جامبىل اۋدانىندا سوڭعى 15 جىل كولەمىندە 112 قويما سالىنعان. بۇل قويمالاردىڭ باسىم بولىگى قاروي, گروديكوۆو, قاراتوبە, اقب ۇلىم, ءايشابيبى اۋىلدىق وكرۋگتەرىنە ورنالاسقان. بۇگىندە ءبىر عانا پولاتقوسشى اۋىلدىق وكرۋگىندە 97 قويما بار. ال قارويدا – 2, گروديكوۆودا – 7, قاراتوبەدە – 2, ايشابيبىدە – 2, اقب ۇلىمدا – 2 قويما جۇمىس ىستەپ تۇر.
ماسەلەن, جامبىل اۋدانىنداعى قاراتوبە اۋىلدىق وكرۋگىندە ورنالاسقان «Kaz Pruk Laim» جشس قويماسىندا 400 توننا الما, 200 توننا كارتوپ, 200 توننا ءسəبىز جəنە 170 توننا پياز قالىپتى تەمپەراتۋرادا ساقتالۋدا.
سەرىكتەستىك ديرەكتورى كوشكەنباي قۇلمانبەتوۆتىڭ ايتۋىنشا, سىيىمدىلىعى 2 مىڭ توننانى قۇرايتىن قويمانىڭ بۇگىندە 30 پايىزى عانا كوكونىس جانە جەمىس-جيدەكپەن تولتىرىلعان.
قويمادا 20 ادام تۇراقتى جۇمىسپەن قامتىلعان. ونداعى توڭازىتقىشتار مەن قۇرال-جابدىقتاردىڭ بارلىعى سوڭعى ۇلگىدەگى تەحنولوگيالارمەن جابدىقتالعان. بۇدان بولەك, كوكونىسكە ارنالعان ءبىر توننالىق اعاش جاشىكتەردى تاسىمالدايتىن ەكى كىشى جۇك ورناتقىش, ءبىر ءونىمدى سۇرىپتاۋشى, ەكى مۇزداتقىش كولىگى جۇمىس ىستەيدى.
بۇگىندە قويمادا جامبىل, بايزاق, ت.رىسقۇلوۆ پەن جۋالى اۋدانىنىڭ كوكىنىستەرى مەن المالارى ساقتاۋعا قويىلعان. بۇگىنگى تاڭدا سەرىكتەستىك قويمانى كوكونىسپەن جانە جەمىس جيدەكپەن قامتاماسىز ەتۋ ءۇشىن جيىرما گەكتار القاپقا الما جانە شيە كوشەتتەرىن وتىرعىزعالى جاتىر.
قازىرگى تاڭداعى اۋدانداعى قويمالاردىڭ جاي-كۇيى تۋرالى اۋداننىڭ باس اگرونومى امانگەلدى ابدىبەكوۆ ايتىپ بەردى.
«اۋدان بويىنشا سىيىمدىلىعى 33789 توننانى قۇرايتىن كوكونىس جانە جەمىس-جيدەك ساقتايتىن 112 قويما بار. بۇگىنگى تاڭدا 51 قويمادا 22293 توننا ءونىم ساقتالۋدا. تاراتىپ ايتسام, 36 قويمادا 19280 توننا پياز, 10 قويمادا 2837 توننا ءسابىز, 3 قويمادا 126 توننا الما, 2 قويمادا 50 توننا اسحانالىق قىزىلشا ساقتاۋعا قويىلعان. ولاردىڭ بارلىعى دەرلىك توڭازقىشتارمەن قامتىلعان. قازىر ونداعى وتاندىق ءونىم «القاپتان سورەگە» جوباسى اياسىندا وڭىردەگى بارلىق دۇكەندەر مەن الەۋمەتتىك دۇكەن سورەلەرىنە جەتكىزىلۋدە. قويمادا ساقتالعان ءونىمنىڭ ساپاسى دا جاقسى», دەدى ول.
