زالال كولەمى – 1 ملرد تەڭگە

ەكولوگيا • 03 ناۋرىز، 2021

زالال كولەمى – 1 ملرد تەڭگە

67 رەت كورسەتىلدى

وبلىستىق ەكولوگيا دەپارتامەنتىنىڭ باسشىسى الىبەك بەكمۇحامەتوۆتىڭ مالىمەتىنە سۇيەنسەك، بىلتىر ەكولوگيالىق زاڭنامانى ساقتاۋعا بايلانىستى 83 تەكسەرۋ جۇرگىزىلىپ، 91 اكىمشىلىك ءىس قوزعالىپتى. سونىڭ ىشىندە 73 اكىمشىلىك ىسكە قاتىستى جالپى سوماسى 96 017 000 تەڭگەگە اكىمشىلىك ايىپپۇل تۇرىندە قاۋلى شىعارىلدى. قورشاعان ورتاعا كەلتىرىلگەن 1 ملرد تەڭگەدەن استام زالالدى وتەۋ تۋرالى 106 ۇيعارىم بەرىلگەن ەكەن.

جولداسبەك كوشەرباي ۇلى

– بىلتىر «I ساناتتاعى وبەكتىلەر ءۇشىن مەملەكەتتىك ەكولوگيالىق ساراپتاما قورىتىندىسىن بەرۋ» بويىنشا 252 مەملەكەتتىك قىزمەت كورسەتىلدى. ونىڭ ىشىندە 182 جوباعا مەملەكەتتىك ەكولوگيالىق ساراپتامانىڭ وڭ، 57 جوباعا ەكولوگيالىق زاڭناما تالاپتارىنا سايكەس كەلمەۋىنە بايلانىستى تەرىس قورىتىندىلار بەرىلدى. سونداي-اق 13 جوبا الدىن-الا ساراپتامامەن كەرى قايتارىلدى. «I ساناتتاعى وبەكتىلەر ءۇشىن قورشاعان ورتاعا ەميسسيالارعا رۇقسات بەرۋ» بويىنشا 71 قىزمەت كورسەتىلدى. 53 وتىنىشكە قورشاعان ورتاعا ەميسسياعا رۇقسات بەرىلىپ، 15 وتىنىمگە رۇقسات بەرۋدەن باس تارتىلدى، – دەدى دەپارتامەنت باسشىسى.

ونىڭ ايتۋىنشا، ەكولوگيالىق زاڭنامانى بۇزعان 244 دەرەك تىركەلىپتى. ماسەلەن، «تەڭىزشەۆرويل» جشس-نە قاتىستى ەكولوگيالىق زاڭنامانىڭ ساقتالۋى بويىنشا باقىلاۋ سۋبەكتىسىنە (وبەكتىسىنە) بارۋ ارقىلى پروفيلاكتيكالىق باقىلاۋ جانە جوسپاردان تىس تەكسەرۋ جۇرگىزىلدى. اتالعان كومپانيا تاراپىنان قورشاعان ورتاعا لاستاۋشى زاتتار شىعارىندىلارىن، ونىڭ ىشىندە الاۋ قوندىرعىلارىندا گاز جاعۋ سالدارىنان نورماتيۆتەن تىس ەميسسيالار جۇزەگە اسىرىلعانى انىقتالدى.

– وسىعان بايلانىستى «تەڭىزشەۆرويل» جشس-نە ەلىمىزدىڭ ەكولوگيالىق زاڭناماسىن بۇزۋ ناتيجەسىندە كەلتىرىلگەن زالالدى وتەۋ تۋرالى 145 988 808 تەڭگە، 60 985 880 تەڭگە جانە 519 477 172 تەڭگە كولەمىندە نۇسقامالار بەرىلدى. الايدا، «تەڭىزشەۆرويل» جشس تاراپىنان جوعارىدا كورسەتىلگەن نۇسقامالار ەرىكتى تۇردە ورىندالمادى. سول سەبەپتەن، دەپارتامەنت نۇر-سۇلتان قالاسىنىڭ سوتىنا «تەڭىزشەۆرويل» جشس-نەن مەملەكەت كىرىسىنە زالالداردى ءوندىرىپ الۋ تۋرالى تالاپ ارىزبەن جۇگىندى. نۇر-سۇلتان قالالىق سوتىنىڭ 2020 جىلعى 21 قازانداعى جانە 2 قاراشاداعى شەشىمدەرىمەن دەپارتامەنتتىڭ «تەڭىزشەۆرويل» جشس-نە قاتىستى تالاپ ارىزدارى قاناعاتتاندىرىلدى، – دەيدى دەپارتامەنتتتىڭ ءباسپاسوز حاتشىسى اسلان جەڭىس ۇلى. – ارينە، شەتەلدىك ينۆەستورمەن بىرلەسە كومپانيا سوتتىڭ مۇنداي شەشىمدەرىمەن كەلىسپەدى. ءسويتىپ، دەپارتامەنتتىڭ نۇسقامالارى مەن سوت شەشىمدەرىنىڭ كۇشىن جويۋ، تالاپ-ارىزداردى قاناعاتتاندىرۋدان باس تارتۋ، جاڭا شەشىمدەردى قابىلداۋ تۋرالى اپەللياتسيالىق شاعىم بەردى. بىراق جوعارعى سوتتىڭ مامانداندىرىلعان سوت القاسى «تەڭىزشەۆرويل» جشس-ءنىڭ اپەللياتسيالىق شاعىمدارىن قاناعاتتاندىرۋدان باس تارتتى. سوت شەشىمدەرى زاڭدى كۇشىنە ەنىپ، «تەڭىزشەۆرويلدان» جالپى سوماسى 726 451 860 تەڭگە كولەمىندە زالالدار مەملەكەت كىرىسىنە ءوندىرىپ الىندى.

قورشاعان ورتاعا زالال كەلتىرۋشىلەر قاتارىندا قوقىستاردى بەلگىلەنبەگەن جەرگە تاستاۋ دا جاتادى. ماسەلەن، عارىشتان تۇسىرىلگەن سۋرەتتەر ارقىلى اتىراۋ قالاسى مەن ماحامبەت اۋدانىنىڭ اۋماعىنان 484 قوقىس الاڭى انىقتالدى. وسىعان وراي اتالعان قالدىقتاردى جويۋ جۇمىستارى جۇرگىزىلدى.

– انىقتالعان اۋماق شامامەن 50 شاقىرىمدى قۇرايدى. قاشىقتان زوندتاۋ ارقىلى تۇسىرىلگەن عارىشتىق تۇسىرىلىمدەر بۇعان دەيىن اتالعان اكىمدىكتەرگە جولدانعانىمەن، كورسەتىلگەن قوقىستاردى تولىقتاي تازارتپاعان. سول سەبەپتەن، اتىراۋ قالاسى مەن ماحامبەت اۋدانى اكىمدىكتەرىنىڭ جاۋاپتى تۇلعالارى اكىمشىلىك جاۋاپكەرشىلىككە تارتىلدى. وبلىس اكىمى بەكىتكەن عارىشتىق مونيتورينگ ناتيجەلەرىمەن انىقتالعان ستيحيالىق قوقىس ورىندارىن جويۋدىڭ كەستەسى جاساقتالدى. قازىر قوقىس توگىلگەن 484 ورىن تولىقتاي جويىلدى، – دەيدى مەملەكەتتىك ەكولوگيالىق باقىلاۋ ءبولىمىنىڭ باسشىسى ا.ناسيلوۆ.

اتىراۋ وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز