ءىس-شارانىڭ سالتاناتتى اشىلۋ راسىمىنە سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ, نۇر-سۇلتان قالاسى دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ جانە نۇر-سۇلتان قالاسى ترياتلون فەدەراتسياسىنىڭ پرەزيدەنتى ەرجان ءبىرجانوۆ, «تەڭ مۇمكىندىكتەر الەمى» قورىنىڭ باسشىسى نۇرگۇل ۇلجەكوۆا قاتىسىپ, تۋرنيرگە قاتىسۋشىلارعا ساتتىلىك تىلەدى.
«مەملەكەت باسشىسى قاسىم-جومارت توقاەۆ əر جولداۋىندا بارلىق جاستاعى ەل ازاماتتارى اراسىندا بۇقارالىق سپورتتى دامىتۋدىڭ ماڭىزدىلىعىنا ەرەكشە دەن قويىپ كەلەدى. بۇگىنگى تاڭدا ەلىمىزدە ترياتلون جاقسى دامىپ وتىر. ونىڭ ىشىندە ءۇش سپورت ءتۇرىن قاتار الىپ جۇرگەن بەلسەندى ازاماتتار سانى كۇن ساناپ ءوسىپ كەلەدى. قازىرگى كەزدە ەلىمىزدە ترياتلونمەن اينالىساتىن ادامدار سانى 100 مىڭنان استى. ترياتلون پاركى وسى سپورتپەن اينالىسۋدى جاقسى كورەتىن قاۋىم ءۇشىن ارنايى سالىندى. وڭىرلەردە دە وسىنداي ينفراقۇرىلىم تۇرعىزىلۋدا», دەدى سەرىك ساپيەۆ.
نۇر-سۇلتان قالاسى دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ جارىستى ۇيىمداستىرۋداعى باستى ماقسات – سپورت اۋەسقويلارى مەن سالاۋاتتى ءومىر سالتىن ۇستانۋشىلار اراسىندا ترياتلون, ۆەلوسپورت, جەڭىل اتلەتيكا جانە شاڭعى سپورتىن دامىتۋ, سالاۋاتتى ءومىر سالتىن ناسيحاتتاپ, بۇقارا حالىقتى سپورتپەن اينالىسۋعا شاقىرۋ ەكەنىن اتاپ ءوتتى.
سارىارقانىڭ سارى ايازىنا قاراماستان, جارىس جولىنا شىققان 200-گە جۋىق قاتىسۋشى جۇگىرۋدەن 2 شاقىرىم, ۆەلوجارىستان 3 شاقىرىم, شاڭعى جارىسىنان 2,5 شاقىرىم قاشىقتىقتا باق سىنادى. قاشىقتىقتى بەلگىلەنگەن ۋاقىتتان كەشىكتىرمەي اياقتاعان جەكە جارىستىڭ ءاربىر قاتىسۋشىسى مارە سىزىعىندا ەستەلىك مەدالدارمەن ماراپاتتالدى.
بيىلعى جارىستىڭ ەڭ ۇلكەن قاتىسۋشىسى – 62 جاستاعى بايزاق تالاپنۇر ۇيىمداستىرۋشىلارعا العىسىن ءبىلدىردى. «قىسقى ترياتلون جارىسى وتە جوعارى دەڭگەيدە ۇيىمداستىرىلدى. مەن بۇل جارىسقا جىلدا قاتىسامىن. بۇگىن جۇگىرۋدەن باستاپ, شاڭعى باسەكەسى بويىنشا جارىس جولىن اياقتادىم. وتە قۋانىشتىمىن. بارشا جاستى سپورتپەن اينالىسۋعا شاقىرامىن», دەدى بايزاق ساعىندىق ۇلى.
جاس ساناتتارى بويىنشا I, II, III ورىن العان سپورتشىلار كۇنى كەشە نۇر-سۇلتان قالاسى ترياتلون فەدەراتسياسىنىڭ كەڭسەسىندە ارنايى ماراپاتتالدى. ايتا كەتەيىك, جارىستان تۇسكەن قاراجات «سالاماتتى بولاشاق» – «سپورت بارشاعا» الەۋمەتتىك جوباسىن قولداۋ ءۇشىن «تەڭ مۇمكىندىكتەر الەمى» قايىرىمدىلىق قورىنا اۋدارىلاتىن بولادى.
