وسى تۇرعىدان كەلگەندە, ونىڭ ارقادان شىققان ءسوز شەبەرلەرىمەن بايلانىسى ارنايى زەرتتەۋدى قاجەت ەتەتىن سياقتى. بۇل جولعى ءبىزدىڭ ماقساتىمىز – تىلگە تيەك بولا بەرمەيتىن وسى ماسەلەگە قىسقاشا عانا شولۋ جاساپ ءوتۋ.
جاكەڭنىڭ ارقا اقىندارىمەن العاشقى جاناسۋى اتاقتى شوجەمەن كەزدەسۋى دەسەك, ءومىر شىندىعىنان الىس كەتپەيتىن سياقتىمىز. كەزىندە ءوز ەلىندە اتاعى شىققان اۋىزشا پوەزيانىڭ وكىلى – جامبىلعا مۇمكىندىگىنشە ىقپالىن تيگىزگەن ايتىس اقىندارىنىڭ ءبىرى.
الىستان سىزدىقتاپ داۋىسى جەتىپ جاتاتىن بۇل كىسىنىڭ جەتىسۋ ولكەسىنە كەلگەنىن ەستىپ, جامبىل سالەم بەرۋ ءۇشىن ارنايى ءوزى ىزدەپ بارادى دا, ءبىراز ۋاقىت جانىندا ىلەسىپ جۇرەدى. جاس جاعىنان العاندا, جامبىلدان ەداۋىر ۇلكەن شوجە – ءبىر جاعى كوزىنەن كەمتارلىق كورگەن جان. وسىنداي ادامنىڭ ايتىسكەرلىگى ءسوز ونەرىنىڭ جاس پەرىسى ءۇشىن ءبىر جاعى قىزىق تا بولىپ كورىنگەن ءتارىزدى.
وسىنداي ساپارلاس بولعان كەزدەرىندە جامبىل ارقانىڭ اتاقتى اقىنىنىڭ كەمپىربايمەن ايتىسىن ۇيرەنىپ الىپتى. ءسويتىپ كەيىننەن جۇرگەن جەرىندە سول ايتىستىڭ ۇزىندىلەرىن ايتىپ, سوزقۇمار جۇرتشىلىقتىڭ قۇلاق قۇرىشىن قاندىرىپ وتىرادى ەكەن. شوجەنىڭ ادام رەتىندەگى قىزىق مىنەزدەرىن دە قالت جىبەرمەيدى. ونىڭ ولەڭ ايتۋ بارىسىندا كەيدە تۇتىعىپ قالاتىن ادەتى, ويلانعان ساتتەگى كوز قۇبىلىسى, دومبىرا قاعىسى نازار اۋداراتىنداي وزگەشە كورىنەدى. اقىننىڭ وسىنداي ەرەكشەلىكتەرىن وزىنشە قايتالاپ, جامبىل ءبىر جاعى تىڭداۋشىلارىن كۇلدىرگەنگە ۇقسايدى.
ەل اۋزىنداعى كەيبىر اڭگىمەلەر وسى ساپارلار كەزىندە جامبىل شوجەگە ەرىپ, قىرعىز ەلىنە بارىپ قايتقان دەگەن دە اڭگىمە بار.
اي قاسىندا تۋادى شولپان جۇلدىز,
ايدىن كولدە وينايدى كامشات, قۇندىز.
ءوز اتاسىن جاسىرعان مۇردەت دەگەن
ەتىم قازاق بولعاندا, ءتۇبىم قىرعىز,
دەپ ولەڭدەتكەنىنە قاراعاندا, شوجەنىڭ ارقا جاققا اۋعان قىرعىز تۇقىمىنان بولۋى ابدەن ىقتيمال نارسە. ويتكەنى قازىرگى قارقارالى اۋماعىندا (بۇرىنعى قاراعايلى اۋدانى) قىرعىز اتىمەن اتالاتىن اۋىلدار ءالى دە بار.
