جامبىل وبلىسىنىڭ اكىمى كارىم كوكءىرەكباەۆ جاڭا جىلدىڭ قارساڭىندا ايماقتىڭ جىل كولەمىندە ەرەكشە ەڭبەكتەرىمەن كوزگە ءتۇسىپ, وقىرمان ىقىلاسىنا بولەنگەن ۇزدىك جۋرناليستەرىنە ماراپات تاپسىردى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
«جۋرناليستەر اراسىنداعى شىعارماشىلىق كونكۋرس جىل سايىن وتەدى. ارنايى نوميناتسيالار بويىنشا جەڭىمپازداردى كوميسسيا تاڭدايدى, ونىڭ قۇرامىنا ەلىمىزگە تانىمال قوعام قايراتكەرلەرى, جازۋشىلار مەن باق وكىلدەرى كىرەدى», - دەلىنگەن حابارلامادا.
«وبلىستىڭ الەۋمەتتىك-ەكونوميكالىق تىنىس-تىرشىلىگىن رەسپۋبليكالىق دەڭگەيدە بەلسەندى كورسەتىپ, ناسيحاتتاعانى ءۇشىن» نوميناتسياسى بويىنشا «قازاقستان» ۇلتتىق تەلەارناسىنىڭ مەنشىكتى ءتىلشىسى عاني قالماحان, قازتاگ اقپارات اگەنتتىگىنىڭ مەنشىكتى ءتىلشىسى ۆيكتوريا ساۆەلەۆا, «اپورت» تەلەكومپانياسىنىڭ پروديۋسەرى ەلەنا گورياچەۆا ماراپاتتالدى.
«ۇزدىك پۋبليتسيستيكالىق ماتەريال» اتالىمىنا وبلىستىق «اق جول» گازەتىنىڭ ءتىلشىسى جانات قاپالباەۆا يە بولسا, «ۇزدىك تالدامالىق ماتەريال» نوميناتسياسىنا وبلىستىق «اراي» جاستار گازەتىنىڭ ءتىلشىسى حاميت ەسامانوۆ يە بولدى. ال «ۇزدىك تەلەراديو حابارى» نوميناتسياسىندا وبلىستىق «قازاقستان-تاراز» تەلەارناسىنىڭ ءتىلشىسى گۇلنۇر قۇلانباەۆا, «ۇزدىك اقپاراتتىق حابارلاما» نوميناتسياسىندا وبلىستىق «زناميا ترۋدا» گازەتىنىڭ ءتىلشىسى ميحايل تيو, «ۇزدىك وچەرك» نوميناتسياسىندا وبلىستىق «زناميا ترۋدا» گازەتىنىڭ ءبولىم مەڭگەرۋشىسى دارحان بايتۋوۆ, «ۇزدىك فوتو ماتەريال» نوميناتسياسىندا رەسپۋبليكالىق «ۆرەميا» گازەتىنىڭ مەنشىكتى ءفوتوتىلشىسى ولگا ششۋكينا جۇلدەلەرگە قول جەتكىزدى.
مۇرات ايتقوجا.
دەرەككوز: جامبىل وبلىسى اكىمىنىڭ ءباسپاسوز قىزمەتى.
