى مينيسترلىك.
