ول قازاق حالقىنىڭ ەجەلدەن كەلە جاتقان كونە ءداستۇرىنىڭ ءبىرى – قۇسبەگىلىكپەن اينالىسادى. قازاقتىڭ اسىل ءداستۇرىن, مادەنيەتىن دامىتۋدا بۇل ونەردىڭ ماڭىزى زور. بۇركىتشى جەڭىسحان باقبولات ۇلىنىڭ اكەسى دە اڭشىلىقپەن اينالىسىپ, قاقپان قۇرىپ, تازى جۇگىرتكەن.
– سوناۋ باعزى زاماننان كەلە جاتقان قۇسبەگىلىك ونەردى دارىپتەپ جۇرگەنىمىزگە دە ءبىراز ۋاقىت بولدى. كەڭ دالادا قانداۋىز قاقپان قۇرىپ, بۇركىت ۇشىرىپ, العان اڭنىڭ تەرىسىن يلەيمىن. بالا كەزىمدە اكەم قاسقىر, تۇلكى سەكىلدى اڭدى اۋلاپ, تەرىسىن يلەپ, ونىسىن بىزگە ۇيرەتىپ وتىراتىن. قازاق حالقىنىڭ تەكتىلىگىن, جىگىتتەرىنىڭ سەرىلىگى مەن جۇرەكتىلىگىن تانىتاتىن بۇل ونەر اسا بىلگىرلىك پەن مىقتىلىقتى تالاپ ەتەدى. جىرتقىش قۇسپەن ءتىل تابىسىپ, ونى ايتقانىڭا كوندىرۋ ءۇشىن دە توزىمدىلىك پەن قايسارلىق قاجەت. جاراتىلىسىنان جابايى, جىرتقىش بولىپ جارالعان قىران قۇستى شوشىتىپ, ۇركىتىپ الماي بايلانىسۋ دا اسا ماڭىزعا يە, – دەيدى قۇسبەگى.
ول الداعى ۋاقىتتا قۇسبەگىلىك ونەردى جاستارعا جان-جاقتى ۇيرەتۋدى ماقسات ەتىپ وتىر جانە وعان اۋىل جاستارىنىڭ قىزىعۋشىلىعى دا جوعارى.
