الدىمەن اقتوبەدەگى «جەكپە-جەك» سپورت سارايىنداعى ەل بىرىنشىلىگىندە ەلىمىزدىڭ 13 وبلىسى مەن نۇر-سۇلتان, الماتى, شىمكەنت قالالارىنان كەلگەن 2004, 2005, 2006 جىلدارى تۋعان 680 جاس دزيۋدوشى بەلدەستى. ءار ايماق 16 سالماق دارەجەسى (ۇلدار, قىزدار) بويىنشا قۇراما جاساقتاعان. اتالمىش ەل بىرىنشىلىگىندە جەڭىمپاز جانە جۇلدەگەر اتانعان تاتامي شەبەرلەرى ۇلتتىق قۇراما ساپىنا ىرىكتەلىپ, ازيا جانە الەم بىرىنشىلىكتەرىنە قاتىسۋعا مۇمكىندىك الادى.
بەس كۇنگە جوسپارلانعان جىلدىڭ ماڭىزدى دوداسىن سپورت سۇيەر قاۋىم تىكەلەي ەفيردەن عانا تاماشالادى. ويتكەنى سانيتارلىق تالاپتار بويىنشا سپورت سارايىنا ازىرشە جانكۇيەرلەردىڭ كىرۋىنە رۇقسات جوق. سونىمەن قاتار سپورتشىلارعا پتر تەستتىڭ بولۋى دا مىندەتتەلدى. جارىس ۋاقىتىندا سپورت كەشەنىنە تەك بەلدەسەتىن بالۋاندار مەن جاتتىقتىرۋشىسى جانە تورەشىلەر عانا كىرگىزىلدى.
پاندەميا سالدارىنان تاتامي شەبەرلەرى جىل بويى جارىستارعا قاتىسپاعاندىقتان بولار, بىرىنشىلىك ءا دەگەننەن-اق تارتىستى, ءارى ەموتسياعا تولى بولدى. قىزدار اراسىنداعى 40 كيلو سالماقتا جاۋىرىنى جەرگە تيمەگەن شىمكەنتتىك سابينا يۋلداشەۆا توپ جارسا, 44 كيلودا تۇركىستان وبلىسىنىڭ وكىلى ايمان يبراگيموۆا باس جۇلدەنى ولجالادى. سونىمەن قاتار جامبىلدىق ارداق نۇرساق (48 كگ), الماتى وبلىسىنىڭ وكىلى ارۋجان ەرەجەپوۆا (52 كگ), اتىراۋلىق دانا ءابىدروۆا (57 كگ), قوستانايلىق دينا بالۋن (63 كگ), قاراعاندىلىق ديانا تەلباەۆا (70 كگ) جانە 70 كيلودان جوعارى سالماقتاعى ديلناز رۋستامقىزى (الماتى وبلىسى) ءوز سالماقتارىندا ۇزدىك شىقتى.
ۇلدار اراسىنداعى بەلدەسۋ دە توسىن وقيعالارعا تولى بولدى. اتاپ ايتار بولساق, قوستانايلىق بايمۋرزين ارحات (50 كگ), اتىراۋ وبلىسىنىڭ بالۋانى ولجاس قۇمار (55 كگ), شىمكەنتتىك ايان بايكەنجەەۆ (60 كگ), ماڭعىستاۋلىق قانات ءابيت ۇلى (66 كگ), اقتوبەلىك نۇرجان بيسەنوۆ (73 كگ), قاراعاندىلىق ۇلان التاەۆ (80 كگ), شىمكەنتتىك مەيىرجان بەرىكوۆ (90 كگ) جانە 90 كيلودان جوعارى سالماقتا الماتى وبلىسىنىڭ بالۋانى دامير احەت ەل چەمپيونى اتاندى.
ەل بىرىنشىلىگىنىڭ قورىتىندىسى بويىنشا, الماتى وبلىسىنىڭ قۇراماسى 3 التىن, 2 كۇمىس, 3 قولا جۇلدەمەن كوش باستادى. ال شىمكەنت قالاسىنىڭ دزيۋدوشىلارى 2 التىن, 2 كۇمىس جانە 4 قولا جۇلدەمەن ەكىنشى ورىنعا جايعاستى. 2 التىن, 3 قولا جۇلدە يەلەنگەن قاراعاندى وبلىسىنىڭ جاسوسپىرىمدەر قۇراماسى ۇزدىك ۇشتىكتى قورىتىندىلادى.
