رۋحانيات • 14 ناۋرىز، 2021

بۇگىن 14 ناۋرىز – كورىسۋ كۇنى

310 رەت كورسەتىلدى

بۇگىن، 14 ناۋرىز – كورىسۋ كۇنى. بۇل كۇندى امال مەرەكەسى دەپ تە اتايدى. ادامدار وسى كۇنى بۇرىنعى وكپە-رەنىشىن كەشىرىپ، ءبىر-بىرىنە اماندىق-ساۋلىق تىلەيدى. كورىسۋ كۇنىندە جاسى كىشى ادام ۇلكەن كىسىنىڭ ۇيىنە بارىپ كورىسىپ شىعادى. مىندەتتى تۇردە كەم دەگەندە ءۇش ءۇيدىڭ ەسىگىن اشۋ كەرەك دەگەن ىرىم بار. اسىرەسە قۇدايى كورشىگە الدىڭعى رەتتە كىرىپ شىققان ءجون، دەپ جازادى Egemen.kz

شىعىس ەلدەرىنىڭ  كەزىندەگى كۇنتىزبەسى بويىنشا ناۋرىزدىڭ باستالۋى حامال (امال) ايىنىڭ 1 جۇلدىزى بولىپ ەسەپتەلەدى. حامال دەپ وتىرعانىمىز توقتى شوقجۇلدىزىنىڭ ەسكى پارسىشا اتاۋى. كۇن مەن ءتۇن تەڭەلىپ، امال كىرگەن ساتتە توقتى شوقجۇلدىزى تۋادى دەگەن ۇعىم قالىپتاسقان.

«ناۋرىز» ءسوزى «جاڭا كۇن» دەگەندى بىلدىرەدى. ەرتەدە قازاق بۇل كۇندى «ناۋرىز» دەمەي «امال» دەگەن. بۇل سوزدەردىڭ ايىرماشىلىعى جوق دەۋگە بولادى. ال بۇل قازىرگى كۇنتىزبە بويىنشا 14 ناۋرىزعا سايكەس كەلىپ وتىر.

كورىسە وتىرىپ، ءبىر-بىرىنە ء«بىر جاسىڭمەن!»، «جاسىڭ قۇتتى بولسىن!»، «جاسىڭ قايىرلى بولسىن!» دەپ ايتۋ كەرەك. ادامدار ءۇي ءىشىن جۋىپ، تازالاپ، اۋلانى دا رەتكە كەلتىرىپ قويادى. 

14 ناۋرىز كۇنى تاڭ بىلىنە باستاعاندا ەشكىم ۇيىقتاپ جاتپاۋى كەرەك. اسىرەسە قارتى بار ۇيلەر ەرتە ويانىپ، كورىسىپ شىعاتىن ادامداردى كۇتىپ وتىرادى.  مىندەتتى تۇردە ءار ءۇي داستارقانىن تولتىرىپ، بار ءتاتتىسىن قويىپ، باۋىرساق، جەتى شەلپەك پىسىرەدى.

كورىسۋ كۇنىنە ەشكىم ارنايى شاقىرىلمايدى، جايىلعان داستارحان جيىلمايدى. ادامدار ءبىر-بىرىنە تۇسكە دەيىن كورىسىپ شىعۋعا تىرىسادى. تۇسكە دەيىن ناعىز مەيرام سەزىلەدى. ال كەشىگىپ قالعاندار بولسا، بىرتىندەپ كەشكە دەيىن كەلە بەرۋىنە بولادى. 

كورىسە كەلگەن ادامدار (كوبىنە كىشكەنتاي بالاقايلار) كورىسىپ شىققان ءۇيىنىڭ داستارقانىنان ءدام الىپ كەتەدى. ادامدار جاڭا نە تازا كيىم كيەدى. وكپە-رەنىشتى ۇمىتىپ، كورىسۋ كۇنىندە ادامدار ءبىر-بىرىمەن تابىسادى. كورىسە شىققان ادامدى قاباق شىتپاي كوتەرىڭكى كوڭىل كۇيمەن قارسى الىپ، داستارقانعا شاقىرادى. 

بىرەۋدەن قارىز العان بولسا، قارىزىن وسى كۇنگە دەيىن يەسىنە بەرىپ تاستاۋعا تىرىسادى. كورىسۋ كۇنىنىڭ ءراسىمى بويىنشا ەر ادامدار قۇشاقتاسىپ، ءتوس تۇيىستىرەدى، ايەلدەر بولسا، قۇشاقتاسىپ، بەتتەرىنەن ءسۇيىپ كورىسەدى. تەك كەلىندەردىڭ اتالارىمەن جانە قايىناعالارىمەن كورىسۋلەرىنە بولمايدى دەگەن ىرىم بار. 

بۇل كۇنى ەشكىم ەشكىمگە رەنجىمەي، جايدارى ءجۇرۋ كەرەك. كورىسۋگە كەلمەگەن ادامعا «كورىسىپ شىقپادى» دەپ رەنىش ءبىلدىرۋ ورىندى سانالادى. 

ەندەشە، بەرەكە مەن بىرلىكتىڭ مەيرامى كورىسۋ كۇنى قۇتتى ءبولسىن! بىر جاستارىڭىزبەن!

سوڭعى جاڭالىقتار

ۇقساس جاڭالىقتار