پەتروپاۆلداعى س.مۇقانوۆ اتىنداعى قازاق سازدى-دراما تەاترى ءبىر جىلدىق ۇزىلىستەن كەيىن ءوز كورەرمەندەرىمەن قاۋىشتى. كارانتين ۋاقىتىندا قول قۋسىرىپ وتىرماي, ابايدىڭ ىلىمىنە نەگىزدەلگەن مازمۇنى تەرەڭ, ماعىناسى زور قويىلىمدى ساحناعا ازىرلەدى. ونەر سۇيەر قاۋىمنىڭ نازارىنا «تولىق ادام» سپەكتاكلىن ۇسىندى.
«اباي قۇنانباەۆتىڭ «جۇرەگىڭنىڭ تۇبىنە تەرەڭ بويلا, مەن ءبىر عاجاپ اداممىن ونى دا ويلا», دەپ, بىزگە قالدىرعان وسيەتىن ۇعىنا الدىق پا؟ بىلتىر 175 جىلدىق مەرەيتويىن اتاپ وتكەن ابايدىڭ قازىناسىن قانشالىقتى يگەردىك, جان-دۇنيەسىن تولىق تۇسىنە الدىق پا؟ بۇل ساۋالدى بۇگىن ءار قازاق وزىنە قويۋى ءتيىس. اباي زامانىندا ايتىپ كەتپەك بەس اسىل ءىس پەن بەس دۇشپان بۇگىن دە وزەكتىلىگىن جويعان جوق. ءبىزدىڭ ماقسات – كورەرمەنگە وي سالۋ», دەيدى س.مۇقانوۆ اتىنداعى قازاق سازدى-دراما تەاترىنىڭ ديرەكتورى ءبىرجان جالعاسباەۆ.
ەل تاۋەلسىزدىگىنىڭ 30 جىلدىعىنا وراي ساحنالانعان «تولىق ادام» سپەكتاكلى فارس, گروتەسك, كاريكاتۋرا جانرلارىن بىرىكتىرەدى. قويىلىمنىڭ باستى رەجيسسەرى, وزىندىك قولتاڭباسى بار, قازاقستاندىق رەجيسسەرلەردىڭ جاڭا تولقىنىنىڭ جارقىن وكىلى – فارحات مولداعالي. سپەكتاكلدە 16 اكتەر وينادى.
