پ.چايكوۆسكيدىڭ «ەۆگەني ونەگين» سپەكتاكلىنىڭ پرەمەراسى تەاتر ساحناسىندا 2019 جىلى 8, 9 اقپان كۇندەرى وتكەن ەدى. وپەرالىق تۋىندى «استانا وپەرا» سوليستەرى مەن وركەسترىنىڭ, حورى مەن بالەتىنىڭ, سونداي-اق بالالار ستۋدياسىنىڭ قاتار قاتىسۋىمەن قۇندى. قويۋشى ديريجەرى – تەاتردىڭ باس ديريجەرى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى الان بورىباەۆ. باس حورمەيستەرى – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ, قويۋشى حورەوگرافى – ەلەنا شەرستنەۆا.
«ەۆگەني ونەگين» وپەراسى الەمدەگى ەڭ ءىرى رەپەرتۋارلىق قويىلىمداردىڭ ءبىرى سانالادى. «استانا وپەرا» ساحناسىنا بۇل تۋىندى قويۋشى-رەجيسسەر داۆيدە ليۆەرموردىڭ بىرەگەي تۇجىرىمداماسىمەن ۇسىنىلعانى ءمالىم. وقيعا جەلىسى ەگدە جاستاعى تاتيانانىڭ ەۆگەني ونەگينمەن وتكىزگەن جاستىق شاعىن ەسكە الۋىمەن ورىلەدى. وتاندىق ونەر ساڭلاقتارى ازىرلەگەن قويىلىمنىڭ ەرەكشەلىگى ستسەنوگرافيالىق اسەرلەردەن دە ايقىن اڭعارىلادى: حيكايا كەيىپكەرلەرى قاس پەن كوزدىڭ اراسىندا ساحنا استىنا جاسىرىنىپ, اۆتوماتتى پلاتفورمادا ساحنانىڭ تۇكپىرىنەن پايدا بولادى, ال 3D-پروەكتسيالار تابيعاتتىڭ اسەم كورىنىسىن, كەيىپكەرلەر بەينەسىنىڭ قوسارلانۋىن ايشىقتى بەدەرلەيدى. قازاقستاننىڭ ەڭبەك سىڭىرگەن قايراتكەرلەرى, بەلگىلى سۋرەتشىلەر سوفيا تاسماعامبەتوۆا مەن پاۆەل دراگۋنوۆتىڭ شارۋالاردىڭ ءتۇرلى-ءتۇستى كوستيۋمدەرىن, سول ءداۋىردىڭ ءساندى ءستيلىن, پەتەربۋرگ بالى مەن لاريندەر ۇيىندەگى مەرەكەنى جەتكىزۋدەگى شىعارماشىل ىزدەنىسى ايرىقشا اتاپ وتۋگە تۇرارلىق.
– العىس ايتۋ كۇنى 2016 جىلى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن جاريالانعان بولاتىن. ەلوردالىق مەديتسينا مەكەمەلەرى قىزمەتكەرلەرىنە العىس ايتۋ كۇنى قۇرمەتىنە مەرەكەلىك تارتۋ رەتىندە ۇسىنىلاتىن پ.چايكوۆسكيدىڭ «ەۆگەني ونەگين» قويىلىمى ارقىلى الەمدىك كلاسسيكا جاۋھارىنا ءبىرتابان جاقىنداي ءتۇسۋدى ماقسات تۇتتىق. ادامداردىڭ ءبىر-بىرىنە قولۇشىن سوزۋى, قولداۋ كورسەتۋى مەن قايىرىمدىلىعى, مەيىرىمدىلىگى مەن جومارتتىعى سياقتى ادامزاتقا ورتاق اسىل قۇندىلىقتار بارلىق قازاقستاندىقتىڭ كوڭىلىنە جارقىن بولاشاققا نىق سەنىممەن قاراۋعا سەنىم ۇيالاتادى, – دەدى «استانا وپەرا» تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ.
ەسكە سالا كەتەتىن تاعى ءبىر جايت, تەاتر 2019 جىلدىڭ قازان ايىندا دميتري حۆوروستوۆسكيدىڭ ءبىرىنشى فەستيۆالىنە قاتىسىپ, رەسەيلىك كورەرمەندەر تاراپىنان دا جوعارى باعالانعان بولاتىن. ونەر شەبەرى قۇرمەتىنە وتكىزىلگەن مادەني شارا كورنەكتى ءانشىنىڭ مادەني مۇراسىن ساقتاۋعا جانە قولداۋعا ارنالعان. قازاقستاندىق ارتىستەر د.حۆوروستوۆسكي اتىنداعى كراسنويار مەملەكەتتىك وپەرا جانە بالەت تەاترىنىڭ ساحناسىندا ۇلى كومپوزيتوردىڭ 180 جىلدىعى قۇرمەتىنە پ.چايكوۆسكيدىڭ جاۋھار تۋىندىسىن ۇسىنعان ەدى.
