قىس قىستاۋىن, جاز جايلاۋىن جايلاپ جاتقان قازاقتىڭ جەرىنە ەكىنشى دۇنيەجۇزىلىك سوعىس جىلدارى ءتۇرلى ۇلت وكىلدەرى قونىس اۋدارا باستاعان. قايدان كەلىپ, قايدا تۇرعانىن بىلمەي اڭتارىلعان ەلدى كورگەندە قازاق ەلى بوتەنسىمەي, تورگە وزدىردى. اياقتان تۇرىپ كەتۋلەرىنە سەپتەستى. ءۇي-جايىن كوتەرۋگە كومەكتەستى. قازاقتىڭ قاراپايىمدىلىعىنىڭ ارقاسىندا ءبىزدىڭ بابامىز دا قازاق ەلىنە تەز ءسىڭىسىپ كەتتى.
مەنىڭ تۋعان اتام مەن اپام – نيكولاي ەگوروۆيچ پەن ماريا گريگورەۆنا رەسەيدىڭ التاي ولكەسىنەن قازاقستاننىڭ شىعىسىنا 1950-جىلدارى تابان تىرەگەن. تەگى, تابيعاتى ۇقساس بولعاندىقتان شىعار, بۇل ايماققا قۋانا-قۋانا كوشىپ كەلىپتى. التاي ولكەسىندە سوۆحوز باسقارىپ جۇرگەن اتام نيكولاي قازاقستانعا كەلگەن سوڭ دا سول قىزمەتىن جالعاستىرىپتى. قىزمەت ەتە ءجۇرىپ, وسكەمەن وڭىرىندە ۇرپاعىن ءوربىتتى, زەينەتكە شىقتى.
ول سوعىس ارداگەرى ەدى. اتام ومىردەن وتكەنىمەن, نەمەرەلەرىنە وسيەت رەتىندە قازاق ەلىنىڭ قۇشاق جايا قارسى العاندىعى تۋرالى ەستەلىك ايتىپ وتىراتىن. قازاق حالقىنىڭ باۋىرمال ەكەنىن اتامنىڭ اڭگىمەسىنەن عانا ەمەس, بۇگىنگى كۇندە دە كورىپ جۇرەمىن. ارعى تەگىم رەسەيدەن بولعانىمەن, مەنىڭ وتانىم – قازاقستان. ول داۋسىز. اتام سول ءبىر الاساپىران زاماندى كوپ ەسىنە العىسى دا كەلمەيتىن.
اتام مەن اپام شىعىس قازاقستانعا كوشىپ كەلگەندە وزدەرىن وزگە ەلگە كەلگەندەي سەزىنبەپتى. جەرگىلىكتى تۇرعىندارمەن ەتەنە ارالاسىپ كەتكەن. ەلۋىنشى جىلدارى باستالعان ارالاس-قۇرالاستىق ءالى ۇزىلگەن جوق.
مەنىڭ ۇلتىم ورىس بولعانىمەن, بويىمدا قازاقىلىق بار. ونى رەسەيگە بارعاندا انىق سەزەمىن.
بۇگىندە ءۇش بالا تاربيەلەپ وتىرعان باقىتتى انامىن. قازاقى مادەنيەتتى, سالت-ءداستۇردى بويىما ءسىڭىرىپ العانىمنىڭ ءبىر دالەلى – داستارقانىمنان باۋىرساق, قۇرت-ىرىمشىك ۇزىلمەيدى. قۇداي وسىنداي اۋىزبىرشىلىگىمىز جاراسقان بەيبىت ومىردەن ايىرماسىن.
ۆەرا پراۆدينا,
وسكەمەن قالالىق ورىس مادەني ورتالىعىنىڭ ءتورايىمى
شىعىس قازاقستان وبلىسى