...ءبىر جىلدارى ارقا ەلىنەن «بالۋان شولاق» اتانىپ كەتكەن اتاقتى ونەرپاز نۇرماعامبەت كەلىپتى دەگەن حابار دۇڭك ەتە قالادى. ول كىسى ءسارىۇيسىن قالي بايدىڭ ۇيىندە قوناق بولىپ جاتقان كورىنەدى. بۇل ەپيزود س.مۇقانوۆتىڭ «بالۋان شولاق» پوۆەسىندە قىزىقتى باياندالعان. قاليدىڭ ءوزى دە اسا زور كۇشتىڭ يەسى بولىپتى. ۇيىنە كەلگەن كەيبىر قوناعىن, اسىرەسە ءبىر كىسىلىك كۇشى بار-اۋ دەگەن جىگىتتەردى كورگەندە, ەكى قولىنىڭ ۇشىمەن قاقپاقىلداپ, تاسشا بىرەسە ول جاعىنا, بىرەسە بۇل جاعىنا قويىپ, ويناتادى ەكەن دەيدى.
ءوزى ءانشى, ءوزى بالۋان وسىنداي ەرەكشە تۇلعالى ادامدى تاماشالاۋعا كىم قىزىقپاسىن. جامبىل دا ۇيىندە جاتا الماي, ارنايى كەلىپ كەزدەسكەن. جانىنا اتاقتى ماقىش بالۋاندى, سادىبەك دەگەن اقىندى ەرتىپ الادى دا, قالي بايدىڭ وتىرعان قونىسى توپار بويىنا قاراي جولعا شىعادى. بۇل ارا سول زامانداردا سارىۇيسىندەردىڭ جەرى بولسا كەرەك.
جامبىل سول جولى بالۋان شولاقتىڭ ونەرىن تاماشالاپ, قاسىنان كەتە الماي, بىرەر كۇن اينالسوقتاپ قالىپتى. ونەرىنە ءسۇيسىنىپ, ءتانتى بولعان قىزىقتاۋشىلار ونەرپازدىڭ انىنە قانىپ, بويىن كەرنەگەن كۇشىنىڭ دە قانداي ەكەندىگىنە كوز جەتكىزەدى. سونىمەن بىرگە ونەرپاز قوناقتىڭ ءوز باسىنان كەشكەن اڭگىمەلەردى دە جىر قىلىپ ايتىپ, جۇرتتى اۋزىنا قاراتسا كەرەك. سوندا ولارعا كوپ اسەر ەتكەن – بالۋان شولاقتىڭ ورىس وتارشىلدارىنا قورىقپاي قارسى شىعىپ, جاساعان ەرلىكتەرى ەكەندىگى ءسوزسىز. قىرعىز, قازاقتىڭ سان باتىر بالۋانىن, سولاردىڭ ىشىندە كەنەسارىنىڭ سىزدىعىن دا ءوز كوزىمەن كورىپ, سۇقباتتاسقان جامبىل بالۋان شولاققا ابدەن ءتانتى بولىپ قالسا كەرەك.
جامبىلدىڭ جاس كەزىندە ەپتەپ سال-سەرىلىك قۇرىپ اتى شىققان شاشۋباي اقىنمەن كەزدەسۋىنىڭ ءوزى ءبىر جوسىن. بۇل ۇشىراسۋ ادەتتەگىدەي ءبىر قالىپتى جايباراقات وتپەگەن. قازاقتىڭ جەرشىلدىگىنە, رۋشىلدىعىنا ءتان درامالىق سيپاتتار دا ورىن الىپتى.
سول ۋاقىتتاردا جاكەڭنىڭ ولەڭگە سيرەك بارىپ, ءبىر توقتالىپ جۇرگەن كەزدەرى ەكەن دەيدى.
