يۋنەسكو ۇيىمىنىڭ دەرەگىنە قاراعاندا, كوروناۆيرۋس كۇشەيگەن كەزدە دۇنيە جۇزىندەگى 1,5 ملرد بالا ۇيدەن وقىدى. ويتكەنى سول ۋاقىتتا 167 ەل مەكتەپتەرىن ۋاقىتشا جاپتى. سونىڭ ىشىندە ءبىزدىڭ ەلىمىز دە بار.
ال ناق وسى ءسات بارىمىزگە ساباق بولدى. سەبەبى پەداگوگ قاۋىمنىڭ قادىرىن بىلدىك. كارانتيننىڭ كەسىرىنەن بالالارىمىز مەكتەپكە, بالاباقشاعا بارا الماي قالعاندا, بارلىق جاۋاپكەرشىلىك وزىمىزگە جۇكتەلدى. بالالاردىڭ ساباعىن وقىتتىق. مۇعالىمدەردىڭ بارلىق مۇمكىندىكتى (zoom, WhatsApp, تەلەديدار) پايدالانىپ بەرگەن ءۇي تاپسىرمالارىن ورىنداتتىق. سوندا پەداگوگتىڭ ورنى ويسىراپ تۇرعانىن, ونىڭ تىكەلەي تۇسىندىرگەنى, قيىن نارسەنىڭ ءوزىن ۇعىندىرىپ جىبەرەتىن ۇستازدىڭ ءسوزى مەن ءۇنى, ءتىپتى ميميكاسى جەتىسپەيتىنىن بىلدىك.
شىنى كەرەك, باسىندا اتا-انا رەتىندە بالالارىمنىڭ بولاشاعىنا الاڭداپ, «بۇل قالاي بولار ەكەن؟» دەگەن وي مازالادى. بىراق ناعىز ۇستازدار بالاعا ءبىلىم بەرۋ ءۇشىن جاعداي تاڭدامايدى ەكەن. الماتى قالاسىنداعى №181 مەكتەپتىڭ 3-سىنىبىندا وقيتىن قىزىمنىڭ مۇعالىمى اقنۇر ساكەنقىزى قانداي جاعداي بولسىن ءبىلىم بەرۋدى توقتاتپادى. ءار بالامەن جەكە قارىم-قاتىناس ورناتۋعا ۋاقىت تاۋىپ, تۇسىنبەگەن جەرىن قايتادان ءتۇسىندىرىپ, ءاربىر ءۇي تاپسىرماسىنا بولەك باعا بەرىپ وتىردى. ءبىلىم جانە عىلىم ءمينيسترى اسحات ايماعامبەتوۆ كارانتين كەزىندە مۇعالىمدەردىڭ جۇكتەمەسى ەكى ەسە ارتقانىن ايتىپ ەدى. راسىندا دا, بۇرىن 45 مينۋتتا وتەتىن ءبىر ساباقتا 25 وقۋشىعا جاڭا تاقىرىپتى ءوتىپ, سول جەردە بىردەن كەرى بايلانىس ورناتىپ الاتىن مۇعالىمدەر قاشىقتان وقىتۋ كەزىندە 25 بالاعا 25 رەت ساباق وتكەنمەن تەڭدەي جۇمىس ىستەدى. بۇل دەگەنىڭىز – وراسان زور كۇش-جىگەردى قاجەت ەتەتىن اۋىر جۇمىس.
وسى رەتتە مەن ءبىر ولقىلىقتىڭ ورنىن تولتىرعىم كەلەدى. ءبىز پەداگوگ قاۋىمنىڭ ىشىندەگى كوبىنەسە ەلەۋسىز قالىپ قويا بەرەتىن, الايدا ەڭبەگى ولشەۋسىز تاربيەشىلەردىڭ باعاسىن بىلە بەرمەيتىن سەكىلدىمىز. مويىندايىقشى, بۇعان دەيىن كوبىمىز بالاباقشانى جۇمىستان كەلگەنشە بالانى قالدىرىپ كەتەتىن جەر دەپ قابىلداپ كەلدىك. تيىسىنشە ونداعى تاربيەشىلەردى بالاعا قارايتىن قىزمەتشى رەتىندە كوردىك. وڭتۇستىك استانامىزداعى №150 بوبەكجاي-بالاباقشاسىنا باراتىن 4 جاسار ۇلىمنىڭ تاربيەشىلەرى ساندۋعاش التىنبەكقىزى مەن ينديرا قۇرمانعازيقىزى بەكىتىلگەن ستاندارت نەگىزىندە دايىنداعان وقۋ باعدارلاماسىنىڭ قانداي جاعدايدا دا توقتامايتىنىن ايتتى. ولاردىڭ ءسوزىن سالقىن قابىلداعانىممەن, كەيىن ونىڭ دۇرىستىعىنا كوزىم جەتتى. ويتكەنى قىزىم ءوز قۇرداستارىمەن بىرگە جاساعان جۇمىستارىن كورسەتىپ, كۇندەلىكتى بالاباقشادا نە ۇيرەنگەنىن ايتىپ بەرەدى. تاربيەشىلەر – ەڭ الدىمەن بالالارعا ومىرگە ەڭ قاجەتتى داعدىلاردى ۇيرەتەتىن, ساۋاتىن اشىپ, جاسىنا سايكەس ءبىلىم بەرەتىن, مەكتەپكە دايىندايتىن تۇلعالار ەكەنىنە كوزىم جەتتى. ولاردىڭ دا اۋىر ەڭبەگىن ءتۇسىنىپ, ءادىل باعالاي بىلگەنىمىز ءجون ەكەن.
رۋزاننا مۋسينا,
اتا-انا
الماتى
