مولدوۆانىڭ ىزدەۋشىلەرى پاۆلودارداعى «مايدان جولى» ىزدەۋ-زەرتتەۋ وتريادىنا حابارلاسىپ, ۇلى وتان سوعىسى جىلدارى قازا تاپقان جاۋىنگەردىڭ تۋىستارىن تابۋعا كومەك سۇراعان. بۇل جايىندا الەۋمەتتىك جەلىدە وترياد كومانديرى الەكساندر شيتوۆ جازدى.
الەكساندر شيتوۆتىڭ ايتۋىنشا, مولدوۆانىڭ ىزدەۋشىلەرى ياسسكو-كيشينەۆ مايدان دالاسىندا كەزەكتى قازبا جۇمىستارىن جۇرگىزگەن. بيىل اقپان ايىندا حىنچەشتسك اۋدانى ۆوينەسكۋ ەلدى مەكەنىنىڭ ماڭىندا بىرنەشە جاۋىنگەردىڭ سۇيەگى تابىلعان. 1944 جىلى تامىزدا بۇل جەردە ءۇش گۆارديالىق ديۆيزيانىڭ بولىمشەلەرى شايقاسقان ەكەن. ورىس تاريحي-پاتريوتتىق كلۋبىنىڭ جانە «اۆگۋست» ىزدەۋ وتريادىنىڭ مۇشەلەرى سوعىس ۋاقىتىندا جەرلەنگەن جاۋىنگەرلەردىڭ زيراتىن تاۋىپ, سۇيەكتەرىن الىپ شىقتى.
«بىرنەشە جاۋىنگەردىڭ سۇيەگىن تاپتىق. بىراق ولارعا قاتىستى ەش اقپارات بولمادى. جاۋىنگەرلەردى شىعارىپ جاتقان كەزدە قاعازعا ورالعان زاتتى تاپتىق. كەيىن دۇرىستاپ قاراۋ ءۇشىن ونى الىپ قويدىق. ال سوڭعى جاۋىنگەردى كوتەرىپ جاتقان كەزدە گيمناستەركانىڭ قالدىعى مەن گۆارديالىق بەلگى كوزگە ءتۇستى. تابىلعان زاتتار بۇل جەردە گۆارديادىقتاردىڭ سوعىسقانىن دالەلدەي ءتۇستى. بىراق, ولارمەن جاۋىنگەرلەردىڭ اتى-ءجونىن انىقتاۋ مۇمكىن ەمەس», دەيدى مولدوۆالىق ىزدەۋشىلەر.
ولاردىڭ بار ءۇمىتى گازەتكە ورالعان تۇيىنشەك بولدى. قابات-قابات ورالعان تۇيىنشەكتەن الدىمەن تاعى ءبىر گۆارديالىق بەلگى شىققان. كەيىن «وزات پۋلەمەتشى» توسبەلگىسى مەن ءنومىرى جوق «ستالينگرادتى قورعاعانى ءۇشىن» مەدالى تابىلدى. ال سوڭعى ورامادان «ەرلىگى ءۇشىن» كۇمىس مەدالى شىقتى. ونىڭ سىرتىندا التى تاڭبالى ءنومىرى بولعان. ارحيۆتە مەدالداردىڭ يەسى انىقتالدى. يۆان رومانوۆيچ چەرەدنيك, اسكەري شەنى – سەرجانت. سولتۇستىك قازاقستان وبلىسى, پەشكوۆسكي اۋدانى, ترويتسكوە ەلدى مەكەنىندە تۋعان. اسكەر قاتارىنا پرەسنوۆ اسكەري كوميسسارياتىنان شاقىرتىلىپتى. ال تۋىستارى دەگەن جەردە فيوكلا يۆانوۆنا چەرەدنيك دەپ كورسەتىلگەن.
«يۆان ءرومانوۆيچتىڭ نەمەرەسىن ەكى كۇننىڭ ىشىندە تاپتىق. وتباسى 1970 جىلدارى ترويتسكوە ەلدى مەكەنىنەن كوشىپ كەتكەن ەكەن. قازىرگى تاڭدا پەتروپاۆلدا تۇرادى. قازىر ءبىز جاۋىنگەردىڭ سۇيەگىن ەلگە قايتارۋ ماسەلەسىن شەشۋىمىز قاجەت. جاۋىنگەردىڭ تۋعان-تۋىستارىن ىزدەۋگە كومەكتەسكەن بارشا جاندارعا – جامبىل اۋدانى ترويتسكوە ەلدى مەكەننىڭ تۇرعىندارىنا, جامبىل اۋداندىق پوليتسيا ءبولىمىنىڭ باستىعى اسان مەيراموۆقا, جۋرناليستەرگە العىس ايتامىز», دەيدى الەكساندر شيتوۆ.