شاشۋباي جەتىسۋ جەرىنە قاراي قىسقى ۋاقىتتاردا ساپار شەگىپتى. سوندا ول قاتىپ جاتقان بالقاش كولىنىڭ ۇستىمەن مۇز ارقىلى وتكەن دەگەن ءسوز بار. سودان شۋ, ىلە وزەندەرىن بويلاپ, ەلدى ارالاي ءجۇرىپ, ءبىر ۋاقىتتاردا الماتى (ول كەزدە ۆەرنىي) قالاسىنا دا باس تىرەيدى. بۇل قالاداعى قازاق بايلارىنىڭ ىشىندە ءتۇبى سول ارقا جاقتان قونىس اۋدارعان بايبۇلان, بايمولدا دەگەندەر بولادى ەكەن. وسى ەكەۋىنەن باسقا اتاققا شىققان قازاق زاڭگەرى بارلىبەك سىرتتانوۆتى دا تاۋىپ الادى. شاشۋبايدىڭ ءسويتىپ ۇلكەن شاھاردا كوبىرەك ءۇيىر بولعانى وسى كىسىلەرى كورىنەدى.
سىرنايىن سوزا تارتىپ, قۇلاقتاردى ەلەڭدەتكەن اق شالبارلى, اق كەمزالدى, قارا تاقيالى كەلىستى جىگىتتىڭ ماڭىنا قالالىق قازاقتار ۇيىرىلە قالادى. ونىڭ ۇستىنە ورتالىق قازاقستاننىڭ ءان مەكتەبىنىڭ وكىلى رەتىندە شاشۋبايدىڭ شىرقاپ سالاتىن ءان اۋەنى دە, بۇل جاقتا ايتىلا بەرمەيتىن جىر ماقامى دا بولەك. جەتىسۋ ەلىن اۋزىنا قاراتقان ول:
قىزىلجار, قارقارالىدان
كەلىپ ءجۇرمىن,
ەلدەرىن ۇلى ءجۇزدىڭ كورىپ ءجۇرمىن,
اۋزىمدا ولەڭ دەگەن مالەگىم بار,
اركىمگە سويلەپ-سويلەپ بەرىپ ءجۇرمىن, دەپ توقسان تولقىتىپ, ءانىن الاتاۋ شوقتىعىنان اسىرادى.
ول وسىلايشا ءوز ەلىنەن شىعىپ, وسى جاققا ءسىڭىپ كەتكەن قالا بايلارىن كوتەرە ماقتاي وتىرىپ, جەتىسۋلىقتاردى ەپتەپ جەرگە قاراتقانداي بولىپتى. وسى وقيعانى ەسكە الا كەلىپ: «قالىڭ ۇلى ءجۇزدىڭ ىشىندە ءبىرلى-جارىم اۋىسىپ كەپ قاتارعا ىلىنگەن ارعىندى ماقتاۋ ۇلى ءجۇز ادامدارىنىڭ نامىسىنا تيەدى. ولاردىڭ نامىسىنا تيگەن سايىن ءوزىمشىل, باي, ماقتانكۇمار شەنەۋنىكتەر شاشۋبايعا وزدەرىن كوتەرمەلەتە تۇسەدى. سول كەزدەگى ۇلى ءجۇز ەلىنىڭ, ونىڭ ىشىندە شاپىراشتى, دۋلاتتىڭ باقيا, بارلىبەك تۇستاس كىسىلىكتى جىگىتتەرى ارعىننان كەلگەن اقىنعا قارسى ايتىستىراتىن اقىن ىزدەپ, ءسوز ەسەسىن قايتارىپ, ارعىننىڭ اپتىققان باي, اسقاقتاعان قارا تاياعىنا (وقىعاندارىنا) وزدەرىنشە قىر كورسەتپەكشى بولادى», دەيدى س.بەگالين.
وسى جاعداي قۇلاقتارىنا ءتيىپ, نامىستانعان ۇلى ءجۇز ادامدارى بۇل كەزدە اتاققا شىعىپ جۇرگەن جامبىلدى الماتىعا الدىرادى. سونداعى ويلارى – شالقي شاپشىعان شاشۋبايدىڭ ايتقان سوزدەرىنە وزدەرىنىڭ ارقالى اقىندارىن قارسى قويماق ەكەن.
زاتى ارعىن بولىپ كەلەتىن بايبۇلان باي: «تاماشا مەنىڭ ۇيىمدە بولسىن» دەپ ۇسىنىس جاسايدى.
