ماحامبەت اتىنداعى اكادەميالىق قازاق دراما تەاترىنىڭ ديرەكتورى بەرىك جامەنوۆتىڭ ايتۋىنا قاراعاندا, 26 ناۋرىزدا بالالارعا ساحنالىق قويىلىمدار ۇسىناتىن جاڭا ونەر ۇجىمىنىڭ تانىستىرىلىمى وتەدى. قۋىرشاق تەاترىنىڭ اشىلۋىنا وراي اتىراۋلىق ارتىستەر بەكەت ءزينۋلليننىڭ ستسەناريى بويىنشا «اتا مەكتەبى» ەرتەگىسىن دايىنداپ جاتىر.
«ەلىمىزدە بالالار دراماتۋرگياسى كەنجەلەپ قالعان. سول سەبەپتەن, ءوزىمىز ستسەناري جازۋعا تۋرا كەلەدى. بۇل جولى بالالارعا ارناپ ەرتەك جازعان تالانتى اكتەر بەكەت ءزينۋلليننىڭ شىعارماشىلىعىنا جول اشىلعالى وتىر» دەيدى تەاتر ديرەكتورى بەرىك جامەنوۆ.