دزيۋدودان ەل بىرىنشىلىگى اياقتالعان بەتتە «جەكپە-جەك» سپورت سارايىنىڭ بوز كىلەمىنە ەلىمىزدىڭ 23 جاسقا دەيىنگى ەرلەر اراسىنداعى گرەك-ريم بالۋاندارى شىقتى. ءۇش كۇنگە جوسپارلانعان چەمپيوناتقا نۇر-سۇلتان, الماتى, شىمكەنت قالالارى مەن 14 وبلىستان 200-دەن استام بالۋان قاتىستى. بالۋانداردىڭ باسەكەسى دە UWW (حالىقارالىق كۇرەس فەدەراتسياسى) ەرەجەسى بويىنشا كورەرمەندەرسىز جانە سانيتارلىق نورمالاردى ساقتاي وتىرىپ وتكىزىلدى.
بايراقتى باسەكەنىڭ العاشقى كۇنىندە بالۋاندار 55, 63 جانە 87 كيلوعا دەيىنگى سالماق دارەجەلەرىندە ءوزارا مىقتىنى انىقتادى. 55 كيلودا قىزىلوردالىق الپامىس داستانبەك بارلىق قارسىلاسىن ەش كۇمانسىز جەڭسە, 63 كيلودا سىنعا تۇسكەن ەلوردالىق اساۋحات مۋحاماديەۆ فينالدىق كەزدەسۋدە الماتى وبلىسىنان كەلگەن عالىم قابدۋناساروۆتان باسىم ءتۇستى. ال 87 كيلودا بەلدەسكەن تاعى ءبىر ەلوردالىق بالۋان ماقسات سايلاۋ باس جۇلدە ءۇشىن وتكەن باسەكەدە جارتاس نۇرعاليدى (الماتى وبلىسى) ۇتىپ, التىن مەدال تاقتى.
ەكىنشى جارىس كۇنىندە 60, 67 جانە 77 كيلو سالماقتاعى بالۋاندار بەلدەستى. 60 كيلوداعى فينالدىق سايىستا شىعىسقازاقستاندىق نۇرسۇلتان بازارباەۆ بوز كىلەم يەسى نۇربولات تەمىرباەۆتان ايلاسىن اسىرىپ, قازاقستان چەمپيونى اتاندى. 67 كيلودا جامبىل وبلىسىنىڭ بالۋانى ءدىن-مۇحامەد قوشقاردىڭ باعى جاندى. ول فينالدا شىعىسقازاقستاندىق ماديار مالتەكباەۆتى جەڭدى. 77 كيلو سالماقتا اقتوبەلىك داۋلەت جالعاسوۆ ۇزدىك شىقتى. فينالدا ماڭعىستاۋلىق راحات ساعىمبايمەن بەلدەسكەن ول ەل چەمپيونى دەگەن اتاققا يە بولدى.
جارىستىڭ سوڭعى كۇنىندە 72, 82, 97 جانە 130 كيلو سالماقتاعى بالۋاندار شەبەرلىك بايقاستى. رەسەي, تۇركيا جانە تاعى باسقا دا شەتەلدە وتكەن بىرقاتار حالىقارالىق جارىستا اتوي سالعان الماتى وبلىسىنىڭ وكىلى ءاليحان كوكەنوۆ (72 كگ) ەل چەمپيوناتىندا دا قارسىلاس شىداتپادى. فينالدا ول ەراسىل نۇربوسىنوۆتى الىپ جىقتى. وتكەن جىلعى ەل بىرىنشىلىگىندە 77 كيلودا توپ جارعان جامبىلدىق دياس كالەن بيىل دا تۇعىردىڭ بيىك ساتىسىنان كورىندى. اقتوبەدەگى دودادا 82 كيلودا بەلدەسكەن ول فينالدا قاراعاندىلىق اسىلبەك ابدىحالىقتان ايلاسىن اسىردى. ال اسا اۋىر سالماقتا حالىقارالىق تۋرنيرلەردە ەل قورجىنىنا جۇلدە سالىپ جۇرگەن پاۆلودارلىق انتون ساۆەنكو (130 كگ) چەمپيون اتاندى.