ءوزى دە ەرەكشە كيىنگەن سىمباتتى جىگىت سىرنايىن سوزا تارتىپ قۇبىلتقان كەزدە ءۇيدىڭ ءىشى ەرەكشە سانگە, شالقىعان انگە تولىپ تۇرادى. بۇل كورىنىستىڭ ءوزى-اق تاماشالاۋشىلارعا ەرەكشە اسەر ەتسە كەرەك.
سول زاماندارداعى وسى ءوڭىر بولىسى ماڭكە بىرگە ىلەسە كەلگەن ەكەن, سول اقىرى شىداي الماي: «جامبىل-اۋ, مىنا ارعىن ءبىزدى ءولتىردى عوي, ەندى قاشان» دەگەندە, جامبىل: «ايتا ءتۇسسىن, ايتقانىمەن قايدا بارار دەيسىڭ» دەپ شايىن ءىشىپ وتىرا بەرىپتى دەيدى.
ارقالانىپ العان شاشۋباي توقتاماستان, سىرنايىن كەرە, سارناتىپ وتىرىپ, ءبىراز جەرگە بارىپ قالسا كەرەك.
جامبىل شايىن ءىشىپ بولىپ, دومبىراسىن الىپ, كيە جونەلدى:
شاشۋباي, سەن ءبىر ارقادان قاشىپ
كەلگەن جالاڭ اياق,
جەل ءسوزدى نە قىلايىن سەنەن اياپ.
ءتىلىڭدى اڭداپ ايت تا, بايقاپ سويلە,
تيمەي مە, بۇيتە بەرسەڭ, ساعان تاياق.
شاشۋجان, سەن كوكشەتاۋ,
قىزىلجاردان كەلىپ ءجۇرسىڭ,
ديدارىن جاقسىلاردىڭ كورىپ ءجۇرسىڭ,
– دەپ كەلىپ, بايبۇلاننىڭ قالاي بايىپ كەتكەنىن مىسقىلمەن جىرىنا قوسادى. سويتسە بۇل ءۇيدىڭ يەسى ساۋدامەن الدەنىپ العان پىسىقتاردىڭ ءبىرى بولسا كەرەك. ول زامانداردا ايتىسكەرلەردىڭ ءبىر-بىرىنە سوزدەن جەڭىلىپ قالماۋ ءۇشىن ءبىر-بىرىنە باتىرا ءتيىسۋى, كەيدە ءتىپتى دورەكى سوزدەردى دە ايتىپ جىبەرۋى اسا وعاشتىق بولىپ سانالماعان. بۇعان كوپتەگەن ايتىستاعى جەكە باسقا تيىسە-قاعىتا ايتىلاتىن مىسالدار كۋا.
جامبىلدىڭ ۇتىمدى, دالەلدى سوزدەرىنە توقتاي قويماعان شاشۋباي ءتىپتى ارىنداپ, ارقالانىپ الادى. ەندى ونىڭ سوقتىعىپ, تىلگە تيەك ەتكەنى – اقىنعا ىلەسە كەلگەن شاپىراشتى كىسىلەرى:
ءبىر كوزى ساميجاننىڭ قيسىق ەكەن,
بايباتشاڭ ماڭكەمەنەن پۇشىق ەكەن.
بولعاندا ءبىرىڭ ويقى, ءبىرىڭ شويقى,
بارىندە باپ كەلىسىپ وتىر ەكەن دەپ, تازا مازاقتاۋعا كوشكەن سىڭاي تانىتادى.
ءوز كەزەگى تيگەندە جامبىل قوناقتار مەن بايلاردىڭ اراق-شاراپ ءىشىپ وتىرعانىن تىلگە تيەك قىلىپ, «بۇيتە بەرسەڭدەر, توزاققا ءبىر-اق باراسىڭدار» دەگەن سىڭايدا باتىرا ايتىپ جىبەرەدى.
وسىنى ەستىگەن كەزدە ءوزى دە ىشىمدىك ءىشىپ قىزىپ وتىرسا كەرەك, ورىسشا كيىنگەن ءبىر جىگىت جامبىلعا قاراي تۇرا جۇگىرىپ, جۇرت اراشالاعانشا قول جۇمساپ جىبەرگەن ەكەن دەيدى. سودان ماڭكە بولىس باستاعان قوناقتار اراشا ءتۇسىپ, ءۇيدىڭ ءىشى تۇرا شارتتا-شۇرت توبەلەس بولىپ كەتەدى. جۇرتشىلىق قىزىقتاپ وتىرعان اجەپتاۋىر ايتىستىڭ دا بەرەكەسى قاشادى. امال جوق, ءۇي يەلەرى شاشۋبايدى باسقا ۇيگە اۋىستىرىپ, ايقاي-شۋدى توقتاتقانداي بولادى.
«ەر شەكىسپەي, بەكىسپەيدى» دەگەن ەمەس پە, جامبىل مەن شاشۋباي ارتىنشا دوستاسىپ, وتە جاقىن بولىپ كەتكەن كورىنەدى. جاستارىنىڭ ايىرماشىلىعى دا بوگەت بولا الماعان. جامبىل شاشۋبايدان جيىرما جاستاي ۇلكەن بولسا كەرەك. ارقانىڭ بۇل اقىنىنان ول شورتانباي, دۋلاتتىڭ جىرلارىن ۇيرەنىپ, جاتتاپ العان.
1930 جىلدىڭ كوكتەمىندە قازاقستاننىڭ قۇرىلعانىنا 10 جىل تولۋىنا بايلانىستى مەرەكەلى جيىن وتەدى. وسى مەرەكەگە قاتىسقان كەنەن ازىرباەۆ توي وتكەن كۇننىڭ ەرتەڭىنە ساكەن سەيفۋلليننىڭ جامبىلدى ۇيىنە شاقىرعانىن جىرداي قىلىپ ايتادى ەكەن. ونى جاكەڭ ءوزى بىرگە ەرتىپ بارىپتى. سول ءبىر ەپيزودتى كەنەن بىلايشا اڭگىمەلەپ بەرگەن ەكەن:
«سالەمدەسىپ, قالجىڭداسىپ, حال-جاي سۇراسىپ العان سوڭ ساكەن ماعان قاراپ:
– كەشەگى توي ۇستىندە ايتقانىڭ قۇلاعىما جاعىپ بارادى. سونى تاعى ءبىر شىرقاشى؟ – دەدى. مەن شاي الدىندا «قازاقستان» دەگەن سول تويعا ارناپ ايتقان ءانىمدى شىرقادىم. اس-سۋ ءىشىپ بولعان سوڭ ساكەن جامبىلدان جاي سۇرادى. جامبىل دومبىراسىن شەرتە وتىرىپ ءسوز باستادى. ءبىز تىڭداي قالدىق:
شىركىن, كارىلىك كەلدىڭ عوي كەزىمەنەن,
كەلىن جامان قارايدى كوزىمەنەن.
مىنەكەي دەپ قولىمەن ۇرماسا دا,
ۇرعانداي عىپ كەتەدى سوزىمەنەن...
مەن بۇل ءسوزدى تاني كەتتىم. ىشىمنەن ء«سۇيىنباي عوي» دەپ وتىرمىن. جاكەڭ: «جيىرمادا جەلدەي بولدىم, وتىزىمدا بەلدەي بولدىم, ەلۋىمدە ءتۇبىم تەرەڭ قۇراقتى كولدەي بولدىم» دەپ شۇبىرتا جونەلدى... ال ساكەن بولسا قالامىن سۋسىلداتىپ جازىپ وتىر. جاكەڭ جىرىن توقسانعا تىرەپ توقتادى. ساكەنگە قاراپ: ء«سۇيىنباي ايتقان ەكەن, مىنە, ءبىز دە سونداي بولدىق بۇگىندە» دەپ جاكەڭ سالالى ساقالىن سيپاپ قويدى. شاي ءىشتى, جاكەڭ دومبىراسىنىڭ قۇلاعىن قايتا بۇرادى. بۇل جولعى داۋسى كوتەرىڭكىلەۋ شىقتى. ءيا, سوندا ۇستازىم «جاباي باتىردى» بىلاي جىرلاعان ەدى:
ون سان نوعاي ب ۇلىنگەندە,
ورمامبەت حان ولگەندە,
قىرىق جىلداي اتىسقان,
قىزىل قانعا باتىسقان.
نايزامەنەن سوعىسقان,
قىلىشپەنەن شابىسقان,
ايبالتامەن قاعىسقان...
جاكەڭ وسىلايشا سىلتەي بەردى, سىلتەي بەردى. ساكەن دە جازعىش-اق ەكەن, قاعازدىڭ ءبىراز بەتىن اۋدارىپ تاستادى. مەنىڭ جانىمدا وتىرعان ساكەننىڭ ءىنىسى ءماجيت تە ء«وزى ەرەسەن باتىر ەكەن-اۋ» دەپ قويادى».
كەنەن ازىرباەۆ ەستەلىگىنىڭ وسى ۇزىندىسىنەن-اق ونىڭ جامبىلعا دەگەن ىقىلاسىن, ساكەن سەيفۋللين مەن جامبىلدىڭ ءبىر-بىرىنە دەگەن سىيلاستىق سەزىمىن انىق تانۋعا بولارلىق. بارىمىزگە بەلگىلى, قازاق ادەبيەتىنىڭ الىپتارىنىڭ ءبىرى ءارى اتاقتى قوعام قايراتكەرى ساكەن سەيفۋللين – ارقانىڭ جاڭاارقا جاعىنىڭ تۋماسى.
1934 جىلدىڭ كوكتەمىندە وراز جاندوسوۆ جامبىلدى اۋىلىنان الماتىداعى ۇيىنە الىپ كەلىپ, قوناق قىلىپتى. سونىمەن بىرگە رەسپۋبليكانىڭ ءار تۇكپىرىنەن كەلگەن حالىق اقىندارىن دا شاقىرسا كەرەك. اتاپ ايتقاندا, قاراعاندى وبلىسىنان دوسكەي الىمباەۆ, اقتوبە وبلىسىنان نۇرپەيىس بايعانين, قوستاناي وبلىسىنان ورىنباي تايمانوۆتار جاندوسوۆ داستارقانىنان ءدام تاتىپتى. ولاردىڭ ارقايسىسى قۇتتىقتاۋلارىن ءوز جاندارىنان شىعارىپ, ولەڭمەن جەتكىزەدى.
بۇل كەزدە اتى ەندى شىعا باستاعان جاس اقىن قاسىم امانجولوۆ «جامبىل تويىنا» دەپ اتالاتىن پوەماسىنان ءۇزىندى وقىعان ەكەن.
1938 جىلى جاكەڭ شىعارماشىلىعىنىڭ 75 جىلدىعى تويلانىپ, وعان جان-جاقتان اقىندار اعىلىپ كەلەدى. سولاردىڭ ىشىندە شاشۋباي قوشقارباي ۇلى دا بولعان. كوپتەن كەزدەسپەگەن اقىندار شۇرقىراسا تابىسىپ, قالجىڭ دا قاعىستىرادى.
اقىن ءماريام حاكىمجانوۆانىڭ ايتۋىنشا, ءبىر ارەدىكتە جاكەڭ:
«شاشۋباي! قازىر باياعىداي توبەڭمەن جۇرە الاسىڭ با؟» دەپ سۇراپتى. شاشۋباي تەك ءانشى, اقىن, جىرشى, كومپوزيتور عانا ەمەس, تسيرك شەبەرىنە ءتان توسىن ونەر تۇرلەرىن دە كورسەتە الاتىن بولعان. توبە قۇيقاسىن جىبىرلاتىپ, ماڭدايىنا دەيىن اكەلە الادى ەكەن.
«توبەممەن ءجۇرۋ قازىر قيىنداۋ. بىراق تىك تۇرىپ كورۋگە بولادى» دەگەن شاشۋباي جاكەڭنىڭ ءوتىنىشىن جەردە قالدىرماي, انادايدان جۇگىرىپ كەلىپ, جاكەڭنىڭ الدىندا توبەسىمەن تىك تۇرا قالىپتى. «ودان كەيىن قۇرىقپەن دە ونەر كورسەتكەنىنە كۋا بولدىق» دەيدى ءماريام اپامىز.
سول ۋاقىتتاردا شاشۋباي 73 جاستا ەكەن.
سولتۇستىك قازاقستان وبلىسىنىڭ تۋماسى, ءسابيت مۇقانوۆتىڭ جەرلەسى ءارى قۇرداسى اقىن جاقان سىزدىقوۆ ءوز ەستەلىگىندە: «1938 جىل. اپرەل, ماي, يۋن ايلارى, دەپ ەسكە الادى. – مەن موسكۆا قالاسىندامىن. بۇل جولعى ساپارىمنىڭ ماقساتى – جاكەڭنىڭ ولەڭدەر جيناعىن باستىرۋ ەدى. اقىننىڭ جيناعىن باستىرۋ ءارى رەداكتورلىق مىندەتىن اتقارىپ, مەزگىلىندە قاداعالاپ شىعارۋ ماعان جۇكتەلگەن بولاتىن-دى. بۇل كىتاپتى قالاي دا بولسا, جاكەڭنىڭ ادەبي ەڭبەگىنە 75 جىل تولعان تويىنا ۇلگەرۋ كەرەك بولدى. ۋاقىت تىعىز. جۇمىس قاۋىرت. كۇن سايىن الماتىدان:
– جاقان-اۋ, كىتاپتى قاشان ۇلگەرتەسىڭ؟ قاشان باسىلادى؟ تويعا ۇلگەرەسىڭ بە؟ تەز ءبىتىرۋ كەرەك! – دەگەن تەلەفون سىلدىرى, اسىعىس تەلەگراممالار ءۇستى-ۇستىنە سوعىلادى» دەيدى. وسىلايشا جامبىل شىعارماشىلىعىنىڭ 75 جىلدىعىنا ارنالعان كىتاپتى شىعارامىن دەپ ءجۇرىپ, جاقان سىزدىقوۆ الماتىداعى تويعا قاتىسا الماي قالىپتى. موسكۆادا باسىلىپ شىققان كىتابىن جامبىلدىڭ وزىنە قالاي كورسەتكەنىن قىزىقتى قىلىپ اڭگىمەلەپ بەرەدى.
– ءسويتىپ ەلگە كەلگەننەن كەيىن كەشىگىپ بولسا دا, كىتاپتىڭ ون داناسىن اۆتوردىڭ وزىنە اكەپ بەرەدى. كىتاپقا جامبىلدىڭ جەتپىستەي ولەڭى كىرگەن ەكەن, بەتىنىڭ سانى 228 بولىپتى. جاكەڭ ءتىپتى كىتاپتىڭ باعاسىن دا سۇراپ الىپ, جاقاننىڭ وزىنە «مىنانداي ولەڭدەرىمدى وقىپ بەرشى» دەپ تەكسەرگەن دە كورىنەدى. ءسويتىپ كىتابى ءۇشىن ءبىراز اۋرەگە ءتۇسىپ, ەڭبەك سىڭىرگەن اقىن جىگىتتى قوناق قىلىپ, كوڭىلىن كوتەرىپ جىبەرگەن.
مىنە, جاكەڭنىڭ ارقانىڭ ايتىسكەر ءارى جازبا اقىندارىمەن قارىم-قاتىناسىنا بايلانىستى جەكەلەگەن مالىمەتتەر وسىنداي. بۇل تاقىرىپتى ءارى قاراي زەرتتەي تۇسكەن جاعدايدا باسقا دا نازار اۋدارارلىق مالىمەتتەردىڭ شىعىپ قالۋى ابدەن ىقتيمال.
نۇرداۋلەت اقىش,
جازۋشى, فيلولوگيا
عىلىمدارىنىڭ دوكتورى
